Нам, төрийн нэрт зүтгэлтэн Ю.Цэдэнбал агсан мэндэлсний 100 жилийн ой ирэх 2016 онд  тохионо. Тэрхүү ойг угтан бүтээсэн түүхэн баримтат кино өчигдөр NTV телевизээр олны хүртээл боллоо.

Монголын төр засгийг 44 жил удирдсан тэрээр амьдралдаа өгсч уруудахын баяр гунигийг ханатлаа амссан гэдгийг уг киноны уран бүтээлчид онцолсон бөгөөд зохиолыг Ц.Жамбалсүрэн бичиж найруулагчаар нь Н.Алтанчулуу ажиллажээ.

Ю.Цэдэнбал гэж хэн байсан талаар өгүүлэх баримтат кинонд түүний МУ-ын хөгжилд оруулсан түүхэн гавьяаг тодотгохыг хүссэн байна.

Сонирхуулахад Ю.Цэдэнбал нь улс орноо хөгжүүлэх, ард түмний аж амьдралыг дээшлүүлэн соёлжуулах, улсын тусгаар тогтнол, батлан хамгаалах хүч чадлыг бэхжүүлэх, олон улсын нэр хүндийг өндөржүүлэхэд өөрийн авьяас чадвар, оюун билгээ зориулсан хүн байв. Тухайлбал хөнгөн ба хүнсний үйлдвэрүүд байгуулан хөгжүүлсэн, их дээд, дунд сургуулийг байгуулан хөгжүүлсэн, 1950-иад онд Монголчууд бүгд бичиг үсэгтэн болж ЮНЕСКО-ийн шагнал хүртсэн, 1940 онд 750 мянга байсан хүн ам 1980-аад оны дундуур 2 саяд хүрч,спорт болон соёл урлаг дэлхийн тавцанд танигдаж, Дархан,Чойбалсан, Эрдэнэт, Хөтөл, Багануур зэрэг аж үйлдвэрийн төвүүд бий болгосон гэхчилэн тоочоод баршгүй.