Ерөнхий сайдын ахлах зөвлөх Л.Гансүхийг Монголоос оргон зайлсан гэх мэдээлэл 20 гаруй хоногийн өмнө жинхэнэ утгаараа дуулиан тарьсан. Тодруулбал түүнийг Засгийн газраас хэрэгжүүлсэн “Нүүрс” хөтөлбөрийн ахлагчаар ажиллаж байхдаа ард иргэдэд сайн чанарын нүүрс нийлүүлэх нэрээр төрийн хөрөнгийг хувьдаа завшиж, олон мянган иргэдийг хохироосон гэж АТГ-аас шалгаж эхэлсэн юм. Харин Л.Гансүх үүнийг мэдмэгцээ гадаад руу оргон зайлсан тухай мэдээлэл тархсан. Тэр бүү хэл охин Г.Цэрэнжагзанг нь АТГ-аас баривчилж шалгасан гэх. Учир нь Л.Гансүх “Нүүрс” хөтөлбөрийг хэрэгжүүлэхдээ ямар нэгэн тендер зарлалгүйгээр “Эм Жи Эл Эс Би” компаниар дүүрэг, хороодод нүүрс хүргэх ажлыг хийлгэжээ. Гэтэл тус компани нь Л.Гансүхийн охин Цэрэнжагзаных байсан аж.  Мөн Л.Гансүх нь энэ хөтөлбөрөөс олон сая төгрөг олсноос гадна “Нүүрс” хөтөлбөр алдагдалтай ажиллаа” хэмээн Засгийн газрын нөөц хөрөнгөөс 854 сая төгрөгийг гаргуулж авсан гэсэн юм.

Энэ талаарх мэдээлэл гарч эхлэнгүүт Л.Гансүх “Юун оргон зайлах вэ. Зүгээр байгаа хүнийг ингэж гүтгэж болохгүй шүү дээ. Би хөлний ясний хагалгаанд орсон юм. Яс учраас хугацаа шаарддаг юм байна. Би шудрага бус юм хийдэггүй. Хийх ч үгүй. Энэ увайгүй үйлдэлтэй хатуу тэмцэнэ” гэдгээ мэдэгдсэн.

Тэгвэл хөлний хүнд хагалгаанд ороод эмчлүүлж байгаа гэх тэрбээр Ерөнхий сайд Н.Алтанхуягийн ОХУ дахь айлчлалын багт орж Санкт-Петербург хотод болсон Эдийн засгийн форумд оролцсон байна. Бүр ОХУ-ын Ерөнхийлөгч В.Путинтай гар барилцан зогсож буй зураг нь интернэтэд таржээ. Солонгост удаан хугацаагаар эмчлүүлнэ гэж байсан Л.Гансүх юу болоод Ерөнхий сайдыгаа дагаад Орост явж байдаг билээ гэдэг асуулт яах аргагүй олны анхаарлыг татав. "Ясны хагалгаа хийлгэсэн учраас хугацаа шаарддаг юм байна. Солонгост удна" зэргийн юм ярьж явсан түүнийг одоо харвал мах шөл сайтай эрүүл саруул байгаагаас гадна ихээхэн баяр баясгалантай харагдаж байх юм.

Хууль хяналтын байгууллагаас шалгах болохоор бие нь өвдөж Солонгос руу ухасхийдэг хүн чинь уг нь биеэ бодоод хэвтэж баймаар юм. Мөн тэрбээр их мөнгө идэж уусан гэх хэргийн талаараа “Би Монголд очоод дэлгэрэнгүй мэдээлэл хийнэ” гэж байсан. Гэтэл одоог хүртэл таг чиг. Тэр бүү хэл саяханыг хүртэл түүнийг Төрийн ордон дахь өрөөндөө байхгүй байсныг хүмүүс мэднэ. Гэтэл гэв гэнэт Ерөнхий сайдтай хамт ОХУ-д гараад ирэхээр олон хүн гайхсан нь дамжиггүй биз. 

Нөгөөтэйгүүр тодорхой хэрэгт шалгагдаж байгаа хүнийг эх оронд нь авчраад шалгуулж буруу, зөвийг нь олуулахын оронд гадаадад айлчлалаар авч явж байгаа нь ямар учиртайг Ерөнхий сайдаас асуумаар байна. Мөн Л.Гансүх зөвлөх үнэхээр буруугүй юм бол сандрах бус цагдаагийн байгууллагад сайн дураараа очоод нэрээ цэвэрлэмээр юм. Тэгвэл олон ч хүний эргэлзээ тайлагдах гээд байна даа.