Японы мэргэжлийн сумо бөхийн 71 дэх их аварга М.Ананд өчигдөр эх орондоо ирсэн. Түүнийг өнөөдөр Монгол Улсын Ерөнхий сайд Н.Алтанхуяг хүлээн авч уулзлаа. Тэрээр 2006 оны арваннэгдүгээр сарын башёгаас эхлэн дээд зиндаанд өрсөлдсөн бөгөөд Монголоос төрсөн дөрөв дэх сумогийн аварга юм. Ингэснээр сумогийн 68, 69, 70, 71 дэх аваргууд Монгол Улсаас төрөөд байгаа билээ.

Ерөнхий сайд Н.Алтанхуяг Монгол Улсынхаа нэр хүндийг өндөрт өргөж, монгол бөхийн удмыг залгаж яваа түүнд баяр хүргээд улам сайн хичээж барилдахыг хүслээ. М.Ананд сумогоор барилдах хүсэлтэй байгаа тухайгаа захидалд бичиж анх Япон улс руу явуулж байсан тухайгаа энэ үеэр дурслаа. Тэрээр Япон улсад анх 16 настайдаа хөл тавьж байснаас хойш 12 жил болсон. Энэ хугацаан аварга болсондоо туйлын их баяртай байгаагаа дуулгалаа.

Тэрээр өдгөө 28 настай бөгөөд залуучуудад хандаж “Залуу хүн, бусадтай зөв харьцаж, хүндлэх ёстой. Хүнийг хүндэлж байж, өөрөө хүндлүүлдэг. Өөрт оногдсон ажлыг бага гэлтгүй чин сэтгэлээсээ хариуцлагатай хийх хэрэгтэй. Тэгж гэмээнэ хүнд амжилт ирдэг” гэв. Одоогоор Япон улсад Монголоос 28 бөх сумогийн спортоор хичээллэж байгаа аж. Түүний 15 нь дээд зиндаанд барилддаг байна.

Энэ үеэр түүнтэй цөөн хором ярилцлаа.

-Танд энэ өдрийн мэнд хүргэе. Хэзээ эх орондоо ирэв?

-Юуны өмнө Монголын ард түмэндээ энэ өдрийн мэнд хүргэе. Өчигдөр эх орондоо ирлээ.

-Аварга цол хүртсэнээс хойш барилдаан хэрхэн өөрчлөгдөж байна?

-Аварга байх нь асар их өөр юм байна. Тавдугаар сарын башёд барилдаад өөрийн биеэр мэдэрлээ. Их ч туршлага судаллаа.

-Дараагийн зорилго юу байна вэ?

-Мэдээж дараагийн башёд түрүүлэх, аварга цолоо батлахын төлөө хичнээнэ дээ. Нутаг орондоо сайхан амарч авна. Тэгээд л бэлтгэлээ хийнэ дээ.

-Эх орондоо хэр удаан амрах вэ?

-Ер нь цөөхөн хоног амарна даа. Энэ 7 хоногийг дуусгаад явах байх.

-Таныг барилдаж байхад Хакухо аварга гар өргөж танд даваа өгсөн?

-Даваа аварга маань миний барилдааныг маш сайн харж байсан юм билээ. Бид тэнд зүгээр суудаггүй. Шүүгч гэсэн ойлголтоор суудаг. Даваа аваргын нүдэн дээр миний үснээс татаж байгаа хэсэг нь харагдсан юм байна лээ. Тэгээд гараа өргөсөн.

-Монгол бөхчүүдийг шахах байдал гардаг уу?

-Тийм зүйл бараг байдаггүй дээ. Гайгүй шүү.