Хутга, шөвөгний хэргээр парламентын түүхэнд анхлан нэрээ бичүүлсэн “эрхэм” гишүүн Н.Номтойбаяр саяханы нэг өдөр сэтгүүлч Л.Мөнхбаясгалангийн “Цензургүй яриа” нэвтрүүлэгт оролцож цензургүй ярив.

Улс төр, нийгмийн амьдралын талаар онц чухал зүйлүүдийг сул үг ч хэрэглэлгүй ярьж буйг нь харвал томоожсон байна гэж дүгнэж болох ч уг мөн чанартаа бол ухаантай харагдах гэж оролдсон найруулга муутай жүжиг шиг санагдав. Ингэхдээ хөмсгөө байн, байн зангидаж ирээд их л чухал царайлж буй нь эгээтэй л Женко Х.Баттулгатай андуурахад хүргэлээ. Ямартай ч ярьж буй хүн нь ч, сэдэв нь ч тийм чухал санагдсангүй.

Гэхдээ энэ үеэр тэрбээр нэгэн цагт өвөр түрийндээ орж явсан найз Г.Нямдоржийнхоо талаар сонирхолтой түүхийг ярьсан нь олны анхаарлыг татаж орхилоо.

Эрүүгийн ертөнцөд нэр цуутай Г.Нямдорж, УИХ-ын гишүүн Н.Номтойбаяр нар бол нэгээр дуусахгүй сайн, муу дурсамжтай хүмүүс. Ганц жишээ дурдахад, жил орчмын өмнө Төрийн ордны ойролцоох нэгэн бааранд УИХ-ын гишүүн Н.Номтойбаяр хэсэг хүмүүстэй ажил хэрэг яриад сууж байж. Гэтэл хайрт найз Г.Нямдорж нь согтуу орж ирээд үг хэлээр доромжилж улмаар түүн рүү хутга барьж дайрсан гэдэг. Энэ асуудал цагдаа, сэргийлэхдээ тулахад хоёр найз бие, бие рүүгээ хэвлэлээр үг дайж, урьд хожид сонсогдож байгаагүй хачин, сонин баримтыг дэлгэж байсан. Г.Нямдоржийн хувьд “Н.Номтойбаяр над руу хутга барьж дайрсан. Миний өмнүүр бие хамгаалагч нь орж бэртсэн. Н.Номтойбаяр бол УИХ-ын гишүүн байх ёс зүйгүй хүн. Архи уухаараа агсам зан гаргаж, танхайрдаг. Амьдрал үзээгүй банди” гэж ярилцлага өгсөн байв. Харин УИХ-ын гишүүн Н.Номтойбаяр “Хэргийн хохирогч нь би. Намайг гадаадад боловсрол эзэмшихээр сурч явахад тэр хүн шоронд байсан. Намайг 10 жил улс орныхоо төлөө ажиллаж байхад Г.Нямдорж эрүүгийн ертөнцөд нэрээ мандуулаад явж байсан. Тэгэхээр хэн нь, хэн бэ гэдэг нь үүнээс харагдаж байна. Г.Нямдорж согтуу байхдаа над руу хутга барьж дайрсан” гэсэн юм.

Улмаар уг хэрэг хууль хяналтын байгууллагаар шалгагдаж эхэлсэн ч яаж шийдэгдсэн нь одоог хүртэл тодорхойгүй. Хэргийн газарт ажилласан цагдаа УИХ-ын гишүүн Н.Номтойбаярын гараас хутгыг салгаж авсан гэж протколд андуурч бичээд цолоо хураалгасан гэхээс өөр мэдээлэл алга.

Ямартай ч Г.Нямдорж, Н.Номтойбаяр хоёр нэгэн цагт 40 мянгатад бужигнуулж явсан үй зайгүй найзууд. Г.Нямдоржийнхоо ажил, амьдралд нь үргэлж тусалж, дэмжиж ирсэн гэж Н.Номтойбаяр ярьдаг. Бүр Г.Нямдоржийн эхнэрийг нь жирэмсэн болоход нь тусалж явжээ. Тодруулбал Г.Нямдоржийн эхнэр эрүүл мэндийн хувьд асуудалтай жирэмсэн болох боломжгүй байх үед нь Н.Номтойбаяр хуурамч бичиг баримт гаргаж өгөөд Солонгос руу эмчилгээнд явуулж байжээ. Ингээд Солонгост эмчлүүлсний ачаар Г.Нямдоржийн эхнэр жирэмсэн болж хүү төрүүлсэн байна. Найздаа баярласан Г.Нямдорж хүүдээ Номт гэдэг нэр өгөх гэж байхад нь Н.Номтойбаяр “Хэрэггүй ээ. Энэ нэр миний үр удамд байх ёстой нэр” гээд болиулж байжээ. Ингээд Г.Нямдорж хүүдээ Дорж гэдэг нэр өгсөн байна.

Энэ мэт Н.Номтойбаярын Г.Нямдоржид тусалж байсан түүх олон аж. Харин Г.Нямдорж Н.Номтойбаярын ярьсан бүхий л зүйлийг үгүйсгэж захидал хүртэл бичсэн. Ер нь энэ хоёрын хэн нь үнэн яриад байна вэ? Ямартай ч УИХ-ын гишүүний албан тушаал, нэр хүнд, эрх ашигт нь муугаар нөлөөлөх энэ хэрэгт эрхэм гишүүн Н.Номтойбаяр их л болгоомжтой ханддаг билээ.