Буржгар хими хийлгэсэн үсээ яаж арчлах ёстой вэ? Яавал бага гэмтэх бол?

Ер нь хими хийлгэхэд үс гэмтэхгүй байна гэж байдаггүй. Хими хийлгэсний дараа арчилгааг маш сайн хийж өгөх хэрэгтэй. Чийгшүүлэх, зөөлрүүлэх эмчилгээ чухал байдаг. Аль болох хуурайшуулж болохгүй. Үсний тэжээлийн тос болон маскыг 7 хоногт 2-3удаа зайлшгүй хэрэглэнэ. Энэ арчилгааг шулуун болон буржгар аль аль химинд хэрэглэнэ. Мөн хүмүүсийн хэлж заншсан “халаадаг малгай”-г хэрэглэхээс татгалз. Түүний оронд маск, тосоо түрхээд зориулалтын гялгар малгай өмссөний дараа халуун усанд базсан алчуураар толгойгоо ороовол илүү үр дүнтэй.

Миний үсний онцлогоос болоод хими удаан тогтдоггүй. Сарын өмнө хийлгэсэн хими одоо бараг гарчихсан. Одоо дахиад хийлгэвэл болох уу?

Болохгүй. Хамгийн багадаа 6 сарын зайтай хийлгэх ёстой байдаг. Хэрвээ 6 сарын дараа хийлгэх бол арчилгааг дээд зэргээр хийнэ. Үгүй бол үс их хэмжээгээр унах, арчилгаа авахааргүй гэмтэх аюултай. Хэрэв арчилгааг тогтмол хийж амждаггүй бол ядаж 1 жилийн дараа хийлгээрэй.

Үс тослогтоод байх юм. Өглөө бүр угаагаад ч нэмэр алга. Ямар арга хэмжээ авах вэ?

Өглөө бүр угаах буруу. Тэвчээд хоёр хоног тутамд нэг удаа угаагаарай. Дараа нь гурав хоног тутамд угааж занш. Өдөр бүр угаах нь тослогтуулах бас нэг шалтгаан. Мөн самаа байнга савантай халуун усаар угааж байх хэрэгтэй. Үсээ угаасны дараа сэнс аль болох хэрэглэхгүй байх нь зөв. Мөн хүмүүс шампунь сонгохдоо ихэвчлэн найздаа сайн таардаг, бусдаас сайн гэж сонссон, эсвэл алдартай брэндийг сонгож алдаа гаргадаг. Брэнд гэхээсээ илүү шампунийн онцлог, өдөр тутмынх эсэх, үсний онцлогт тохирох эсэхийг харж сонгох нь чухал. Тослог үсний шампунь заавал ургамлын гаралтай байх ёстой. Үсний гел, вакс, хөөс, лак зэргийн хэрэглээг багасгаарай. Бас нэг чухал зүйл бол үсээ дарааллын дагуу зөв угааж сурах хэрэгтэй. Эхлээд үсээ сайтар норгоод, алган дээрээ тохирсон хэмжээний шампунь аваад хоёр алгандаа тэнцүү нялж өгнө. Үүний дараа хуйхандаа хурууныхаа өндгөөр иллэг хийх маягаар жигд тарааж, үүссэн хөөсөөр нь 3-5 минут орчим угаана. Ингэж хоёр удаа давтана. Эхний угаалтаар хир, тоос, шороог арилгаж, дараагийн угаалтаар шампунийн үйлчилгээг идэвхижүүлдэг. Угаасны дараа нойтон байхад самнаж болохгүй. Хэрвээ зайлшгүй сэнс хэрэглэх бол хамгийн багадаа 40 см хэртэй зайнаас барьж үлээлгэвэл зохино.