Монголын кино урлагт цоо шинэ хайрын түүх мэндлэх гэж байна.  Тодруулбал "Бондоолой фильм”-ийн анхны бие даасан кино "Миний хайр" энэ сарын 16-нд нээлтээ хийх юм. Ингээд тус киноны ерөнхий найруулагч Бондоолой буюу Ц.Золжаргалын яриаг хүргье.

Ц.Золжаргал: Амьдралд салахаас илүү баялаг зүйл их байдаг

-Сайн байна уу? Хоёулаа яриагаа “Миний хайр” киног бүтээх санаа сэдэл төрсөн үеэс эхлье?

- Хүний амьдрал өөрөө их баялаг зүйл. Би өөрөө гэр бүл зохиож үзээгүй. Гэхдээ эргэн тойрны хүмүүсээ хараад байхад салалт их байна. Миний харж байгаагаар энэ их эмзэг сэдэв. Магадгүй тэр хүмүүс ойлголцохоо болиод салсан байх. Гэхдээ амьдралд салахаас илүү баялаг зүйл их байдаг. Өнөөдөр бид нэгэндээ гомдож бухимдсан ч маргааш  нь буцаад хэн нэгнийг гэсэн сайхан сэтгэл байж л байдаг. Хүмүүсийн ярьж байгааг сонсоод байхад хайртай хирнээ салчихсан тохиолдол их. Би түүнд хайртай байсан, түүний төлөө ийм зүйл хийж байсан гэдэг. Гэтэл тийм орон зайгаа өөрсдөө үгүй хийчихээд харамсаад сууж байгаа мянга мянган залуучууд байна. Салалтын хамгийн том золиос нь үр хүүхэд. Өөр эцэг эхийн гар харна. Магадгүй төрсөнөөс илүү хайрлаад явах хүн байгаа л байх. Гэхдээ тийм хүн ховор. Энэ  сэдвийг бодож яваад кино хийе гэж шийдсэн. Эхлээд бид инээдмийн кино хийх гэж байсан ч сүүлд зохиолч А.Миеэгомбо ахтайгаа ярилцаад цэвэр драм болгоё гэж шийдсэн.

-Энэ кино “Бондоолой фильм”-ийн анхны уран бүтээл гэж байгаа. Өмнө нь кино хийж байсан туршлага бий юу?

- Би мэргэжлийн оператор биш. Сонирхолынхоо дагуу энэ чиглэлээр ажилладаг. Би чинь өөрөө жүжигчин мэргэжилтэй. Манай ангийнхан гэж Хөгжимт драмын театрыг төгссөн мундаг залуучууд бий. Одоо энэ тэнд нэр алдараа дуурсгаад явж байна. Анх реклам зар сурталчилгаа хийж эхэлсэн. Сүүлдээ миний туйлын хүсэл кино хийх болсон. Бооёо ах намайг анх кинондоо ажиллуулж байлаа. Тэр нь надад нэг ёсондоо ташуур өгсөн. Түүний дараагаар “Доргио долоон эр”, “Single Ladies” зэрэг кинонд ажиллаа. Хүмүүст их хүрсэн байна. Эцэст нь өөрөө кино хийж үзэхээр шийдсэн дээ.

-Кино сайн болох нь баг хэрхэн бүрдсэнтэй шууд холбоотой. Тэгэхээр кино группынхээ тухай ярихгүй юу?

- Баг их мундаг байлаа. Баг сайн болохоор би өөрөө мундаг болж харагдаж байгаа байх /инээв/. Тиймээс багынхаа нийт уран бүтээлчдэд маш их баярлалаа гэж хэлье. Манай хоёрдугаар найруулагчаар Оюу эгч, гэрэлтүүлэгчээр Батбаяр ах ажилласан. Жүжигчдийн хувьд Хөгжимт драмын театрын нэг ангийн найз, “А capella” хамтлагийн дуучин Э.Мөнхтөр, мөн ангийн маань анд Э.Ууганбаяр, жүжигчин Б.Баярмаа, дуучин П.Баярцэнгэл, “Seven” телевизийн хөтлөгч Зулаа, МАСК продакшны жүжигчин Ш.Жавхлан, жүжигчин Ивээл зэрэг олон мундаг залуучууд тоглосон. Кино маань өөрөө залуучуудын кино болохоор бид залуусыг түлхүү оролцуулсан байгаа. Ийм сайхан хүмүүсийн сэтгэл зүрх шингэсэн болохоор кино маань сайхан уран бүтээл болсон байх гэж бодож байна.

-Энэ кино хэдий хэр хугацаанд бүтсэн кино вэ? зураг авалт хэзээнээс эхлэв?

- Бид нэг их яарсангүй. Киноныхоо зохиолыг өнгөрсөн жилийн 10 сараас бичиж эхэлсэн. Миеэ ахыгаа би их зовоосон. Энэ зохиол есөн удаа бүтсэн зохиол. Харин зураг авалтын хувьд өнгөрсөн гурван сард эхэлсэн. Одоо дуусах шатандаа явж байна. Удахгүй үзэгчдийн хүртээл болгоно.

-“Бондоолой фильм” гэж нэрний учир? Таныг хэзээнээс ингэж нэрлэх болов?

- Би хамгийн анх жүжигчин Чинзориг гэж хүний шавь болсон. Багш маань надад жүжиглэх болон найруулах урлагийн ихэнхи зүйлийг зааж өгсөн. Тэр хүн намайг СУИС-д ор гэж зөвлөсөн. Түүний дагуу СУИС-д шилжиж ороод ангийхантайгаа мөр зэрэгцэн сурч эхэлсэн. Тухайн үед ангидаа л мах шөлтэй нь байсан юм байлгүй. Манай ангийн охин намайг харж байгаад “энийг ерөөсөө Бондоолой гэж нэрлье” гээд түүнээс хойш л Бондоолой нэртэй болчихсон.