Хүннү гүрэн байгуулагдсаны 2223 жил, Их Монгол улс байгуулагдсаны 808 жил, Ардын хувьсгалын 93 жил, аймаг байгуулагдсаны 83 жилийн ойн баяр наадмын хүчит бөхийн барилдаан үзэгч олныг шуугиулсан, сонирхолтой барилдаан ихтэй байлаа. Наадамд Улсын начин М.Чимэддорж, Ж.Гансүх, Д.Цогзолдорж, Аймгийн арслан Д.Отгонбаатар, Б.Хатанбүүвэй, Б.Батхуяг, П.Мөнхбат, н.Түмэнжаргал нараар магнайлуулсан хүчит 128 бөх зодоглож наадамчин олноо баясгасан юм. Энэ жилийн баяр наадамд гадны бөх барилдуулахгүй байх талаар яригдаж байсан ч наадам нээлттэй болсон.

Барилдааны тавын даваа гэхэд Улсын хоёр начнаас бусад аймгийн арслан цолтнууд өвдөг шороодож таван ч сумын цолтон үлдсэн байлаа. Ингээд Сэргэлэн сумын харъяат Сумын заан Л.Чадраабал, Баяндун сумын харъяат Сумын заан Г.Төрмөнх, Халхгол сумын хаъяат Сумын заан н.Батдорж нар тав давж аймгийн начин цолны болзол хангасан юм.

Наадмын зургаагийн даваанд Улсын начин Д.Цогзолдорж шинэхэн начин Л.Чадраабалыг, Аймгийн заан Х.Алтансүх Г.Төрмөнхийг амлаж давсан бол Аймгийн начин Д.Ариунмөрөн улсын начин Ж.Гансүхийг давж Харцага цолтон боллоо. Мөн энэ даваанд аймгийн начин Д.Анар, шинэхэн начин Н.Батдорж нарыг хэн ч амлалгүй тунаж үлдсэн бөгөөд Д.Анар давж Харцага цол нэмсэн.

Их шөвөгт Улсын начин Д.Цогзолдорж Цагаан-Овоо сумын харъяат шинэхэн харцага Д.Ариунмөрөнг амлаж Аймгийн заан Х.Алтансүх, Шинэ харцага Д.Анар нар тунаж үлдсэн. Энэ даваанд шинэхэн хоёр харцага маань цолоо ахиулж заан цолны болзол хангасан юм.

Ингээд наадмын үзүүр түрүүнд Дорнод аймгийн Дашбалбар сумын харъяат, Кураш бөхийн дэлхийн аварга, Аймгийн заан цолны болзол хангасан Доржийн Анар түрүүлж Арслан цол хүртэж, Дорнод аймгийн Цагаан-Овоо сумын харъяат, Аймгийн заан цолны болзол хангасан Дашнямын Ариунмөрөн үзүүрлэж наадамчин олноо баясгалаа.