-
2017 оны 1 сарын 05
Дэлхийд нэн ховорт ордог бөхөн гөрөөс Говь-Алтай, Ховд аймгийн 6 сумын нутагт цөөн тоогоороо амьдардаг. Сүүлийн өдөр хоногуудад бөхөн гөрөөс олноороо үхэж байна.
-
2017 оны 1 сарын 05
Дорнод аймгийн хэмжээнд томуу, томуу төст өвчний тархалт нэмэгджээ.
-
2017 оны 1 сарын 05
“Аз жаргалтай хот” хөтөлбөрийн хүрээнд Нийслэлийн Соёл, урлагийн газраас санаачлан Улаанбаатар хотын нийтийн төв номын сангийн үйлчилгээг иргэдэд ойртуулах, уншигчид номоор нөхөрлөх, бусадтай номоо солилцох боломжийг бүрдүүлэх зорилгоор “Номоо солилцъё” өдөрлөгийг зохион байгуулах гэж байна.
-
2017 оны 1 сарын 05
Монгол наадам цогцолбор”-ын ОНӨТҮГ-ын дарга Н.Батсүмбэрэлтэй ярилцлаа.
-“Монгол наадам цогцолбор” бол Хүй долоон худагт үйл ажиллагаа явуулдаг байгууллага. Яг ямар үйл ажиллагаа эрхэлдэг талаар та уншигч олонд дэлгэрэнгүй мэдээлэл өгөх нь зүйтэй байх?
-“Монгол наадам цогцолбор” бол нийслэлийн бүтцэд байдаг орон нутгийн өмчит төсөвт үйлдвэрийн газар. Улсын баяр наадмын хурдан морины уралдаан болдог гэдгээр нь Хүй долоон худгийг иргэд, олон түмэн сайн мэднэ. Тэнд зохион байгуулдаг үйл ажиллагааг зохицуулах болон бүртгэлд байгаа эд хөрөнгийн ашиглалт, хадгалалтыг эрхэлдэг гэж ойлгох нь зүйтэй байх. Гэхдээ одоо бид үүнээс илүү өргөн хүрээтэй ажиллахыг хичээж байна. Цаашид Хүй долоон худагт үндэсний спорт, соёл урлагт тулгуурласан аялал жуулчлалын төв байгуулах зорилтыг манай байгууллага баримтлан ажиллаж байгаа. Ийм чиглэлийг хотын даргын мөрийн хөтөлбөр, холбогдох баримт бичгүүдэд тусгуулсан. Эртний домог түүх шингээстэй сэрүүн мандлын дэнжид уламжлалт морин уралдаанаас гадна морин тойруулга, морин аялал, уналга сургалт, поло, гольф, шагай, сур болон бусад спортод суурилсан үйл ажиллагаа, мөн иргэдийн соёл урлаг, чөлөөт цагт зориулсан төвүүд бий болно. Өвөл, зун гэлтгүй улирал харгалзалгүйгээр ажилладаг үндэсний спорт, соёл урлаг, аялал жуулчлалын төв болгохоор тэмүүлж байна.
-Таны ярианаас сонсоход түүхэн газар нутагт монголын өв соёлыг дэлгэрүүлэх юм байна гэж ойлгогдлоо. Инженерийн дэд бүтцийн хувьд яаж шийдэж байгаа вэ?
-Хотын аялал жуулчлалын нэгэн төв болохын хувьд дэд бүтцийн асуудлыг тухайлан авч үзэхээс өөр аргагүй. Хүй долоон худагт дулааны станц, цахилгааны дахин дамжуулах дэд төв, цэвэр усны сан, бохир усны цэвэрлэх байгууламжийн зураг төслүүд нь хийгдэж байна.
-Нийслэлийн Засаг даргын 2016-2020 оны үйл ажиллагааны мөрийн хөтөлбөр батлагдаад удаагүй байна. Хөтөлбөрт “Монгол наадам цогцолбор”-ын талаар хэрхэн тусгагдсан бэ?
-Хотын даргын мөрийн хөтөлбөрт бидний үйл ажиллагаатай холбогдох хэд хэдэн заалт орсон. Хүй долоон худгийг аялал жуулчлалын төв болгох асуудлыг бүрэн дэмжсэн бие даасан заалт ч бий. Төр иргэнээ аюулгүй, эрүүл, тав тухтай орчинд амьдруулахаас гадна амарч, хөгжих, чөлөөт цагаа өнгөрүүлэх боломжийг бүрдүүлэх ёстой. “Аз жаргалтай хот” хөтөлбөрт энэ зорилт шингэсэн байгаа.
-Төр, хувийн хэвшлийн түншлэл, хамтын ажиллагааг хөгжүүлэх талаар ярих боллоо. “Монгол наадам цогцолбор” энэ чиглэлээр хэрхэн ажиллаж байна вэ?
-Төр бүх асуудалд оролцохгүй ч нийгмийн хөгжил, иргэдийнхээ өмнө хүлээх үүргээ хэрэгжүүлэх ёстой. Нөгөө талаас хувийн хэвшлийн байгууллага, аж ахуйн нэгжүүд нийгмийн хариуцлагаа ухамсарлах байдал илт нэмэгдсэн. Энэ хоёрын холбоос, хослол бол төр, хувийн хэвшлийн түншлэл юм. Бид энэ зарчмыг тэргүүн эгнээнд тавьж байгаа. Үүний нэгэн тод жишээ нь цанын бааз юм. “UB resort” цанын баазыг цэвэр хувийн хэвшлийнхэн санаачилсан. Энэ санаачлага бидний зөвхөн эхлэл төдий юм. Нийслэлчүүд агаар салхинд гарах, чөлөөт цагаа өнгөрүүлэх газар, боломжийг улам бүр эрэлхийлэх боллоо. “Улаанбаатарт ганц байгаа гайгүй үйлчилгээтэй цанын бааз нь хүрэлцэхгүй байна. Богд уул, эсвэл зүүн тийшээ салхинд гардаг. Хотын баруун тийшээ очдог газартай баймаар байна” гэсэн иргэдийн санал, шүүмжийг нэг бус удаа сонсч байлаа. Хүй долоон худаг бол хотын баруун талд байдаг тул маш цэвэр агаартай газар. Тэнд гуравхан өдөр морь уралдуулдаг байхын эсрэг эхний алхам нь энэ санаачлага гэж үзэж болно. Харин үүнд төр хувийн хэвшлийг дэмжиж ажиллаж байгаа. Өөр олон санаачлагыг хувийн хэвшил, олон түмэнтэйгээ хамтарч боловсруулах боломж зөндөө бий шүү.
-Хүй долоон худагт ирэх жилүүдэд бүтээн байгуулалтын олон ажил хийх юм байна. Гаднын хөрөнгө оруулагчдын анхаарлыг татах тал дээр ямар менежмент хийж байна вэ?
-Үр өгөөжөө өгөх төслүүдийг хөрөнгө оруулагчдад танилцуулна. Засгийн газар, нийслэлээс баталсан хэсэгчилсэн ерөнхий төлөвлөгөөнд тулгуурлан Хүй долоон худагт хийгдэх төсөл, бүтээн байгуулалтын мастер төлөвлөгөө хийхээр ажиллаж байна. Түүний дараа бид хөрөнгө оруулагчдад чиглэсэн үе шаттай ажлуудыг зохион байгуулж эхэлнэ.
-Гаднын хөрөнгө оруулагчид хөрөнгө оруулахад эрх зүйн орчин хангалттай юу?
-Боломжоо ашиглах хэрэгтэй. Өнөөгийн байгаа эрх зүйн болон эдийн засгийн орчныг ашиглахын төлөө бид боломжоороо чармайж байна. Хотын удирдлага болон төрийн зүгээс ч дэмжиж байгаа. Зарим яригдаж буй хуулийн төслүүд батлагдчихвал хөрөнгө оруулалтын асуудлууд эрчтэй урагшилна гэж итгэж байна.
-Бүтээн байгуулалтын ажлыг хийхэд газар зохион байгуулалт чухал. Энэ асуудлыг хэрхэн зохицуулж байгаа вэ?
-“Монгол наадам цогцолбор”-ыг хөгжүүлэх зорилгоор 12582 га газрыг Засгийн газрын тогтоолоор улсын тусгай хэрэгцээнд авсан. Энэ хүрээнд хийгдэх бүтээн байгуулалтын хэсэгчилсэн төлөвлөгөөг нийслэл боловсруулж, Засгийн газар баталсан. Гэвч өнгөрсөн гурван жилд давхардуулан газар олгосон зөрчил байна. Үүнийг нийслэл, аймгийн төвшинд шийдвэрлэхээр ажлын хэсэг гарсан. Олон нийтийн эрх ашиг хөндөгдөх учир энэ асуудал нааштайгаар шийдэгдэнэ гэж бодож байгаа.
-Хүй долоон худагт 30 мянган хүний суудалтай цэнгэлдэх барихаар төлөвлөж байгаа. Нийгэм, эдийн засгийн хувьд аль хэр ач холбогдолтой вэ?
-Энэ бол том төсөл. Нийгмийн болоод эдийн засгийн үр өгөөжийн талаасаа ч чухал. Яг одоо байгаа стадион бол наадамчид, үзэгчдийн эрэлт хэрэгцээг бүрэн хангаж чадахааргүй байна. Авто зогсоол, орчны аюулгүй байдал, техник үйлчилгээний нөхцөлүүдийг дурдаж болно. Нөгөө талаас наадмын бөх, морь, сурыг нэг дор үзэх үзэгч олны хүсэл сонирхол бий. Доод тал нь 30 мянган хүний суудалтай цэнгэлдэх барих боломж манайд байгаа. Энэ ажил зураг төслийн шатандаа явж байна.
-Хүй долоон худаг бол үндэсний хурдан морины уралдааны гол зам. Улаанбаатар хотод морь уралдах хамгийн ойрхон шулуун зам үүнээс өөр байхгүй. Уламжлалт шулуун замын морин уралдааныг хадгалах уу, эсвэл тойрог хэлбэрээр уралдуулах уу?
-Эртнээс уламжилж ирсэн үндэсний соёлыг хадгалж хөгжүүлнэ. Нэг зүйлийг бид сайн ухаарч ойлгох хэрэгтэй байгаа юм. Тэр нь эцэг өвгөдөөс олон зууныг өртөөлөн шалгагдаж, өнөө цагт уламжлан ирсэн соёл, түүний хэв шинжийг эвдэхгүй хадгалах асуудал. Бөхчүүдээ жижиг тойрогт хугацаатай минут заагаад, сураа дардасын тойрог руу автоматаар харваад эхэлбэл үндэсний өнгө аяс гээгдэнэ биз дээ.
-Хүй долоон худагт олон улсын стандартад нийцсэн морин тойруулга барих уу?
-Манай үндсэн бодлого, ерөнхий төлөвлөгөөнд морин тойруулгын төсөл багтаж байгаа. Дэлхийн хэмжээнд үнэлэгдэх, олон улсын чанарт нийцэх морин тойруулга хийхийн төлөө ажиллана. Бидэнд судалгаа, туршлага бас эрх зүйн орчин л хэрэгтэй.
-Гаднын аялал жуулчлалын газруудыг харахад хөшөө, дурсгал, үзэх харах зүйл олонтой байж амрагчдын сонирхлыг ихээр татдаг шүү дээ. Хүй долоон худагт хөшөө, дурсгал хийгдэх үү?
-Хийнээ. Хөшөө дурсгал нэг талаас урлагийн бүтээл нөгөө талаас хүндэтгэл, түүхийг шингээж байдаг гэж боддог юм. Нэгэнт спорт, соёл урлаг, аялал жуулчлалын үндэсний агуулгатай төв болгохоор зорьж байгаагийн хувьд үүнээс ангид байхгүй. Гадаадын жуулчлалын газарт очоод бараг л хамгийн түрүүнд ямар нэгэн хөшөө дурсгал хардаг биз дээ. Тэр жишгээр л явна.
-Хүй долоон худаг бол гурван өдөр наадам хийдэг л газар гэсэн өрөөсгөл ойлголт байдаг. Энэ ойлголт танай хамт олны хүчээр өөрчлөгдөж байх шиг байна?
-Баярлалаа. Гэхдээ энэ бол олон жилийн өмнө бэлтгэгдэж өнөөдөр олон нийтэд хүрч байгаа ажил. Ингэж үнэлэгдэж байгаад баяртай байна. Манай баг хамт олон ч, өмнөх удирдлага ч, хотын үе үеийн удирдлагууд ч үүний төлөө ажилласаар ирсэн. Яармагийн дэнжид болдог байсан морин уралдааныг 2003 оны наадмын өмнө тухайн үеийн хотын удирдлага нийслэл хот суурьшиж байсан энэ газар нутагт нүүлгэсэн байдаг. Тэр цагаас хойш Хүй долоон худагт дэлгэр сайхан наадам болсоор байна.
-Нийслэл хот Хүй долоон худагт байсан хэрэг үү?
-Улаанбаатар хот маань 1719-1779 онд нийт 21 удаа нүүсэн байдаг. Энэ хугацаандаа 1736-1740 оны хооронд 4 жил, мөн 1772-1778 оны хооронд 6 жил, нийтдээ 10 жил одоогийн Хүй долоон худагт буурь сэлгэн суусан байдаг.
Бидний урилгыг хүлээн авч ярилцсан танд баярлалаа.
-
2017 оны 1 сарын 05
Улаанбаатар хотын агаарын бохирдлыг үүсгэгч хүчин зүйлсийн нэг нь гэр хорооллын нүүрс түлж байгаа өрхийн яндангийн утаа юм. Тиймээс утааг багасгах зорилгоор Засгийн газраас гэр хорооллын айл өрхүүдийн цахилгааны шөнийн буюу 21:00-06:00 цагийн хоорондох хэрэглээний төлбөрийг тэглэхээр болсон. Засгийн газрын энэ шийдвэрийг үр дүнтэй хэрэгжүүлэх, иргэдтэйгээ агаарын бохирдолын эсрэг хамтдаа тэмцэх ажлын хүрээнд Нийслэлийн засаг даргын тамгын газраас шөнөдөө дулаанаа хуримтлуулж, таван ханатай гэр төдийгүй 50 метр квадрат талбайг халаадаг төхөөрөмжийг хувийн хэвшлийнхэнтэй хамтран үнэ төлбөргүй хүлээлгэн өглөө.
Чингэлтэй дүүргийн 13 дугаар хорооны Сургуулийн 35-712 тоотод амьдардаг Б.Бадамынд Нийслэлийн засаг дарга бөгөөд Улаанбаатар хотын захирагч С.Батболд очлоо. Манайхны хэлдэгээр агаарын бохирдол хамгийн ихтэй голомтын бүсэд эднийх амьдардаг. 8х8 харьцаатай байшингаа нүүрсээр галладаг энэ айл жилдээ 400 гаруй мянган төгрөгийн нүүрс түлдэг гэнэ. Б.Бадамынд ХБНГУ-ын “Stiebel Eltron” фирмийн шөнийн дулаан хадгалагч төхөөрөмж өглөө. Энэхүү төхөөрөмж нь 6-8 цаг цахилгаанд залгаснаар нягтаршуулсан тоосгондоо дулаанаа нөөцөлж, 16-18 цаг цахилгаан зарцуулалгүйгээр дулаанаар хангадаг байна. 10-45 м2 талбайг халаах хүчин чадалтай аж. Өөрөөр хэлбэл, Б.Бадамынх нүүрс түлж, агаар бохирдуулалгүйгээр шөнийн тарифгүй буюу 21:00-06:00 цагийн хооронд төхөөрөмжөө залгаад маргааш нь өдөржингөө цахилгаан зарцуулалгүй, утаа гаргалгүйгээр дулаан байх боломжтой болно.
Нийслэлийн Засаг дарга С.Батболд хэлэхдээ “Нийслэлийн гэр хорооллын иргэдэд халаалтын шинэ төхөөрөмжийг ашиглах боломжийг бий болгох зайлшгүй шаардлага бий. Үүний нэг нь шөнийн дулаан хадгалагч гэж бид үзсэн. Халаагуурын үнийг хэрхэн бууруулж, иргэддээ яаж хөнгөлөлттэй нөхцөлөөр өгөх вэ гэдэг асуудлыг хотын зүгээс зохион байгуулах шаардлага гарч байна. Мэдээж ганц цахилгаанаар асуудлыг шийдэхгүй. Утаагүй түлш, сайн чанарын утаа бага гаргадаг зуухны асуудлыг ч шийдэх хэрэгтэй. Мөн эрх зүйн хувьд шинэчлэл хийхээр төлөвлөж байна.Үүнээс гадна халаагуур хэрэглээд эхлэхээр хүчдэлийн асуудал яригдана. Тиймээс Эрчим хүчний яамтай хамтраад гэр хорооллын цахилгааны шугамыг шинэчлэх шаардлагатай байгаа.” гэлээ.
Үүний дараа тус хорооны иргэн Д.Лхагвадоржийнд очиж, дулаан хуримтлуулж халаах “Тулгат” төхөөрөмжийг өглөө. Энэхүү төхөөрөмж нь мөн хоногийн 8 цагт дулаанаа хуримтлуулаад үлдсэн цагт нь цахилгаан зарцуулалгүйгээр дулаанаар хангах аж. Д.Лхагвадоржийнд өгсөн төхөөрөмж гэхэд зөвхөн монгол гэрт зориулан бүтээсэн загвар гэдгийг “Монватт” ХХК-ийнхан хэлсэн юм. Дулаан хуримтлуулж халаах төхөөрөмж нь автомат тохируулгатайн дээр температур мэдрэгчтэй учраас тасалгааны агаарын хэмд тааруулан автоматаар ажилладаг байна. Мөн “Тулгат” халаагуурын давуу тал нь дээрээ цахилгаан зуухтай учраас орчиноо дулаан болгохын дээр тухайн айл өрх хоол ундаа ч хийгээд идэх боломжтой гэдгийг “Монватт”-ынхан танилцууллаа.
Түүнчлэн өнгөрсөн жилээс хойш цахилгаан халаагуур ашиглаж, үр дүнг нь хүртэж байгаа айл өрхүүд бий. Ийм айлын нэг бол Чингэлтэй дүүргийн 12 дугаар хорооны иргэн Ц. Амарсанаагийнх юм. Өвөлдөө 1-2 машин нүүрс түлдэг байсан бол одоо халаах төхөөрөмж ашигласнаар эдийн засагт хэмнэлттэйгээс гадна нийслэл хотынхоо агаарыг бага ч гэсэн бохирдуулахгүй байгаадаа сэтгэл хангалуун байгаагаа Ц.Амарсанаа хотын удирдлагуудад ярьлаа. Шөнөдөө дулаанаа хуримтлуулж, өдрийн 8 цагийн турш дулаанаа барьдаг халаагуур сонголт ихтэй байгаа гэдгийг энэ төхөөрөмжийг нэвтрүүлж байгаа компанийн төлөөлөл ярьсан юм. Үнийн хувьд хичнээн метр квадрат талбайг халаахаас хамаардаг. Давуу тал нь шөнөдөө дулаанаа хуримтлуулдаг учраас эрчим хүчний үнэ өндөр гарна гэсэн ойлголт байхгүй. Шөнийн тэглэгдсэн тарифыг үр дүнтэй ашиглахад хэрэгтэй гэдгийг онцолж байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 1 сарын 05
Нийгмийн даатгалын салбарын хэмжээнд 2017 оныг Эерэг хандлага-чанартай үйлчилгээний жил болгон зарлах тухай Эрүүл мэнд, нийгмийн даатгалын ерөнхий газрын даргын тушаал энэ оны нэгдүгээр сарын 2-ны өдөр гарсан юм.
Нийгмийн даатгалын үйлчилгээг ажил олгогч, даатгуулагчдад чанартай түргэн шуурхай үзүүлэх, үйлчилгээний хүртээмж, үйлчлүүлэгчийн сэтгэл ханамжийг дээшлүүлэхэд анхааран ажиллана. Түүнчлэн байцаагч ажилтнуудын харилцааны болон үйлчилгээний соёл, мэргэжлийн мэдлэг, ур чадварыг сайжруулах, эерэг хандлагыг бий болгохоор зорьж байна.
Эерэг хандлага-чанартай үйлчилгээний жилийн хүрээнд Нийслэлийн эрүүл мэнд, нийгмийн даатгалын газар болон нийслэлийн есөн дүүргийн эрүүл мэнд, нийгмийн даатгалын хэлтсийн нийт 400 гаруй ажилтан албан хаагчид энэхүү зорилгыг хэрэгжүүлэн, идэвх санаачлагатай ажиллана.
Дашрамд дуулгахад өнгөрсөн жил байгууллагын соёлыг төлөвшүүлэх, нийгмийн даатгалын үйлчилгээний шуурхай, нээлттэй, ил тод байдлыг хангах чиглэлд анхааран ажиллаж, Олон улсын чанарын удирдлагын тогтолцоо ISO 9001:2015 стандартийг төрийн байгууллагуудаас анх удаа нийслэлийн Баянгол, Баянзүрх, Чингэлтэй, Хан-Уул дүүргийн эрүүл мэнд, нийгмийн даатгалын хэлтсүүд амжилттай нэвтрүүлсэн талаар Нийслэлийн эрүүл мэнд, нийгмийн даатгалын газраас мэдээллээ.
-
2017 оны 1 сарын 05
Нийслэлийн Засаг дарга бөгөөд Улаанбаатар хотын захирагч С.Батболд Япон Улсаас Монгол Улсад суугаа Онц бөгөөд Бүрэн Эрхт Элчин сайд Масато Такаокатай уулзлаа. Хотын даргын зүгээс ноён Масато Такаокаг Элчин сайдаар томилогдсонд баяр хүргээд Улаанбаатар хотод үйл ажиллагаа явуулахад бүхий л талаар тусалж дэмжихээ илэрхийллээ.
Япон Улсаас Монгол Улсад суугаа Онц бөгөөд Бүрэн Эрхт Элчин сайд Масато Такаока “Миний бие өнгөрсөн оны төгсгөлд Монгол Улсад Элчин сайдаар томилогдон ирлээ. Ажлаа эхлээд удалгүй Улаанбаатар хотын даргатай уулзаж байгаадаа баяртай байна. Япон, Монгол Улс хоорондын хамтын ажиллагаа олон жилийн туршид нягт нямбай, халуун дотно байж ирсэн. Энэ жил хоёр улсын хооронд дипломат харилцаа тогтоосны 45 жилийн ой тохиож байна. Бидний зүгээс стратегийн түншлэлийн харилцааг илүү өндөр түвшинд хүргэх хүсэлтэй байгаа.” гэлээ.
Хотын дарга С.Батболд “10 жилийн өмнө Япон улстай шинэ онгоцны буудал барих талаар ярилцаж байсан. Тэгвэл өнөөдөр Улаанбаатар хотын шинэ нисэх онгоцны буудал баригдаж, удахгүй ашиглалтад орох гэж байна. Энэ бол хоёр орны эдийн засгийн хамтын ажиллагааны хамгийн том илрэл. Ирэх жилүүдэд бид харилцаагаа илүү шинэ шатанд гаргах бодолтой байгаа.” гэсэн юм.
Мөн энэ үеэр Нийслэлийн Засаг дарга бөгөөд Улаанбаатар хотын захирагч С.Батболд Монгол, Япон улс хооронд дипломат харилцаа тогтоосны 45 жилийн ойн хүрээнд Улаанбаатар хот Токио хоттой харилцаагаа өргөжүүлж, Ах дүү хотуудын харилцаатай болох саналыг Элчин сайдад албан ёсоор тавилаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 1 сарын 05
ШШГЕГ-ын харъяа, цагдан хорих 461 дүгээр ангийн хашааны гадна байрлах бохирын худгаас гар буу олджээ.
-
2017 оны 1 сарын 05
Монгол Улсын Их Хурлын гишүүн, ЗГ-ын гишүүн, Дэд бүтцийн хөгжлийн сайдын үүрэг гүйцэтгэгч Санжаасүрэнгийн Зоригийн амь насыг бүрэлгэсэн хэргийн шүүх хурал өнгөрсөн сард болсон.
-
2017 оны 1 сарын 05
Амьсгалын замын цочмог халдварт өвчлөлийн дийлэнх хувийг бага насны хүүхдүүд эзэлж байгаа энэ үед урьдчилан сэргийлэх зөвлөмж, өвчний шинж тэмдгийг таних арга, эмчилгээний төрлүүдээс эцэг эхчүүд маань мэдэж авах нь тун чухал юм. Нийслэлийн эрүүл мэндийн газраас энэ удаад хатгалгаа өвчний тухай ерөнхий ойлголт, урьдчилан сэргийлэх дадал хэвшил, уг өвчнөөр өвчилсөн эсэхийг гэрийн нөхцөлд таних арга, хүүхдийн амьсгалын тоог хэрхэн зөв тоолох зэргийг тус зөвлөмжөөр дамжуулан хүргэлээ.
Хатгалгаа гэж юу вэ?
Ихэвчлэн ханиад томуу хүрсний дараа буюу даарсны улмаас хүний биеийн дархлаа суларч, амьсгалын замд байх хэвийн болон эмгэг бичил биетээр уушгины эд үрэвсэхийг хатгалгаа өвчин гэнэ.
Хүүхдээ хатгалгаа өвчнөөс хэрхэн хамгаалах вэ?
Хүүхдээ төрөнгүүт нэг цагийн дотор ангир уургийг амлуулах нь чухал. Ангир уураг нь ханиад томуу, хатгалгаа өвчнөөс хамгаалдаг бодис агуулдаг, байгалиас заяасан вакцин юм.
Хүүхдээ зургаан сар хүртэл эхийн сүүгээр дагнан хооллож, хоёр нас хүртэл хөхүүлэхийн зэрэгцээ насанд нь тохирсон шим тэжээл бүхий нэмэгдэл хоолоор хооллоорой.
Хатгалгаагаар өвчлөх эрсдлүүд:
Бага насны хүүхдийн дархлаа бүрэлдэж гүйцээгүй байдаг тул өвчлөх эрсдэлтэй байдаг.
Хүүхдийг хэт бэгнэж гадна орчноос байнга тусгаарласнаар биеийн дасан зохицол нь алдагдаж амархан даарч бээрэх, олны дунд орох болон цэцэрлэгт явах үедээ өвчлөх эрсдэл өндөр байна.
Ангир уургаа амлаагүй, эхийн сүүгээр хооллоогүй хүүхэд өвчлөлд өртөмтгий байх нь элбэг.
Хүүхдээ хатгалгаа өвчнөөс хэрхэн сэргийлэх вэ?
Товлолын дагуу вакцинуудыг хүүхэддээ тогтмол хийлгэж байх нь уушгины хатгалгаагаар өвчлөх эрсдлийг бууруулдаг. Мөн хатгалгааны эсрэг пневмококкийн вакцин нь уг өвчлөлөөс урьдчилан сэргийлэх ач холбогдолтой юм.
Гэрийнхээ хаалга, цонхыг ойр ойрхон нээж, өдрийн цагаар цэвэр агаар оруулж байгаарай. Дотоод орчны агаарыг сэлгэж, нян бактерыг зайлуулах нь тун чухал. Хүүхдийн орчинд тамхи бүү тат. Элдэв резин, хуванцар, хог түлж шатаах нь биеийн эрхтэн системийг хордуулж хорт хавдар, амьсгалын замын хүнд өвчнүүдийг үүсгэдэг. Зөвхөн зориулалтын түлш хэрэглэх нь зүйтэй.
Эцэг эхчүүд хүүхдээ асарч, хооллох болон бие зассаны дараа гараа сайтар савандаж угаах дадлыг мөрдсөнөөр хатгалгаа өвчнөөс сэргийлэх боломжтой.
Хатгалгаа өвчнөөр өвчилсөн эсэхийг гэрийн нөхцөлд таних арга:
Ханиалгах
Халуурах
Нус гоожих
Тайван бус болох
Хоолонд дургүй болох
Заримдаа амьсгаадах
Цээж шуугих зэрэг шинж тэмдэг илэрдэг бөгөөд үүнийг ХАНИАД ШУУХИНАА гэж үздэг.
Дээрх шинжээс гадна амьсгал олширох, цээж хонхолзох эсвэл амьсгал саадтай болох шинж тэмдэг ажиглагдвал УУШГИНЫ ХАТГАЛГАА гэж үзнэ. Хатгалгаа нь хүүхдийн нас, биеийн онцлог, өвчин үүсгэгч нянгаас хамаарч хүүхэд бүрт өөр өөрөөр илэрдэг тул эрүүл мэндийн байгууллагад хандаарай.
Хүүхдийн амьсгалыг хэрхэн тоолох вэ?
Хүүхдийн амьсгалын тоо нэг минутад хэвийн үеийнхээсээ олон болохыг АМЬСГАЛ ОЛШИРОХ гэнэ. Үүнд:
2 сар хүрээгүй хүүхдэд 60 ба түүнээс олон
2-12 сар хүртэлх хүүхдэд 50 ба түүнээс олон
12 сараас 5 нас хүртэлх хүүхдэд 40 ба түүнээс олон болно.
Та хүүхдээ уйлаагүй, хөхүүлээгүй, тайван үед амьсгалыг нь 1 минутын турш тоолоорой. Унтаж байхад нь тоолбол бүр сайн.
Секундын зүүтэй юмуу эсвэл электрон цаг ашиглана.
Хүүхдийн хэвлий дээр гараа зөөлөн тавьж үзээрэй. Амьсгал авахад нь хэвлий төмбийж, гаргах үед нь цааш болох бөгөөд үүнийг 1 амьсгал гэж тоолохыг анхаарах хэрэгтэй.
Цээж хонхолзох гэдэг нь амьсгал авах үед хэвлий төмбийж байхад өрцний хэсгээр цааш хонхойхыг хэлнэ. Хэрэв хатгалгаа өвчний шинж тэмдэг илэрвэл эмнэлэгт ЯАРАЛТАЙ хандаарай.
Ханиадыг гэртээ яаж эмчлэх вэ?
Хүүхэд хатгалгаагүй, ханиадтай байвал дараахи эмчилгээг хийнэ.
Ханиалга намдаах зөөлөн чанарын эм бэлдмэл /аньсны ханд, читамон, чигатуссин зэрэг/ уулгаарай.
Хөлөргөхгүй, дулаан хувцаслах нь зүйтэй.
Хамар нь битүүрч байвал ойр ойрхон цэвэрлэх хэрэгтэй. Хамрын хоёр нүхэнд зэрэг хөвөн хийж болохгүй. Хөвөнгөө сайтар имэрч, хамрын нүхэнд эргүүлэх хөдөлгөөнөөр оруулан зөөлөн татаж авна. Эм дусааж болохгүй.
Ханиад шуухинаа даамжирч, хатгалгаа өвчний шинж тэмдэг илэрч байгаа эсэхийг ажиглаарай.
Өрх сум, багийн эмчдээ үзүүлж хяналтанд байх бөгөөд хэдийд эргэж үзүүлэх талаар эмчээсээ ЗААВАЛ асуугаарай.
Хүүхэд өвчилсөн үед:
Хүүхдээ сайтар хооллох хэрэгтэй. Эх хүүхдийн ягаан дэвтэр дэх зааврын дагуу хоолыг бэлдэж, бага хэмжээгээр ойр ойрхон хооллоорой.
Халуун бүлээн шингэн сайн уулгана. Халуурах, амьсгаадах зэргээс улбаалан шингэн дутагддаг.
Хүүхдээ өвчтэй үед сайтар анхаарч, асарч сувилаарай.
ДАРААХ ШИНЖ ТЭМДГИЙГ АЖИГЛААРАЙ
Хүүхэд амьсгалж чадахгүй, ойр ойрхон амьсгаадах
Нойрмоглох, сэрээхэд хэцүү болох, эсвэл сэрэхгүй байх
Бөөлжих
Шингэн зүйл уухдаа дургүй буюу ууж чадахгүй байх зэрэг санаа зовоосон асуудал гарах
Халууныг зургаан цаг тутамд хэмжиж, 38.5 градус буюу түүнээс дээш байвал эмчийн зааврын дагуу халуун буулгах эм уулгана.
ЗӨВХӨН хатгалгаа өвчний үед антибиотик буюу амоксициллиныг эмчийн зааврын дагуу уулгах хэрэгтэй.
Гэр орон тань хотын төвөөс зайдуу бол парацетамол, амоксициллин, шингэн сэлбэх давс зэрэг эмийн нөөцтэй байх бөгөөд хугацаа алдалгүй тусламж хүргэхэд тустай.
Гэрээр эмчлэх эхний аргуудын дараа биеийн байдал дээрдэхгүй бол эмнэлэгт яаралтай хандаарай.
Бага насны хүүхэдтэй айл бүр халууны шилтэй байх ёстой.
-
2017 оны 1 сарын 05
Дархан-Уул аймгийн Онцгой байдлын газрын Гал түймэр унтраах, аврах 22 дугаар ангийн ахлагч бүрэлдэхүүн үүрийн жингээс үдшийн бүрий хүртэл амсхийх завгүй ажиллаж, хотынхоо өнгө үзэмжийн төлөө зүтгэж явдаг зам талбайн үйлчлэгч нарт сэтгэлийн дэм өгч, халуун хоол, цайгаар дайллаа.
01-05
Албан хаагчид тус аймгийн Нийтийн аж ахуй, үйлчилгээний газрын зам талбайн 43 үйлчлэгчийг “Өглөөний цай”-гаар дайлахын зэрэгцээ замын цас цэвэрлэж иргэдэд учирч болзошгүй авто ослын болон олон төрлийн гэмтэл бэртлээс урьдчилан сэргийлсэн нийгмийн сайн үйлсийн ажилд хувь нэмрээ оруулав.
01-05-2
Тэдний энэхүү сайн санааны үйлсийг тус Онцгой байдлын газрын бэлтгэл ахлах ахлагч Л.Мөнхнасан дэмжиж, дөрвөн үйлчлэгчид дулаан хувцас бэлэглэсэн юм гэж Дархан-Уул аймгийн Онцгой байдлын газраас мэдээллээ.
01-05-1
-
2017 оны 1 сарын 05
Улаанбаатар хотын утаа гамшгийн хэмжээнд очсон тул эцэг эхчүүд бага ангийн сурагчдын амралтыг сунгах хүсэлт гаргасан билээ.
Энэ хүрээнд УИХ-ын зарим гишүүд сурагчдын амралтыг сунгаж, ирэх хавар долдугаар сар хүртэл хичээллэх санал гаргасныг Засгийн газрын өчигдрийн хуралдаанаар хэлэлцэж, сурагчдын амралтыг сунгах шаардлагагүй гэсэн дүгнэлт гаргажээ.
-
2017 оны 1 сарын 05
Улсын Дээд шүүх 2016 онд эрүү, иргэн, захиргааны нийт 2726 хэрэг хүлээн авч, шүүх хуралдаанаар 2250 хэрэг хянан шийдвэрлэжээ. Хянан шийдвэрлэсэн хэргийн 65.3 хувь нь иргэний, 15 хувь нь эрүүгийн, 19.7 хувь нь захиргааны хэрэг байна.
Эрүүгийн шүүн таслах ажлын талаар
Улсын Дээд шүүхийн Эрүүгийн хэргийн танхим нийт 454 хэрэг хүлээн авч, 337 хэргийг шүүх хуралдаанаар хянан шийдвэрлэж, 88 хэргийг албан бичгээр буцааж, 23 хэргийг Ерөнхий шүүгчийн ажлын албанд шилжүүлжээ.
Эрүүгийн хэргийн танхимын хяналтын шатны шүүх хуралдаан нийт 69 өдөр хуралдаж, өдөрт дунджаар 5 хэрэг хэлэлцжээ. Эрүүгийн хэргийн танхимд хяналтын шатны журмаар ирүүлсэн хэргээс нэг шүүгчид 85 хэрэг ногдож байна.
Хяналтын журмаар шүүх хуралдаанаар хянан шийдвэрлэгдсэн 337 хэргийн 49.5 хувь буюу 167 хэргийн тогтоол, магадлалыг хэвээр үлдээж, гомдол, эсэргүүцлийг хэрэгсэхгүй болгож, 24 хувь буюу 81 хэргийн тогтоол, магадлалд өөрчлөлт оруулж, 26.4 хувь буюу 89 хэргийн тогтоол, магадлалыг хүчингүй болгожээ.
Хүчингүй болгосон 89 хэргийн 57.3 хувь буюу 51 хэргийг нэмэлт хэрэг бүртгэлт, мөрдөн байцаалт хийлгэхээр прокурорт, 22.4 хувь буюу 20 хэргийг шүүхээр дахин хэлэлцүүлэхээр буцааж, 7.8 хувь буюу 7 хэргийг хэрэгсэхгүй болгож, 12.3 хувь буюу 11 хэргийн шийтгэх тогтоолыг хэвээр үлдээж, магадлалыг хүчингүй болгожээ.
Өмнөх онтой харьцуулахад хүлээн авсан эрүүгийн хэрэг 59-өөр буюу 11.5 хувиар, хяналтын шатны шүүх хуралдаанаар шийдвэрлэсэн хэрэг 46-аар буюу 12,0 хувиар буурч, нэг шүүгчид ногдох хэрэг 17-оор буюу 25 хувиар өссөн байна.
Иргэний шүүн таслах ажиллагааны талаар
Улсын Дээд шүүхийн Иргэний хэргийн танхим нийт 1711 хэрэг хүлээн авч, 1469 хэргийг шүүх хуралдаанаар хянан шийдвэрлэж, 72 хэргийг Ерөнхий шүүгчийн ажлын албанд шилжүүлж, 55 хэргийг шинээр илэрсэн нөхцөл байдалд тооцуулахаар хэлэлцэж, 46 хэргийг хяналтын журмаар хэлэлцэхээс татгалзаж, 13 хэргийн харьяаллыг тогтоожээ.
Иргэний хэргийн танхимын хяналтын шатны шүүх хуралдаан нийт 95 өдөр хуралдаж, өдөрт дунджаар 16 хэрэг хэлэлцжээ.
Иргэний хэргийн танхимд хяналтын шатны журмаар ирүүлсэн 1639 хэргээс нэг шүүгчид 234 хэрэг ногдож байна.
Хяналтын журмаар хэлэлцэгдсэн иргэний 1469 хэргийн 54 хувь буюу 793 хэргийн шийдвэр, магадлалыг хэвээр үлдээж, гомдлыг хангахгүй орхиж, 12 хувь буюу 177 хэргийн шийдвэр, магадлалыг хүчингүй болгож, дахин хэлэлцүүлэхээр буцааж, 20.6 хувь буюу 303 хэргийн шийдвэр, магадлалд нэмэлт, өөрчлөлт оруулж, 10.7 хувь буюу 158 хэргийн магадлалыг бүхэлд нь буюу зарим хэсгийг хүчингүй болгож, шийдвэрийг хэвээр үлдээх буюу өөрчилж, 2.7 хувь буюу 38 хэргийн шийдвэр, магадлалыг хүчингүй болгож, хэргийг буюу нэхэмжлэлийг хэрэгсэхгүй болгосон байна.
Өмнөх онтой харьцуулахад хүлээн авсан иргэний хэрэг 316 хэргээр буюу 22.7 хувиар, хяналтын шатны шүүх хуралдаанаар шийдвэрлэсэн хэрэг 261 хэргээр буюу 21.6 хувиар, нэг шүүгчид ногдох хэргийн ачаалал 83 хэргээр буюу 55 хувиар тус тус өссөн байна.
Хяналтын шатны иргэний хэргийн шүүх хуралдаанаар шийдвэрлэсэн 1469 хэргийг эрх зүйн төрлөөр авч үзвэл Иргэний хуулиар 997, Хөдөлмөрийн тухай хуулиар 296, Шүүхийн шийдвэр гүйцэтгэх тухай хуулиар 68, Гэр бүлийн тухай хуулиар 49, Иргэний хэрэг шүүхэд хянан шийдвэрлэх тухай хуулиар 4, бусад хуулиар 55 хэргийг хянан шийдвэрлэжээ.
Захиргааны шүүн таслах ажлын талаар
Улсын Дээд шүүхийн Захиргааны хэргийн танхим нийт 561 хэрэг хүлээн авч, 444 хэргийг хяналтын шатны захиргааны хэргийн шүүх хуралдаанаар, 48 хэргийг хуралдаанд оролцуулахгүйгээр, гомдлыг хүлээн авахаас татгалзсан шүүгчийн захирамжид гомдол гаргасан 4 хэргийг, шинээр илэрсэн нөхцөл байдлын улмаас хянуулах тухай 21 хүсэлтийг шийдвэрлэж, 31 хэргийг Ерөнхий шүүгчийн ажлын албанд шилжүүлжээ.
Захиргааны хэргийн танхимын хяналтын шатны шүүх хуралдаан нийт 49 өдөр хуралдаж, өдөрт дунджаар 9 хэрэг хэлэлцжээ.
Захиргааны хэргийн танхимд хяналтын шатны журмаар ирүүлсэн 481 хэргээс нэг шүүгчид 96 хэрэг тус тус ногдож байна.
Хяналтын шатны журмаар хэлэлцэгдсэн захиргааны 444 хэргийн 66.2 хувь буюу 294 хэргийн шийдвэр, магадлалыг хэвээр үлдээж, гомдлыг хангахгүй орхиж, 14.4 хувь буюу 64 хэргийн шийдвэр, магадлалд өөрчлөлт оруулж, 19.3 хувь буюу 86 хэргийн шийдвэр, магадлалыг хүчингүй болгожээ.
Хүчингүй болгосон 86 хэргийн 21 хувь буюу 18 хэргийг дахин хэлэлцүүлэхээр анхан шатны шүүхэд буцааж, 26.7 хувь буюу 23 хэргийн нэхэмжлэлийг хэрэгсэхгүй болгож, 2.3 хувь буюу 2 хэргийг хэрэгсэхгүй болгож, 3.4 хувь буюу 3 хэргийн нэхэмжлэлийг хангасан, 46.5 хувь буюу 40 хэргийн магадлал хүчингүй, шийдвэрийг хэвээр үлдээх буюу өөрчлөлт оруулсан байна.
Өмнөх онтой харьцуулахад хүлээн авсан захиргааны хэрэг 120-оор буюу 17 хувиар, хяналтын шатны шүүх хуралдаанаар хянан шийдвэрлэсэн хэрэг 82-оор буюу 22.6 хувиар, нэг шүүгчид ногдох хэрэг 40-өөр буюу 71.4 хувиар өссөн байна.
Хяналтын шатны захиргааны хэргийн шүүх хуралдаанаар шийдвэрлэсэн 444 хэргийг эрх зүйн төрлөөр авч үзвэл Газрын маргаан 110, Төрийн албаны маргаан 88, Ашигт малтмалын маргаан 49, Татварын маргаан 46, Сонгуулийн маргаан 16, Үл хөдлөх эд хөрөнгийн улсын бүртгэлтэй холбоотой маргаан 15, Шүүхийн Ёс зүйн хорооны магадлалтай 14, Нийгмийн даатгалтай холбоотой 9, Төрийн хяналт шалгалттай холбоотой 8, Төрийн болон орон нутгийн өмчийн тухай маргаан 5, бусад маргаан 84 байна.
-
2017 оны 1 сарын 05
Агаарын бохирдлын оргил үе эхэлсэнтэй холбогдуулан 0-5 хүртэлх насны хүүхдэд 11 төрлийн эм үнэгүй олгох тухай асуудлыг эцэслэн шийдвэрлээгүй байгаа талаар ЭМЯ-наас мэдэгдэв.
Тэрбээр, ”зарим хэвлэл мэдээллийн хэрэгслээр 0-5 хүртэлх насны хүүхдэд олгох 11 нэр төрлийн эмийн жагсаалт, санхүүжилт зэргийн талаар мэдээлэл гарсан. Одоогоор ЭМЯ болон ЭМНДЕГ-аас олгох эмийн жагсаалт, санхүүжилт зэргийг шийдвэрлээгүй байгаа. Тиймээс хэвлэл мэдээллийн хэрэгслээр гарсан эмийн нэрсийн жагсаалт үндэслэлгүй. Эмийн жагсаалт гарсан даруйд олон нийтэд мэдээлнэ” гэв.
-
2017 оны 1 сарын 05
”Утааны эсрэг ээжүүд” холбооноос санаачлан өнгөрсөн арванхоёрдугаар сарын 26-ны өдөр жагсссан. Уг жагсаалаар эцэг, эхчүүд утааны эсрэг яаралтай арга хэмжээ авахыг төр засгаас шаардсан 900 хүний өргөдөл цуглуулж Өргөдлийн байнгын хороонд хүргүүлээд байгаа юм. Гэвч тэдний шаардлагад хариу ирүүлээгүй тул уг холбооны санаачлагаар дахин жагсаал зохион байгууулахаар болжээ.
Жагсаал энэ сарын 28-ны бямба гарагт 12.00 цагт Сүхбаатарын талбайд болох юм байна. Тэд энэ удаад жагсаалаа “Боож үхлээ” хэмээн нэрлэж, утаанаас болж эрүүл мэндээрээ хохирч буй хэн бүхнийг энэхүү жагсаалд оролцохыг уриалав.
-
2017 оны 1 сарын 05
Нийслэлийн агаарын бохирдлыг бууруулах зорилгоор энэ сарын 1-ээс эхлэн дөрөвдүгээр сарын 1-ийг хүртэл шөнийн цагаар гэр хорооллын айл өрхөд цахилгааны үнэ тарифын хөнгөлөлт үзүүлэх журмыг баталсан.
Энэ шийдвэртэй холбогдуулан өнөөдөр Нийслэлийн удирдлагууд гэр хорооллын зарим айл өрхүүдэд цахилгаан халаагуур өгөхөөр болжээ. Цахилгааны хөнгөлөлтөд хамрагдах айлууд электрон тоолууртай байх шаардлагатай юм.
-
2017 оны 1 сарын 05
Өнөөдрийн байдлаар манай орны нийт нутгийн 70 гаруй хувьд цасан бүрхүүл тогтсоноос 2017 оны 01 дүгээр сарын 03-ны өдрийн байдлаар 17 аймгийн 127 сум, нийслэлийн 2 дүүрэгт өвөлжилт хүндэрсэн.
Ялангуяа баруун, төв, зүүн аймгуудын зарим газраар тал газраа 25-35 см, уулархаг газар, гуу жалгандаа 40-90 см-ийн зузаан нягтарч хатуурсан цастайгаас бод, бог малын хошуу, туруу, шилбэ халцарсан, аргал, янгир зэрэг ховор ан амьтад идэш хоолгүйн улмаас уулнаас буух, цасанд дарагдах явдал зэрэг хүндрэл гарсан.
Улсын хэмжээнд 61.5 сая мал /2016 оны жилийн эцсийн мал тооллогын урьдчилсан дүн/ өвөлжиж байгаагаас аймаг, сум дундын, тусгай хэрэгцээний болон хилийн зурвас отрын бүс нутгаар 16148 малчин өрхөд 6.6 сая толгой мал өвөлжинө.
Их цас, цасан шуурганы үед Архангай, Баян-Өлгий, Баянхонгор, Булган, Дорнод, Говь-Алтай, Завхан, Увс, Ховд, Хөвсгөл зэрэг 14 аймгийн 88 суманд 142 даваа, 30 тал хөндий газарт хүндрэл бэрхшээл үүсдэг тул гамшгийн үед ажиллах хүн хүч, техник хэрэгслийн бэлтгэл, бэлэн байдлыг хангасан.
Цаашид Баян-Өлгий, Булган, Дорнод, Завхан, Сүхбаатар, Увс, Ховд, Хөвсгөл, Хэнтий аймгуудад нэмж цас орвол цагийн байдал улам хүндрэх төлөвтэй. Мөн Ховд, Завхан, Хөвсгөл аймгуудын уулархаг нутгаар өвөлжиж байсан малчид цас их орж байгаа тул мал сүргээ тарга тэвээрэг алдаагүй байгаа дээрээ говийн бүс рүү отор нүүдэл хийх ажлыг аймаг, орон нутгийн удирдлагуудтай хамтран зохион байгуулж байна.
Үүссэн нөхцөл байдалтай холбогдуулан орон нутгийн удирдлагууд, малчдын зүгээс бага насны хүүхэд, малчдад дархлаа сайжруулах, биеийн эсэргүүцэл дэмжих амин дэм, илчлэг, тэжээллэг хоол хүнс олгох, улсын нөөцийн өвс, тэжээлийн үнийг хямдруулах, эрүүл мэндийн тусламж үйлчилгээ үзүүлэх автомашин шинээр олгох, цасанд суусан, боогдсон, эрэн хайх, аврах ажиллагааны дуудлага нэмэгдэж байгаа тул шатахууны асуудлыг шийдвэрлэх, цасанд хаагдсан зам, давааг нээх зориулалтаар ачигч, түрэгч ковш, туулц сайтай автомашин олгож өгөх хүсэлтүүдийг ирүүлсээр байна.
Өвөлжилтийн хүндрэлийг даван туулахад Монгол Улсын Засгийн газраас 2016 оны 11 дүгээр сарын 28-ны өдрийн 163 дугаар тогтоолоор 1.1 тэрбум төгрөгийг 12 аймагт (Архангай, Баян-Өлгий, Булган, Дорнод, Завхан, Сэлэнгэ, Сүхбаатар, Төв, Увс, Ховд, Хөвсгөл, Хэнтий), мөн оны 11 дүгээр сарын 23-ны өдрийн 160 дугаар тогтоолоор 21 аймагт нийт 630.0 сая төгрөгийн үнэ бүхий хүн эмнэлгийн автомашиныг тус тус олгож, урьдчилан сэргийлэх ажлыг эртнээс зохион байгуулах, өвөлжилтийг хохирол багатай даван туулах зорилгоор олон улсын байгууллагаас дэмжлэг, туслалцаа хүссэн.
Цаг уур, орчны шинжилгээний газрын ирүүлсэн мэдээгээр 2017 оны 1, 2 дугаар сард цас ихтэй газруудаар олон жилийн дунджаас ахиу хур тунадас орж, хүйтэн байх төлөвтэй байна.
Өвөлжилт хүндэрсэн үед Улсын нөөцөөс татан байршуулах өвс тэжээлийн аюулгүйн нөөцийн бэлэн байдлыг бүрэн хангасан гэж Онцгой байдлын ерөнхий газраас мэдээллээ.
-
2017 оны 1 сарын 04
“Петрочайна Дачин Тамсаг” компани олборлосон газрын тосоо гаргадаг Баянхошуу боомт энэ оны нэгдүгээр сарын 1-нээс хаагдсаныг Гадаад харилцааны яам Хилийн хэлтсийн дарга Д.Ганболд мэдээллээ.
-
2017 оны 1 сарын 04
Аялал жуулчлалын салбараа хөгжүүлснээр эдийн засийг төрөлжүүлэх, гадаад валютын урсгал, экспортыг эрс нэмэгдүүлэх замаар тогтвортой, ногоон хөгжлийг бүрдүүлэх боломж бүрдэнэ. Иймээс “Аялал жуулчлалын хөгжлийн төв” төрийн өмчит аж ахуйн тооцоотой үйлдвэрийн газар байгуулах Засгийн газрын тогтоол баталлаа.
-
2017 оны 1 сарын 04
Гадаадын зочид, жуулчдын урсгалыг нэмэгдүүлэх зорилгоор Засгийн газар хоорондын болон салбарын яам хоорондын Санамж бичиг, гэрээг үндэслэн аялал жуулчлалын компаниудаар зуучлуулан ирэх гадаадын бүлэг жуулчдад Монгол Улсад зорчих визийн хөнгөлөлттэй нөхцөл олгох Засгийн газрын тогтоол баталлаа.
