Хойд Солонгос энэ сарын 12-16-ны хооронд алсын тусгалт “Унха 3” /Сүүн зам 3/ пуужинг хөөргөхөө мэдэгдсэн билээ.

    “Сүүн зам 3” пуужинг хөөргөх бэлтгэлийг бүрэн хийсэн бөгөөд үүнийгээ баталгаажуулахын тулд Хойд Солонгосын тал олон улсын сэтгүүлчдийг хиймэл дагуулын төвдөө урьж танилцуулга хийсэн юм.

    Энэ пуужинг Америк тивийг бүхэлд нь устгах чадалтай хэмээн олон улсын зарим хэвлэл шуугиж байгаа. Пуужинг хөөргөснөөрөө Хойд Солонгос цөмийн салбартаа хэр их хүчтэй гэдгээ олон улсад харуулж байгаа юм. Хэдий тийм ч пуужин хөөргөлт Хойд Солонгост олон эсрэг асуудал авчирчээ.

    Энэ сарын олон улсын үйл явдлын гол сэдэв болж буй “Сүүн зам 3” пуужинг хөөргөхөд Хойд Солонгос 850 сая ам.доллар зарцуулжээ. Энэ нь тус улс 19 сая өлсгөлөн иргэнээ бүтэн жилийн турш хооллох мөнгө юм. Албан ёсоор зардлын тоог 850 сая ам.доллар гэж мэдээлсэн боловч үүнээс хэд дахин их мөнгийг зарцуулсан хэмээн олон улсын ажиглагчид дүгнэжээ. Хойд Солонгосын хэдэн мянган иргэн өлсгөлөнд нэрвэгдээд байхад ийм их зардлаар пуужин хөөргөж байгаа нь тус улсын ард түмнийг улам өлсгөх болно.

    Пуужин хөөргөх шийдвэрээс болж өнгөрсөн сард хийсэн тохиролцооноосоо АНУ татгалзаж Хойд Солонгост хүргэх 240 мянган тонн хүнсний тусламжаа тээвэрлэхийг зогсоогоод байна.  Энэ үйлдлээс тус улсыг “тохиролцооноосоо буцдаг, үл итгэж болох” гэж олон улс дүгнэж байна.

     “Сүүн зам 3” пуужинг хөөргөвөл замд нь устгах тухайгаа ОХУ болон Япон улсууд албан ёсоор мэдэгдээд байна. Японы баруун хэсэг буюу Окинава хотын дээгүүр “Сүүн зам 3” пуужин өнгөрөх үед өөрийн нутаг дэсвгэр хэмээн үзэж сөнөөнө гэдгээ Япон улс мэдэгдэж, бэлтгэл ажлаа дуусч байгаа. Түүнчлэн агаарын хилээр нь дайран өнгөрөх магадлалтай улс оронд пуужингийн хаягдал унахаас сэрэмжилж байгаа Филлипин тэргүүтэй улсууд ч байна. Энэ пуужингаас болж Хойд Солонгос эдгээр улсуудтай цаашид найрамдах, харилцаа тогтоох хэцүү боллоо. Хойд Солонгосын туршилт ингээд дуусахгүй учир дахин их хэмжээний зардал гарсаар, ард иргэд нь илүү их өлссөөр л байх болно. Пуужин хөөргөх шийдвэр Хойд Солонгосыг улам ядуу, итгэлгүй, нөхөрлөлгүй, өлсгөлөн болголоо. 

Б.Билэгт