Сүүлийн үед гэмт хэргийн гаралт ихсэж, онц хэрцгийгээр хөнөөх хэрэг их гарч байна. Өчигдөр гэхэд төрсөн эхийгээ онц хэрцгийгээр хөнөөсөн хэрэг гарсан юм. Энэ талаар ЦЕГ-ын Хэвлэл мэдээллийн төвийн ажилтан, цагдаагийн дэслэгч Б.Саруултуяагаас тодрууллаа. -Хан-уул дүүрэгт гарсан хэргийн талаар тодруулах гэсэн юм?
-Энэ сарын 9-10-нд шилжих шөнө хоёр ч хүн амины хэрэг бүртгэгдсэн байгаа. Баянгол дүүргийн аравдугаар хорооны нутаг дэвсгэрт архи уусан этгээдүүд нэгнийхээ амийг хөнөөсөн. Мөн Хан-Уул дүүргийн хоёрдугаар хорооны Нэхмэлийн нутаг дэвсгэрт оршин суух 19 настай Х ээж болох 45 настай О-гийн амь насыг онц хэрцгийгээр хөнөөсөн. Гэмт этгээдийг цагдан саатуулж, мөрдөн шалгах ажиллагааг үргэлжлүүлж байна.
-Ямар учраас хэргийг үйлдсэн юм бол?
-Урьдчилсан байдлаар ээжийгээ байнга архи уудаг хэмээн хохироосон байж болзошгүй хэмээн таамаглаж байгаа. Хурц иртэй зүйлээр долоон удаа хутгалж хөнөөсөн байсан.
-Өнгөрсөн шөнө хэргийн гаралт ямар байв?
-Өнгөрсөн шөнө хүний амь насыг санаатайгаар хохироосон нэг хэрэг бүртгэгдэн шалгагдаж байна. Чингэлтэй дүүргийн зургадугаар хорооны нутаг дэвсгэрт гадны нөлөөтэй байдлаар амь нас нь хохирсон тэнэмэл амьдралтай байж болзошгүй хүний цогцос олдсон. Хэргийг шалгаж байгаа. Мөн Сүхбаатар дүүргийн 13 дугаар хорооны нутаг дэвсгэрт найман настай О-г хүнсний мухлагт ороод гарахад нь тус дүүргийн оршин суугч 56 настай Ж гэгч нь согтуурсан үедээ сүрдүүлж хүчирхийлсэн хэрэг гарсан. Гэмт этгээдийг цагдан саатуулж, мөрдөн байцаалтын ажиллагааг явуулж байна.
-Ер нь сүүлийн үед бага насны хүүхдийг хүчиндэх хэрэг их гарах болж?
-Эцэг эхчүүдэд хандаж хэлэхэд бага насны хүүхдүүдийг хараа хяналтгүйгээр ганцааранг нь явуулахгүй байхыг анхааруулж байна. Өнгөрсөн хоногт мөн 12 насны гурван хүүхдийг цаасны хутаг тулган айлаг сүрдүүлж, бэлгийн дур хүслээ ёс бусаар хангасан хэрэг гарсан байгаа.
Б.Чимэг
