УИХ-ын гишүүн Х.Баттулга “MCS”, “Энержи ресурс” компаниудыг шалгах материалыг АТГ-т өгсөн. Гэвч уг хэрэгт эрүүгийн хэрэг үүсгэх боломжгүй гэдгээ Нийслэлийн прокурорын орлогч Е.Сагсай мэдээлсэн. Түүний гаргасан мэдээллийг нийтэллээ. Уг мэдээлэлд: “УИХ-ын гишүүн Х.Баттулгаас Авлигатай тэмцэх газарт ирүүлсэн мэдээллийн дагуу тус газраас холбогдох шалгалтыг ЭБШХ-д заасан гэмт хэргийн талаарх гомдол, мэдээллийг шалгах журмаар явуулсан.
Мэдээлэлд дурьдсан асуудлаар "МСS", "Энержи ресурс" компаниудын санхүүгийн баримт бичигт үзлэг хийх, шаардлагатай бичиг баримтуудыг хураан авах зэргээр холбогдох баримтуудыг цуглуулсан байна.
Авлигатай тэмцэх газрын Мөрдөн шалгах хэлтсээс дээрх мэдээлэлд үндэслэн эрүүгийн хэрэг үүсгэж хянуулахаар Нийслэлийн прокурорын газарт ирүүлсэн байна.
Авлигатай тэмцэх газраас мэдээллийн дагуу шалгасан шалгалтаар цугларсан баримтуудыг прокурор хянаж үзээд эрүүгийн хэрэг үүсгэх хангалттай баримт байхгүй, гэмт хэргийн шинжгүй байна гэж үзэж эрүүгийн хэрэг үүсгэсэн мөрдөн байцаагчийн тогтоолыг хүчингүй болгож, эрүүгийн хэрэг үүсгэхээс татгалзаж шийдвэрлэлээ.
Мэдээлэлд дурьдсан асуудлууд нь иргэний болон захиргааны эрх зүйн хэм хэмжээгээр зохицуулагдах асуудал байна гэж прокурор үзсэн болно.
Авлигатай тэмцэх газар болон холбогдох бусад байгууллагууд шаардлагатай баримтууд цуглуулж, эрүүгийн хэрэг үүсгэх хангалттай үндэслэл бүхий баримтууд бүрдүүлж ирүүлвэл прокурорын гаргасан шийдвэрийг хүчингүй болгож, дахин сэргээн шалгах боломж нь ЭБШХ-д байгаа болно” гэжээ.
Б.Чимэг
