Өмнөд Солонгосын бүх нийтийн сонгууль болж парламентын гишүүдээ сонгож байна. Өглөөний зургаан цагт эхэлсэн энэ үйл явдал чанга журмын дагуу үргэлжилж байгаа аж. Парламентын энэ удаагийн сонгуулийн байдлаас энэ оны 12 дугаар сард болох ерөнхийлөгчийн сонгуулийн дүр зураг тодорч байна гэж ажиглагчид үзэж байна. 

    Одоо ерөнхийлөгчийн албыг хашиж буй Ли Мюн Бакын тэргүүлж буй Шинэ хүчний нам парламентад давамгайлах төлөв ажиглагдаж байна. Харин түүний намтай мөр зэрэгцэн ирж буй өрсөлдөгч нь Ардчилсан эвсэл нам юм. Тус нам парламентын 299 суудлаас 130-135-ыг нь өөрийн болгоод байгаа гэж дэлхий дахины мэдээллийн хэрэгсэлд нийтэлжээ. 40 сая гаруй иргэн 245 хууль тогтоогчийг шууд саналаар сонгон гаргадаг байна. Үлдсэн 54 суудлыг пропорциональ журмаар сонгон ажиллуулдаг. Дөрвөн жилийн өмнө болсон сүүлийн парламентад эрх баригч нам 165 суудал авч байсан бол сөрөг хүчин болох Ардчилсан эвсэл 89 суудалтай үлдэж байв.

    Энэ удаагийн сонгуулиар хэд хэдэн асуудал байсан нь эрх баригч намын байр суурь уруудахад хүргэсэн байна. Тухайлбал, оюутнуудын одоод болтол эсэргүүцэж байгаа АНУ, БНСУ-ын чөлөөт худалдааны хэлэлцээр түлхэц болжээ. Мөн одоогийн эдийн засаг нийгмийн байдлаас гадна хойд Солонгосоос хөөргөхөөр зэхсэн пуужин ч сөрөг нөлөө үзүүлсэн гэнэ.

    Одоогийн ерөнхийлөгч Ли Мён Бак ерөнхийлөгч засгийг тэргүүлэх эрхт хугацаа нь 12 дугаар сар хүртэл хэвэндээ байх ч гэлээ байдал хүндэрч болзошгүй. Учир нь парламентад сөрөг хүчин давамгайлах магадлал бүрэн алга болоогүй байгаа. Шөнө дунд хүртэл үргэлжлэх сонгуулийн дүнд сөрөг хүчин давамгайлвал өнөөдөр хүртэл хийсэн эрх баригч намын ажил эсрэгээрээ эргэхийг үгүйсгэхгүй. Учир нь чөлөөт худалдааны хэлэлцээрийг нурааж, дахин хийх байх гэж ажиглагчид үзжээ. Тэгвэл хоёр улсын харилцаа муудах магадлалтай бөгөөд бусад улсын харилцаанд ч сөрөг нөлөөтэй гэсэн дүгнэлт бий.