2008 оны долдугаар сарын 1-ний хэрэг явдлын талаар хөтөлж байсан гэх хар тэмдэглэлээ хонгионы хамт Х.Тэмүүжин гишүүнд өгч “шударга” иргэний үүргээ гүйцэтгэсэн Түмэннастын Төмөрхуяг одоо Авилгатай тэмцэх газрын Тамгын хэлтсийн даргын Ч.Өнөрбаярын жолоочоор ажиллаж байгаа.
    2008 оны долдугаар сарын 1-ний хэрэг явдлын талаар хөтөлж байсан гэх хар тэмдэглэлээ хонгионы хамт Х.Тэмүүжин гишүүнд өгч “шударга” иргэний үүргээ гүйцэтгэсэн Түмэннастын Төмөрхуяг одоо Авилгатай тэмцэх газрын Тамгын хэлтсийн даргын Ч.Өнөрбаярын жолоочоор ажиллаж байгаа. Түүнийг одоо хаана юу хийж байгааг нийтэд зарласан нь түүнийг ихээхэн эвгүй байдалд оруулаад авлаа.
    Учир нь мөр зэрэгцэн ажиллаж байсан нэгнийхээ эсрэг тэмдэглэл хөтлөн, тус тэмдэглэлээ хуулийн байгууллагын гарт өгсөн явдал юм. Хэдийгээр “Хар дэвтэр”-ийг шүүхээс хэргийн нотлох баримт мөн гэж эцсийн шийдвэр гараагүй байгаа ч дэвтэрт дурьдагдсан мэдээллийн дагуу цагдаа нарыг гэм буруутай хэмээн ярьж байгаа. Энэ талаар Улсын ерөнхий прокурорын газрын дэргэдэх Мөрдөн байцаах албаны дарга Б.Галдаа хүртэл нэг ярилцлагадаа хэлсэн байдаг билээ. Тэгэхээр “Хар дэвтэр” хөтөлсөн гэх Т.Төмөрхуяг нь хамтдаа ажиллаж байсан мөрдөст нэг нөхдөө шүүхийн хаалганы өмнө авчраад байгаа юм.
    Хэдийгээр тэрээр “Хар дэвтэр”-ийг хуулийн байгууллагад өгснийхөө төлөө цагдаагийн экс дарга, цагдаагийн ар гэрийн холбооныхон гээд олон хүмүүст дарамтлагдсан учраас ажлаасаа хүртэл гарсан гэдэг. Гэтэл үнэн хэрэгтээ тэрээр 2011.11.20-ны өдөр ажил үүргээ гүйцэтгэж байх үедээ согтууруулах ундаа хэрэглэн цагдаагийн алба хаагчийн сахилга, ёс зүйг ноцтой зөрчсөн тул 2011.11.21-ний өдөр ажлаасаа халагдсан байдаг аж. Архи ууж, ажлаасаа халагдчихаад “Хар дэвтэр”-ээс болж дарамтлуулаад гарсан хэмээн ярьж суух түүнийг мөрдөст нэгт нөхөд нь ажлаасаа халагдсандаа хорсож явдаг хэмээн ярьжээ.
    Мөн тэрээр “Хар дэвтэр”-т бууны гол төмрийг өөрчлөхөд гурван метр нүх ухалцсан долоон цагдаагийн нэрийг дурьдсан байдаг. Гэтэл үүнийг нь долдугаар сарын 1-ний үймээний хэрэгт холбогдсон цагдаа нарыг гэм буруугуй хэмээн өлсгөлөн зарлаж, тухайн үеийн МАХН /МАН/, АН сонгуулийн санал худалдаж авахын тулд ямар үйлдлүүдийг хийж байсан талаар мэдэгдсэн Н.Батмөнх: “Дэвтэрт дурьдагдсан долоон цагдаа нарын зарим нь тухайн үед Ганц худагт хоригдож байсан. Жишээлбэл, Н.Төмөрбаатар, Н.Батдорж нар. Яахаараа шоронд байсан хүмүүс гэнэт гарч ирээд эд мөрийн баримтаа нуудаг билээ. Тийм ямар ч боломж байхгүй шүү дээ. Бас тэнд нэр нь бичигдсэн нэг цагдаагийн хөл хугарчихсан гэртээ хэвтэж байсан. Мөн Х.Тэмүүжин бууны хонгио үзүүлж байна лээ. Хонгиог хэн ч хаана ч буудаад гаргаж ирж болно шүү дээ. Шалгалтын явцад тэр хонгиог цагдаа нарын бууных мөн, бишийг огтхон ч нягталж, шалгаагүй талаар мэдээлэл бий” хэмээн ярилцлага өгсөн байдаг.
    Харин тэмдэглэл хөтөлсөн шалтгааныг түүний ээж “Болж өнгөрсөн зүйлээ мартахгүйн тулд яагаад тэмдэглэл хөтөлж болохгүй гэж. Болсон зүйлийг болоогүй мэтээр ярьчихдаг бусармаг хүмүүсийн эсрэг хэлэх үгтэй, хийх ажилтай байх ёстой. Энэ тэмдэглэлээ хөтлөөгүй бол миний хүү хэрэгт орчих ч байсан юм билүү. Ийм итгэл, найдваргүй хамт олны дунд байсан хүн юунд ч өртөж магадгүй. Тиймээс ч тэмдэглэл хөтөлсөн. Ингэлээ гээд айгаад байх асуудалгүй” хэмээн ярьж байсан удаатай.
        Энэ мэт “Хар дэвтэр”-ийн тойрсон асуудал олон байдаг. Харин хар дэвтрийн эзнийг олон нийтэд зураг хөрөгтэй нь нийтэлсэн нь түүнийг аюултай бөгөөд ичгэвтэр байдалд оруулаад авах шиг. Нэгэн цагт ард түмнийхээ амар тайван амьдралын төлөө хэмээн мөрдөст нэгт нөхөдтэйгээ тангараг өргөн явсан ч одоо тэднийгээ шүүхийн өмнө авчраад байна.