ХХААХҮ-ийн дэд сайд П.Баянмөнх Японы Хөдөө аж ахуй, ой, загас агнуурын яамны парламентын Төрийн нарийн бичгийн дарга хатагтай Хироко Наканотой Токио хотод уулзаж хоёр талын салбарын хамтын ажиллагааны асуудлаар санал солилцжээ. Хүнд хэцүү үед байнга тусалж ирсэн япончууд болон засгийн газарт П.Баянмөнх сайд талархал илэрхийлээд цаашид зөвхөн тусламж аваад байх биш монголын мал аж ахуй, газар тариалангийн нөхөн төлждөг нөөц баялаг, түүхий эдийн боломж, Япон Улсын техник, технологийн дэвшил, нау-хауд тулгуурлан харилцан ашигтай хамтын ажиллагааг хөгжүүлэх сонирхолтой байгаагаа илэрхийлэв. 

    Монгол-Японы хооронд байгуулахаар тохиролцсон Эдийн засгийн түншлэл, хамтын ажиллагааны хэлэлцээрийн хүрээнд мах, чацаргана, ноос ноолуур, сүлжмэл бүтээгдэхүүн, жамц давс, хонины ноосоор хийсэн барилгын дулаалгын материал зэрэг  хүнс, хөдөө аж ахуй, хөнгөн үйлдвэрийн бүтээгдэхүүнийг татваргүйгээр экспортлох боломжийг бүрдүүлэх, санхүүгийн бололцоо муутай фермер, өрхийн аж ахуйд дэмжих чиглэлээр төсөл хэрэгжүүлэх, хөдөөг хоршооллын чиглэлээр цаашид хамтран ажиллах талаар тодорхой саналыг Японы талд тавьж харилцан ярилцлаа.

   Монголын ХХААХҮЯ болон Японы Хөдөө аж ахуй, ой, загас агнуурын яам хоорондын Техникийн зөвлөлдөх тавдугаар уулзалт зохион байгуулагдаж буй үед дэд сайд П.Баянмөнх Японд ажлын айлчлал хийж байгаа. Айлчлалын хүрээнд тэрбээр Японы Гадаад хэргийн дэд сайд нар болон Хөдөө аж ахуйн хоршоологчдын холбооны удирдлагуудтай уулзаж хамтын ажиллагааг өргөжүүлэх асуудлаар яриа, хэлэлцээ хийхээс гадна Токиогийн Хөдөө аж ахуйн бараа түүхий эдийн биржид зочлон арга туршлага судлах юм.