1992 оны Дөрөвдүгээр сарын 12 ны энэ өдөр гарын таван хуруу шиг тэрсхэн таван хөвгүүн эх орон, ах дүүс, анд нөхөд, ар гэрийнхнээ орхин  дугуйгаар тив алгасан, тэнгис далай гатлах аялалдаа гарчээ. Монгол хүмүүний эртний мөрөөдлийг дугуйгаар аялан гүйцэлдүүлэх хувь заяа “Таван хуруу” багийнханд заяажээ. Тэдгээр таван залуус 294 хоног аялж, 28 000 км замыг туулах явцдаа асар их хүч хөдөлмөр, эрүүл чийрэг бие бялдар, сэтгэлийн тэвчээр хатуужлыг харуулж чадсан юм. Аяллынхаа талаар олон сонирхолтой мэдээлэл, тэмдэглэлийг зогсолтгүй монголын ард түмэндээ хүргэж байсан билээ.

     “ТаванХуруу” баг анх 1991 оны намар 11 сард бүрэлдэж эхэлсэн байна. Энэ үед аяллыг санаачлагч, багийн ахлагч Г.Жаргалсайхан, Г.Дэлгэрсайхан, Ш.Ёндондаш, А.Ганболд нарын дөрвөн гишүүнтэй байв. Улмаар Б.Лхагвасүрэн 1992 оны нэгдүгээр сард багийн гишүүнээр нэмэгдэж оржээ. Тэгснээр багийн гишүүдийн тоо гарын таван хуруу мэт тэгширч багтаа “Таван Хуруу” нэрийг санал нэгтэй баталж байжээ.

Багийн гишүүд тус бүртээ оногдсон үүрэг хариуцлагатай байв.

Багийн ахлагч Жаргалсайхан гадаад харилцаа, дотоод зохион байгуулалтыг хариуцан ажиллахын зэрэгцээ аяллын явцад телевизийн баримтат кино, гэрэл зургийн материал бүрдүүлж, телевизийн цуврал нэвтрүүлэг бэлтгэж ажилласан юм.

Багийн гишүүн Г.Дэлгэрсайхан дугуйн спортын мастер төдийгүй техникийн инженер мэргэжилтэй хүн тул дугуйны эвдрэл гэмтлийг засварлах гол үүрэгтэйгээр оролцжээ.

Багийн гишүүн Ш.Ёндондаш дугуйн спортын олон улсын хэмжээний мастер ахмад туршлагатай хүний хувьд аяллын зам маршрутыг төлөвлөх, цаг уурын нөхцөлд зөв зохистой хувцаслах болон хоол хүнсний хэрэглээг зохицуулах зэрэг нарийн төвөгтэй асуудлыг хариуцаж дугуйн аяллын өдөр тутмын нарийн ширийн зүйлийг хариуцан багтаа нөмөр нөөлөг нь болж явсан юм.

Багийн гишүүн А.Ганболд зураач, сийлбэрч мэргэжилтэй хүн тул аян замын явцад зураасан болон таталбар зургийн материал цуглуулж гар зургийн үзэсгэлэн гаргах үүрэгтэй оролцож байлаа.

Багийн гишүүн Б.Лхагвасүрэн эрдэм шинжилгээний ажилтан хүн байсан тул аян замын өдрийн тэмдэглэл хөтөлж, ном товхимол гаргах үүргийг хүлээн аялалд нэгдэж байжээ.

Эдгээр залуустаа дугуйгаар дэлхийг тойрсон түүхт аяллын 20 жилийн ойн баярын мэнд хүргэе.