Энэ үгийг АТГ-ын Мөрдөн байцаах тасгийн дарга Э.Амарбат урьд шөнө цөөн хэдэн хүний хүрээнд биш түмний нүдэн дээр телевизийн камер харж байгаад хэллээ. Аймшиггүй хэлэв. Аймшигтай санагдав. Монгол Улсын ерөнхийлөгч байсан хүнийг баривчлах гэж оролдож байх үеэр галт зэвсэг гарсан сурагтай. Харин иргэд галт зэвсэг гаргасныг нь хоёр нүдээрээ хараад гэрчилж байв. Мөн ерөнхийлөгч Н.Энхбаярын машины цонхыг ч бууны бөгсөөр хагалсан мэдээлэл байгаа юм..

  Галт зэвсэг яагаад хэрэглэх гэсэн бэ? Галт зэвсэгээр хэн нэгнийг хөнөөх гэж байсан уу? Зүгээр л ажлын хэрэгцээнд авч явсан уу? гээд олон асуулт урган гарч байна. Ерөнхийлөгч асан Н.Энхбаярыг баривчлах гэж зургаан залуу гэнэт бүчжээ. Мэдээж Н.Энхбаяр төрийн тусгай хамгаалалтад байдаг учир хамгаалагч нь даргаа хамгаалах үүргээ сайн гүйцэтгэсэн сурагтай. Мөн жолооч нь ч нэмэр болжээ. Гэвч зургаан залуу Н.Энхбаяр ерөнхийлөгчийг хажуу талын машин руугаа чирч оруулах гээд бүтэлгүйтжээ. Энэ үеэр тэдгээр залуусын нэг нь буу гаргасан бололтой. Хариуд нь Н.Энхбаярын хамгаалагч ч гэсэн буугаа зөрүүлэн гараад ирсэн байна. Харин Н.Энхбаяр хамгаалагчаа загнаж бууг нь далд хийлгэжээ. Энэ үйл явдал иргэдийн нүдэн дээр болсон нь аймшигтай санагдлаа. Хэрэв иргэд байгаагүй бол бараг л буудалцах хэмжээнд хүрчээ. Ийнхүү төрийн тэргүүн байсан хүнээ баривчлахын тулд галт зэвсэг хэрэглэх гэж байгаа нь олон түмний дургүйцлийг хүргэлээ.

   7 сарын 1-нд галт зэвсэг хэрэглэж 5 хүний аминд хүрсэн. Бас цөөнгүй хүнийг галт зэвсэгээр хэрэглэсэн аймшигт хэрэг шийдэгдээгүй байгаа. Ийм байхад дахин галт зэвсгийн асуудал гарч ирж байгаад, шаардлагатай бол хэрэглэхэд буруудахгүй хэмээн мэдэгдсэнд дүгнэлт хийх хэрэгтэй юм. Тиймээс энэ асуудлын талаар бүхий л түвшинд ярилцах нь тодорхой боллоо.

Харин “шаардлагатай бол галт зэвсэг хэрэглэнэ” гэж мэдэгдээд байгаа АТГ-ын Мөрдөн байцаах тасгийн дарга Э.Амарбат гэж хэн бэ гэдгийг монголчууд маш сайн мэддэг болсон. Тэрээр өмнө нэгэн эмэгтэйг хүчирхийлсэн гэдэг асуудлаас үүдэн ажлаасаа түр чөлөөлөгдөж байсан. Гэвч уг хэрэг нь нотлогдоогүй учир АТГ-таа эргэн ирсэн. Уг хэрэгээс нь болоод АТГ-ын Мөрдөн байцаах тасгийн дарга Э.Амарбатыг ард иргэд андахаа байсан юм. Тэрээр Н.Энхбаярыг баривчлах хүндхэн үүргийг хүлээж дахин олон нийтийн анхаарлын төвд орж ирээд болчимгүй мэдэгдэл хийлээ. Уг мэдэгдлээсээ болоод нэг хэсэгтээ ихэд буруутгагдах нь тодорхой боллоо. Тэрбээр "энэ ажиллагааг хэзээ ч явуулж болно" гэж мэдэгдэж байсныхаа дагуу Н.Энхбаярыг үүрээр баривчилсан нь олон нийтийн дургүйцлийг төрүүлээд байна.