МАН доторх зөрчил ширүүсч оргил хийгээд тайлалдаа хүрэхэд тун бага хугацаа үлдээд байгаа бололтой. Учир нь намын бүлгийн хурал нэлээд ширүүсч эцэстээ бие биедээ хэвлэлээр битүү хатуу утгатай үг дайдаг боллоо. Үүний нэг илрэл нь УИХ-ын гишүүн, Төсвийн байнгын хорооны дарга О.Чулуунбатын ярилцлага юм. Түүний ярицлага нь саарал ордны зугаа болохоос гадна МАН дотор ихээхэн хэрүүл үүсгэжээ.
Учир нь О.Чулуунбат “...манай намд онгироо сагсуу, болчимгүй лидерүүд байх ёсгүй. Тэд манай намын нэр хүндийг унагааж байна. Тэднийг шүүмжлэхгүй бол болохгүй нь. Манай нам ёс суртахууны доройтолд орчихжээ. Сайд, дарга нарт ёс суртахуун гэж алга” гэж хэлсэн юм.
О.Чулуунбат гишүүний энэхүү ярианы эзэн хэн бэ гэсэн хардлага газар авч байна. МАН доторхи онгироо сагсуу лидерийг оноож нэрлэх гэсэн таамаглал хүчээ авлаа. Зарим хүмүүс У.Хүрэлсүхийг л хэлж байгаа юм биш үү гэж тайлбарлах аж. Үүнээс ч хатуу үгийг О.Чулуунбат бараг нэр зааж дурдсан юм. “Төрийн албанд худлаа ярьдаггүй, даруухан ааш авиртай хүн байх хэрэгтэй. Гэтэл өнөөдөр худлаа ярьдаг, насаараа төрийн аппаратад ажиллачихаад хувьдаа байшин барилга бариулчихсан хүмүүс олон болжээ. Өнгөрсөн хугацаанд төрийн төлөө ажиллаад байна гэж ойлгосон чинь хувьдаа эд хөрөнгө завшаад явж шүү дээ” хэмээн үг чулуудсан. Сэтгүүлчийн “Хэнийг хэлээд байна вэ?” гэсэн асуултад “Өөр намынхантай хэрүүл хийгээд яваа сайд нарыг харж байгаа биз дээ” хэмээн өөрөө тайлжээ.
Мэдээж Ц.Нямдорж сайдыгаа хэлсэн нь тодорхой байна. МАН-д зөвхөн төрийн ажил хийдэг, ямар ч хөрөнгөгүй гэдэг мөртлөө хоёр ч хүүхэддээ тэрбумаар үнэлэгдэх хаус бариулчихсан, бусад намынхантай хэрүүл хийгээд яваа хүн Ц.Нямдоржоос өөр байхгүй билээ. Ингэж МАН-ынхан бие биенээ ил, далдаар “ухаж төнхөж” байна.
Бас удирдлагууд нь гишүүдтэйгээ уулздаггүй зөвхөн захидлаар харилцдаг эртний үеийн мода дэлгэрүүлснээс болоод олон хүн намаасаа гарах бэлтгэлээ базааж эхэлсэн. Тэдний тоонд Ч.Улаан, Д.Тэрбишдагва, Д.Балдан-Очир, О.Чулуунбат, Р.Раш гэх мэт гишүүд орно. Эдгээр гишүүдийн баримталж буй байр суурь, хэвлэлээр яриад байгаа зүйлсийнх нь талаар өнгөрсөн бүлгийн хурлаар хэлэлцжээ.
Тэр үед зарим гишүүд “Манай намаас гарвал гарна л биз. Айж эмээж сандраад байх юм алга. Дээр үед Ж.Гомбожав тэргүүтэй олон хүмүүс гарсан. Тухайн үедээ сенсаци тариад, том мэдэгдэл хийгээд, баатар болоод л явдаг юм. Хэсэг хугацааны дараа хэн ч биш болдог шүү дээ. Тийм л замыг сонгож байгаа хүмүүсийг явуулах хэрэгтэй” хэмээн “ташуурджээ”.
Тэр ч бүү хэл АН-аас М.Энхсайхан, Ж.Наранцацралт, М.Сономил, Н.Батцэрэг нарыг гараад явахад тухайн үеийн удирдлага болох Ц.Элбэгдорж “Том модноос тасарсан навч ургадаггүй” гэж хэлснийг ч иш татаж эвгүй байдалд оруулжээ. Ийнхүү монголын хамгийн том, хариуцлагатай гэгддэг МАН-аас цөөнгүй гишүүд гарахаар болчихоод байна.
Хөндлөнгийн ажиглагчид энэ үзэгдлийг Н.Энхбаярын хатгаасаар МАН дотор болдог юм болдогоороо болж байна хэмээн дүгнэж байна.
