МАХН-ын дарга Н.Энхбаярыг АТГ-аас баривчилж, Төв аймгийн цагдан хорих төвд хорьжээ. Энэ газарт хүнд гэмт хэрэг хийсэн, бусдаас тусгаарлах гэсэн хүмүүсээ хорьдог гэж эх сурвалжууд хэлж байна. Тухайлбал хүний эрхийн хуульч М.Ичинноров “Төв аймгийн урьдчилан саатуулах төв бол хүмүүсийг тамладаг, хэргийг нь тулган хүлээлгэдэг” газар гэсэн юм. Н.Энхбаяраас гадна МАХН-ын Батбилэг, Амартүвшин, Шагжаа гэдэг гурван залууг баривчлан авч явжээ. Гэхдээ тэднийг хаашаа авч явсан нь тодорхойгүй байна.
Н.Энхбаярын гэрийн хаалгыг цагдаа нар салган дотогш орсон. Тэнд байсан хорь гаруй хүнд хүч хэрэглэж, Н.Энхбаярыг авч явжээ. УИХ-ын гишүүн Д.Тэрбишдагвын хацар хавдсан байгаа бол Ч.Улаан гишүүний нүдний шил хагарсан байна. Мөн УИХ-ын гишүүн О.Чулуунбат баривчилгааны дараа эмнэлэг рүү явна гэдгээ мэдэгдсэн юм. Өрөөнд байсан Ц.Шинэбаяр гишүүн УИХ-ын гишүүний бие, бүрэн эрхэд халдлаа хэмээн хэвлэлийн бага хурал зарлаад байна.
