Иргэдийн үзэл бодлыг илэрхийлдэг нэгэн орчин болсон твиттерт хүмүүс Н.Энхбаярын талаар ямар байр суурьтай байгааг хүргэе. УИХ-ын гишүүн Б.Бат-Эрдэнэ, О.Чулуунбат, Ц.Даваасүрэн, Д.Тэрбишдагва, Ц.Батбаяр, Р.Раш, Д.Цэнгэл, Д.Балдан-Очир, Ц.Бадамсүрэн нар МАН-аас гарахаар шийдсэн тухай мэдээллийг твиттерчид дамжуулж байна. Гэтэл твиттер ашигладаг УИХ-ын гишүүдээс Д.Хаянхярваа сангийн сайд, Х.Баттулга нар хамгийн түрүүнд "жиргэв". Тэд жиргэхдээ "Өглөөний мэнд", "Хонхны дуу биднийг сэрээ" гэсэн уламжлалт үгээр жиргээгээ эхлүүлсэн юм. Харин ИЗНН-ын тэргүүн Д.Энхбат "Н.Энхбаярыг баривчлах ажиллагааг бүдүүлэг, хуулийг, хүнийг доромжилсон байдлаар хийж бгааг ИЗНН хэлэлцэнэ. Энэ бол хуулийг дээдлэх асуудал" гэсэн байна. Гишүүдээс гадна хуульч М.Ичинноров "МАН-ыг үзэл бодлын шорон" хэмээн цоллоод гарч, МАХН-д орж байгаагаа мэдэгдлээ. Түүний хариуд эдийн засагч Н.Дашзэвэг "Би бас дотор нь байсан хүн, гарч байгааг дэмжье" гэх утгатайгаар "жиргэсэн" байна.

     Н.Энхбаярыг ямар хүн байсныг бид мартсан, баривчлах цаг нь аль эрт болчихсон байсан гэж хэлэх хүн байхад "Төр гэж яг юу юм бэ? Төрийн нэр барьж орж ирсэн хүмүүсийн ард хэн байна?" гэх жиргээч ч байгаа юм. Мөн хэд хэдэн хүн "Н.Энхбаяр оросуудын хэлдэг Баасан гариг, 13-ны өдрийн мууг мэдэрлээ" гэж байлаа.