МАН-аас ерөнхийлөгч асан, МАХН-ын дарга Н.Энхбаярыг АТГ баривчилсантай холбоотой дараах мэдэгдлийг хийлээ. УИХ дахь МАН-ын дарга Ө.Энхтүвшин, тус намын нарийн бичгийн дарга Д.Сарангэрэл, Ж.Сүхбаатар болон Олон нийттэй харилцах албаны дарга Д.Амарбаясгалан нэр мэдэгдлийг тараасан юм.

  Н.Энхбаярыг баривчлах үед хамт байсан Ч.Улаан, Д.Тэрбишдагва, О.Чулуунбат нар намаасаа гарах өргөдөл өгсөн гэж хэвлэлүүд мэдээлж байсан. Энэ тухай МАН-ын бүлгийн дарга Ө.Энхтүвшингөөс тодруулахад "Тийм зүйл болоогүй. Яг ямар үйл явдал болсон гэдгийг бид мэдэх хэрэгтэй байсан учир бүлгийн хурал дээр дуудаж, тайлбар авсан" гэв. Хууль зүйн сайд Ц.Нямдорж энэ үйл явдалд ямар нэгэн хариуцлага хүлээх талаар сэтгүүлчид асуусан. Хариуд нь тэрбээр "Ц.Нямдорж сайд ийм явдал болсныг өглөө мэдсэн гэж хариулсан. Өөрөө мэдээлэл өгөх байх" гэсэн юм.

   2012 оны 04 дүгээр сарын 13-ны өдөр Монгол улсын ерөнхийлөгч асан Н.Энхбаярыг албадан саатуулжээ.

   АТГ иргэн Н.Энхбаярт эрүүгийн хэрэг үүсгэн шалгаж, түүнийг цагдан хорих, таслан сэргийлэх арга хэмжээ авах хүсэлт гаргасныг прокурорын байгууллага зөвшөөрч, шүүгч захирамж гаргасан байна.

   Энэ үйл ажиллагаа нь Эрүүгийн байцаан шийтгэх хуулийн дагуу явагдсан гэж холбогдох албан тушаалтнууд мэдэгдсэн байна. Гэтэл үүнийг улс төрийн зарим хүчин улс төрийн байр сууринаас тайлбарлаж, МАН оролцсон мэтээр зориуд мушгин гуйвуулж байгад харамсаж байна.

   Энэ шийдвэрийг гаргасан АТГ, прокурор, шүүхийн байгууллагууд нь УИХ, Засгийн газар, улс төрийн нам хүчнээс хараат бус, бие даасан үйл ажиллагаа явуулдаг болохыг тэмдэглэж байна.

   Харин хууль, хяналтын байгууллагууд үйл ажиллагаа явуулахдаа бусдын эрх, өмч хөрөнгөд хууль бусаар халдаж болохгүй бөгөөд ийм зөрчил, завхрал гаргасан албан тушаалтан хэнтэй ч болов хатуу хариуцлага тооцох ёстой гэж үзэж байна.
   Цаашид хууль, шүүхийн байгууллагын аливаа үйл ажиллагаанд хөндлөнгөөс оролцох, улс төрийн зорилгоор элдэв тайлбар, дүгнэлт хийх нь асуудлын үнэн, зөвийг олоход саад тотгор учруулж, олон нийтийн сэтгэл зүйд сөргөр нөлөөлж, нийгэмд бухимдал үүсгэх ноцтой үр дагаварт хүргэж болзошгүйг сануулж байна.

   Энэ ажиллагааг зохион байгуулсан АТГ, шийдвэр гаргасан шүүх, прокурорын байгууллага тухайн асуудлаар холбогдох тайлбар мэдээллийг хуулийн хүрээнд цаг алдалгүй олон нийтэд хүргэхийг шаардаж байна.