Өнөөдөр 14.00 цагт АТГ-аас Н.Энхбаярын баривчилгаатай холбоотой асуудлаар мэдээлэл хийлээ. Хэвлэлийн хуралд АТГ-ын Тамгын газрын дарга Ч.Өнөрбаяр, тус газрын мөрдөн байцаах албаны дарга Э.Амарбат, мөрдөн шалгах хэлстийн дарга Цоодолсэнгээ, УМБГ-ын дэд дарга П.Батбаатар нар оролцсон юм. Тэд МАХН-ын дарга Н.Энхбаярыг баривчлах хангалттай олон шалтгаан байгаа гэж үзээд түүнийг дуудсан хугацаанд ирж мэдүүлэг өгөөгүй учраас албадан баривчилсан гэдгийг тайлбарласан юм. -Н.Энхбаярыг сэжигтнээр татаагүй байж цагдан хорьсон нь хууль бус хэмээн иргэд үзэж байна. Энэ талаар тодруулахгүй юу?
-Н.Энхбаярт 2011 оны аравдугаар сарын 19-ны өдөр Эрүүгийн хуулийн 150.3-т зааснаар сэжигтнээр тооцсон. Сэжигтнээр тооцсон тогтоолыг өөрт нь танилцуулж, зарлан дуудах хуудас гардуулан өгсөн байдаг. Харамсалтай нь мөрдөн байцаалтын явцад нэг ч удаа ирээгүй. Тиймээс өмгөөлөгчид нь хүртэл зарлан дуудах хуудас өгөхөд ирээгүй. Нийт арван удаа дуудсан. Гэтэл хүндэтгэн үзэх шалтгаангүйгээр нэг ч удаа ирээгүй. Оршин суугаа хорооных нь Засаг даргаар дамжуулж хүртэл өгч байсан. Мөн гэр бүлийнхэн насанд хүрсэн хүмүүст өгөх гэтэл авахаас татгалзсан. Нэг ч удаа ирээгүй учраас мөрдөн байцаалтын ажиллагаа хэвийн явагдах боломжгүй болсон. Иймд хууль заасан журмын дагуу түүний хэрэгт хяналт тавьж буй прокурор Сүхбаатар дүүргийн шүүхэд хүсэлт гаргаснаар Сүхбаатар дүүргийн шүүхээс өчигдөр цагдан хорих захирамж гарсан. Захирамжийн дагуу л хорих арга хэмжээ авах болсон.
-Хэд хоног баривчлах вэ?
-Сэжигтнээр 14 хоног, хэрвээ шаардлагатай бол яллагдагчаар татаж, хоёр сар хугацаагаар хорьж болно.
-Өмгөөлөгчтэй нь уулзах боломжоор хангасан уу?
-Мэдээж.
-Танайхыг галт зэвсэг хэрэглэхийг завдсан гэсэн?
-Н.Энхбаярыг цагдан хорихоор машиныг нь зогсоосон. Тэгээд хамгаалагч нь бууж ирэнгүүт учир явдлыг тайлбарласан байгаа. Гэтэл хамгаалагч зөвшөөрөхгүй буу гаргаж ирээд сумласан. Тэгээд манай ажилтнуудыг буудна гэсэн байгаа юм. Тэгэхээр нь манай ажилтан буу гаргасан гэсэн. Манай ажилтныг буугаа далд хийхэд, хамгаалагч далд хийхгүй онилоод байсан. Харин манай ажилтан авхаалжтай ажиллаж, гараас нь бууг нь холдуулж чадсан байгаа юм. Тэгээд бууг нь шалгахад хоолойнд нь сум байсан.
-Яагаад тэр дор нь баривчлахгүй ингэж сүржигнүүлэх болов?
-Бид сүржин болгоогүй. Захирамжаа танилцуулаад байхад эсэргүүцээд байсан.
-Н.Энхбаяр мөрдөн байцаалтад орж байгаа юу?
-Н.Энхбаярыг гэмт хэрэгт сэрдэх тооцох хангалттай нотлох баримт бидэнд байгаа учраас сэжигтнээр татсан. Тиймээс цаашид мөрдөн байцаалтын ажиллагааг үргэлжлүүлнэ. Мэдүүлэг өгөх эсэх нь өөрийнх нь асуудал.
-Та өчигдөр Н.Энхбаяр гуайтай уулзаад нэлээн удсан. Юу ярив?
-Ямар ч байсан танилцуулж чадахгүй байсан шүүхийн шйидвэрийг өмгөөлөгчид нь бөгөөд өөрт нь танилцуулж хуулийн байгууллагын ажилд хүндэтгэлтэй хандаач ээ гэж хүссэн.
-Өмнө нь өндөр албан тушаалтнуудыг хэргийг шалгадаг ч замхруулдаг. Ингэж хүч хэрэглэсэн тохиолдол анхных нь боллоо?
-Бид шүүхийн шийдвэрийг гүйцэтгүүлэх арга хэмжээ л авсан. Энэ нь хуулийн дагуу гэж ойлгож байгаа.
-Н.Энхбаярыг улс төрийн зорилгоор хорьсон гээд байгаа?
-Энд улс төрийн ямар ч зорилго байхгүй. Н.Энхбаяр өчигдөр долдугаар сарын 1-ний ҮАБЗ-ын протокол дэлгэснээр түүнийг хорьсон гээд байгаа. Энд ямар ч тийм зүйл байхгүй гэдгийг албан ёсоор мэдэгдэж байна.
-Н.Энхбаяр төрийн тусгай хамгаалалтад байдаг хүн?
-Н.Энхбаярын Монгол Улсын Ерөнхийлөгчийн бүрэн эрхийн хугацаа нь дууссан. Бүрэн эрхийн хугацаа нь дуусаад УИХ-аас тогтоол гарсан байдаг. Энэ тогтоолоор төрийн тусгай хамгаалалтанд авдаг юм. Энэ хамгаалалт нь ямар учиртай юм гэхээр энэ хүн төрийн алба хашиж байсантай холбогдуулан ямар нэгэн байдлаар гэмт халдлагад өртөх вий, гэмт хэргийн хохирогч болчих вий гэдэг байдлаар хамгаалдаг болохоос биш хийсэн гэмт үйлдэлтэй нь холбогдуулан сэжигтнээр тооцон шалгаж байгаа хуулийн байгууллагын үйл ажиллагаатай холбоотой асуудал биш юм. Энэ утгаараа Монгол Улсын Ерөнхийлөгчийн бүрэн эрхийн хугацаа нь дууссан байхад халдашгүй дархан эрхийн байдал яригдахгүй. Төрийн ямар ч өндөр албан тушаал хашиж байсан гэсэн бүрэн эрхийн хугацаа дууссанаас хойш тэр хүнийг гэмт хэрэгт холбогдуулан шалгаж байгаа тохиолдолд халдашгүй дархан эрхийн асуудал яригдахгүй.
Б.Чимэг
