“Хүүхдийн хүчирхийллийн эсрэг бэлэгдэл” болгон "Хүсэл зорилгоо Нэгтгэе" Үндэсний хөдөлгөөн, Мами централ ээжүүдийн групп хамтран гэрэлт хөшөө ногоон төглийг Үндэсний цэцэргэлэгт хүрээлэнд байгуулах гэж байгааг бид мэдээлсэн.

        Энэ талаар  "Хүсэл зорилгоо Нэгтгэе" Үндэсний хөдөлгөөний ерөнхий менежер С.Чинзоригоос зарим зүйлийг тодрууллаа.

-Хүүхдийн хүчирхийллийн эсрэг гэрэлт хөшөө босгоно гэлээ. Яг ямархуу хөшөө байх юм бол?
-Хөшөөний загварын уралдаан заралсан байгаа. Бүтээлүүд хараахан ирээгүй байна.

-Хөшөө босгосноор ямар ач тустай гэж үзэж байгаа юм?
- Монгол Улсад хүүхдийн төлөө үйл ажиллагаа явуулдаг 140 байгууллага байна Тэд нарын үйл ажиллагаа ард иргэдэд харагдахгүй байна. Тэдний байгууллагдсан шалтгаан нь хүүхдийн нэр барьж  мөнгө олох гэсэн байдал, нөгөөтэйгүүр гадны байгууллагаас хөрөнгө татах гэсэн зорилготой байна.Тиймээс бид хүчирхийллийн эсрэг  хөшөө босгох аянд нэгдсэн. Босгосон хөшөөг маань хүмүүс хараад эгдүүцдэг хүчирхийлэл дэндсэнийг ойлгож ухаараасай. Цэцэрлэгт хүрээлэнгээр зугаалж яваа гэр бүлд сургамж болоосой гэж бодож байгаа юм.

-Анх гэрэлт хөшөө, ногоон төгөлийн санааг хаанаас гаргасан бэ?
-Бидэнд анх гуравдугаар сард 20000 гишүүнтэй “мами ценрал” группын ээж нар санал тавьсан юм. Сүүлийн 1 жилд л гэхэд хоёрдугаар сарын 26-нд аав, хойд ээжийнхээ гарт 4 настай хүүхдийн амь нас үрэгдлээ. Таван настай хүүг эцэг нь зодож, бүр заазуураар зүсэж яргалсан хэрэг гарлаа. Долоон настай хүүг эцэг нь зодсон.  Мөн 14 настай охиныг хойд эцэг нь хүчиндсэн. Цаашлаад 15 настай охин жирэмсэн болчихсон, зургаан настай хүүгийн хөл гарыг хугалсан,  8 настай хүүхэд гэр бүлийн хүчирхийлэлд өртөж эрүүл мэндээрээ хохирсон байгаа. Энэ бүх мэдээлэл сүүлийн 6 сарын дотор дуулдсан. Бид энэ бүгдийг харж байна. Тиймээс хүчирхийллийн эсрэг нэгдэхийг олон нийтэд уриалж байгаа юм.

-Хандивын ажиллагаа нээлттэй байх уу?

-Бүх хандивийг ил гаргаж юунд зарцуулсан эсэхийг тайлагнах болно.  Анхны хандив орж ирсэн. Ээжүүд холбооны зохицуулагч Алимаа эгчдээ баярлалаа.
 

24tsag.mn