Өнгөрсөн долоо хоногт эдийн засгийн чуулганаа зохион байгуулж ирээдүй, хөгжлийн тухай олон асуудлыг хөндсөн Монгол Улс 2040 онд олимпийн наадмыг зохион байгуулахаар зэхэж байгаа тухай “TheAtlantic” сайт мэдээлжээ.

Уг нийтлэлд Ерөнхийлөгч Швейцарь улсад хийсэн айлчлалынхаа үеэр 2040 онд Улаанбаатар хотноо олимпийн наадмыг зохион байгуулах тухай санамж бичигт ОУОХ-ны Ерөнхийлөгч Жак Роггетой хамт гарын үсэг зурсныг тэмдэглэсэн байна.  Мөн Нийслэлийн Засаг дарга Э.Бат-Үүлийн барихаар зэхэж буй цогцолборыг 2040 онд Улаанбаатар зохион байгуулах хүсэлтэй байгаа олимпийн наадмын бүтээн байгуулалтын эхлэл хэмээн үзэж буйг онцолжээ.

25 жилийн дараа олимпийн наадам зохион байгуулах мөрөөдлөө биелүүлэхийн тулд Улаанбаатар хотын удирдлагууд Хүй долоон худгийн хөндийд “Монгол наадам” хэмээх цогцолбор барих талаар судалж байна.

Одоогоор монголчууд наадмын үеэр л очиж хурдан морь уралдахыг үздэг Хүй долоон худгийн 13.6 мянган га талбайд уг төсөл сүндэрлэх аж. Тус цогцолборыг барихад 130 сая ам.доллар шаардлагатай бөгөөд томоохон цогцолборыг БНХАУ-ын “Шанхай” групп” барихад бэлэн байгаа хэмээн нийслэлийн удирдлагууд ярьсан байна. Хэрэв энэ групп төслийг хэрэгжүүлэх шийдвэр гарвал, шаардлагатай хөрөнгийг жилийн 1.5 хүртэл хувийн зээлээр авах гэнэ.  

“Монгол наадам” цогцолбор төслийн дарга П.Цогтбаатарын ярьснаар одоогийн төлөвлөж байгаа төсөл нь зөвхөн эхний алхам гэлээ. Цаашдаа цогцолборыг өвлийн спортын ордон, морин тойруулга нэмж өргөтгөх бөгөөд бүр цаашдаа  улирал харгалзахгүйгээр бүх төрлийн спортоор хичээллэх боломж бүрдүүлэх юм байна.

Эхний төсөл 4-5 жилд хэрэгжих бөгөөд үүнд 30 мянган хүний суудалтай иж бүрэн инженерийн тоноглолтой цэнгэлдэх хүрээлэн, 5000 хүний суудалтай морь барианы талбай, 3000 суудалтай сур харвааны талбай, 2000 суудалтай шагай харвааны ордон, 200 өрөө бүхий орчин үеийн дээд зэрэглэлийн зочид буудал баригдах гэнэ. Мөн 500 гаруй тогтмол, 1000 гаруй улирлын чанартай ажлын байр бий болно.

Төслийн дараагийн ээлжийн бүтээн байгуулалтыг концессийн гэрээгээр хэрэгжүүлэх юм байна. Ингэснээр цогцолборыг тойрсон хүчирхэг аж ахуйн нэгжүүд байгуулагдана хэмээн Улаанбаатар хотын удирдлагууд харж байна.

Уул уурхайн томоохон төслөөрөө эдийн засгийн тэсрэлт хийснийгээ унагаахгүй авч явахыг эрмэлзэж буй Монгол Улс 2040 онд олимпийн наадам зохион байгуулах мөрөөдлөө биелүүлэхээр ингэж зорьж байна.

Г.Үжин

www.24tsag.mn