Арилжааны банкууд иргэдэд зээл олгохдоо үйлчилгээний зардал хэмээн нэг хувийн шимтгэл авдаг.

Уг асуудлыг аль хоёр жилийг өмнө буруу хэмээн ШӨХТГ-аас тогтоосон. Гэтэл арилжааны банкууд уг шийдвэрийг эсэргүүцэж шүүхэд хандсан. Улмаар өнгөрсөн сард банкуудын нэхэмжлэлийг хэрэгсэхгүй болгож Шударга өрсөлдөөн хэрэглэгчдийн төлөөх газрын зөв гэдгийг баталсан билээ. Гэтэл Монгол банкны холбооноос арилжааны банкуудаа өмөөрч харилцагчдынхаа эрхийг зөрчөөгүй гэсэн байр суурийг илтгэж байгаа юм. Тодруулбал, Монгол банкуудын холбооноос ШӨХТГ-ыг худал мэдээлэл тараасан мэт мэдэгдэл хийж, хяналт шалгалтын дүнг олон нийтэд мэдээлснийг буруутгаж байгаа.

Тэгвэл Шударга өрсөлдөөн хэрэглэгчдийн төлөөх газраас Монгол банкуудын холбооны уг мэдэгдлийг эсэргүүцэж ШӨХТГ-т хуулиар олгогдсон бүрэн эрхийг нь үгүйсгэж байгаа бөгөөд хараат бус бие даан үүргээ хэрэгжүүлэхэд саад учруулж байна гэлээ.

Мөн арилжааны банкуудын хууль бус үйлдлийг хамгаалсан мэдэгдэл хийсээр байгааг нь уг хэргийг хянан хэлэлцэх хяналтын шатны шүүхээс гарах шийдвэрт нөлөөлөхийг оролдсон гэж үзэж байгаа аж. Тиймээс Монгол банкуудын холбооны удирдлагуудад хариуцлага тооцуулахаар холбогдох эрх бүхий байгууллагад хандахаар болсон талаараа өнөөдөр мэдээлэл хийх гэж байна.

Хэрвээ арилжааны банкууд хууль бус зүйл хийсэн нь тогтоогдвол нэг хувийн шимтгэл төлсөн иргэд мөнөө буцааж авах боломжтой юм.

Т.Энхэлээ