“Монгол шуудан" ТӨХК-ийн ажилчид өнөөдөр ТӨХ-ны гадаа жагсаж, эсэргүүцлээ илэрхийллээ.

Тэд тус компанийн захирал Ц.Батсайханыг хууль бусаар ажлаас нь халсан шийдвэрийг эсэргүүцэн, өнгөрсөн долоо хоногийн баасан гаригт хүргүүлсэн шаардлагынхаа хариуг авах, дахин шаардлага хүргүүлэхээр цугласан юм.

Гэсэн ч ТӨХ-ны дарга нар ажилдаа ирээгүй тул тэд шаардлагаа гардуулж чадалгүй буцсан байна. Тиймээс "Монгол шуудан" ТӨХК-ийн ажилчид өнөөдөр ажлын байрандаа сануулах ажил хаялт зарлажээ.

Гэтэл ажил хаялтыг эсэргүүцэх түр хорооны дарга Д.Ганболд, хуулийн зөвлөх н.Нямдаш нарыг цагдаа нар баривчилсан байна. Харин ямар учраас баривчилсан, хэдий хугацаанд саатуулах талаар юу ч мэдэгдээгүй аж.

Чоно борооноор гэгчээр Ц.Батсайхан захирлын ажлыг авах гэж буй Т.Дуламдорж гэгч нь компанийн байр руу гурван удаа хууль бусаар нэвтрэх гэж оролдсон нь ажилчдын дургүйцлийг ихээр төрүүлжээ. Тэрбээр өнөө өглөө дээврээр дамжин дотогш орох гэж байгаад баригдсан байна.

Мөн өнгөрсөн  баасан гарагийн орой 19.00-20.00 цагийн хооронд ТӨХ-ны хэдэн хүнтэй хамт “Монгол шуудан" ТӨХК руу орох гэж байгаад бүтэлгүйтсэн бол тухайн өдөр ажил тарсан үед мөн нэвтэрч хууль бус үйлдлээ баталгаажуулах гэж оролдсон нь ч талаар болсон гэдгийг Монгол шуудангийн ажилчид ам нэгтэй хэлж байлаа.

Түүнчлэн тэд ТӨХ бидний хүсэлтийг хүлээн авч, Ц.Батсайхан захирлын гэрээг сунгахгүй бол бид суулт, ажил хаялт, өлсгөлөн зарлах гэх мэтээр шат дараатай тэмцэнэ гэдгээ мэдэгдлээ.

Б.Энхжин