Хэнтий аймгийн Прокурорын газраас  Шүүхийн шийдвэр гүйцэтгэх албатай хамтран ”Ялын хэрэгжилтийн байдал цаашид анхаарах асуудал” сэдэвт  зөвлөгөөнийг 2015 оны дөрөвдүгээр сарын 9-ний өдөр Шүүхийн шийдвэр гүйцэтгэх алба болон Цагдаагийн газрын эрх бүхий албан тушаалтнуудыг оролцуулан зохион байгуулан хийжээ.

            Зөвлөгөөнийг аймгийн прокурор Д.Энхбаяр нээж,  ял  эдлүүлэх ажиллагаанд тавих хяналт хариуцсан туслах прокурор Д.Энхжаргал  “Ял эдлүүлэх ажиллагаанд тавих хяналтын ажлын чиглэлээр хийсэн  ажлын үр дүн”,  Хорих 419 ангийн харуул хамгаалалт гүйцэтгэх ажлын хэлтсийн дарга, дэд хурандаа Н.Баярсайхан “Хэнтий аймаг дахь  Шүүхийн шийдвэр гүйцэтгэх  албанаас ялын хэрэгжилтийг хангуулах талаар авсан арга хэмжээ”, Шийдвэр гүйцэтгэгч Г.Балжмаа “Хорихос өөр төрлийн ялын  биелэлт”, Цагдан хорих байрны дарга хошууч К.Махбат “Баривчлах цагдан хорих байрны дотоод журмын хэрэгжилт”  сэдвүүдээр тус тус мэдээлэл хийсэн бөгөөд   мэдээлэл тус бүртэй холбогдуулан хэлэлцүүлэг өрнүүлж санал солилцсон байна.

Зөвлөгөөний явцад  2014 онд Хорих анги, цагдан хорих байрны шинээр батлагдан мөрдөж байгаа журмуудын зарим нэг заалтын талаар нэг мөр ойлголтод хүрсэн бөгөөд  2015 онд  хорихоос өөр төрлийн ялын биелэлтийг  сайжруулахад анхаарч  аймгийн прокурор, шүүхийн шийдвэр гүйцэтгэх албаны даргын  хамтарсан тушаал гаргаж мөрдөх,  мөн ялтныг  нийгэмшүүлэх ажилд оршиж буй хуучин ажлын арга барилыг өөрчлөн сайжруулахад чиглэсэн арга хэмжээг хамтран хэрэгжүүлэхээр  шийдвэрлэжээ.