Хэнтий аймгийн Прокурорын газраас тус аймгийн Хуулийн хэлтэстэй хамтран аймгийн хэмжээнд гэмт хэрэгтэй тэмцэх, урьдчилан сэргийлэх, таслан зогсоох үйл ажиллагааг эрчимжүүлэх зорилгоор “Гэмт хэргийн гаралтыг бууруулах нь” сэдэвт орон нутгийн хуулийн байгууллагуудын нэгдсэн зөвлөгөөнийг 2015 оны 04 дүгээр сарын 10-ны өдөр Чингис хотод зохион байгуулсан байна.

Зөвлөгөөнийг нээж аймгийн Засаг дарга Ж. Оюунбаатар үг хэлж, Аймгийн прокурор Д.Энхбаяр “2014 оны эрүүгийн нөхцөл байдал, гэмт хэргийг бууруулах чиглэлээр орон нутгийн төр захиргаа, хуулийн байгууллагын хамтын ажиллагааг сайжруулах” сэдвээр, аймгийн Цагдаагийн газрын дарга хурандаа П.Оростогоо “Хэнтий аймгийн хэмжээнд 2014 онд үйлдэгдсэн гэмт хэрэг, зөрчил, түүний шалтгаан нөхцөл, гэмт хэргийг буруулах, таслан зогсоох талаар цаашид авах арга хэмжээ” сэдвээр, Сум дундын 28 дугаар шүүхийн Ерөнхий шүүгч Н.Мөнхтулга “2014 онд хянан шийдвэрлэгдсэн эрүүгийн хэрэг, түүнд хийсэн дүн шинжилгээ” сэдвээр, Хэнтий аймаг дахь шүүхийн шийдвэр гүйцэтгэх албаны дарга, хошууч Н.Нандинболор “Ялтны аюулгүй байдлыг хангаж, тэдний дунд хууль ёс, дэг журмыг сахиулах, ялтнаас нийгэм, иргэдэд хохирол учруулахаас урьдчилан сэргийлэх, ялтанд хүмүүжлийн нөлөө үзүүлэх, нийгэмшүүлэх талаар 2014 онд зохион байгуулсан ажил, цаашид авах арга хэмжээ” сэдвүүдээр тус тус мэдээлэл хийлээ.

Зөвлөгөөнөөс Хэнтий аймгийн хэмжээнд үйлдэгдэж буй гэмт хэргийн гаралтыг бууруулах зорилгоор 2015 дараах зорилтыг дэвшүүлсэн. Үүнд :

 2015 онд гэмт хэргийг 30 хувиар бууруулах, орон нутгийн хуулийн байгууллагуудын хамтын ажиллагааг өргөжүүлж, гэмт хэргээс урьдчилан сэргийлэх хамтарсан багийг сум, байгууллагад ажиллуулах, хуваарийн дагуу байгууллага бүр сард нэг удаа байгууллага, сургууль, иргэдэд сургалт явуулж байх зэрэг асуудлуудыг дэвшүүлж цаашид хэрэгжүүлж ажиллахаар боллоо.