Чуулганы хуралдаанаар Тэтгэврийн даатгалын шимтгэлийн нэрийн дансны тухай хуульд нэмэлт оруулах тухай хуулийн анхны хэлэлцүүлгийг хийж 68.3 хувийн саналаар бүхэлд нь баталлаа. Хэлэлцэж буй асуудалтай холбогдуулан асуулт асууж, үг хэлэх гишүүн байсангүй.

Үүний дараагаар Төсвийн тухай хуульд нэмэлт, өөрчлөлт оруулах тухай, Хүний хөгжил сангийн тухай хуульд өөрчлөлт оруулах тухай хуулийн төслүүдийг хэлэлцэж мөн дэмжлээ. 

Мөн чуулганы хуралдаанаар Үндсэн хуулийн цэцийн 2015 оны 05 дугаар дүгнэлтийг УИХ хүлээн авсантай холбогдуулан Шүүхийн захиргааны тухай болон Шүүгчийн эрх зүйн байдлын тухай хуулиудад өөрчлөлт оруулах тухай хуулийн төслүүдийг хэлэлцэж батлав.

Хэлэлцэж буй асуудалтай холбогдуулан УИХ-ын гишүүн О.Баасанхүү асуулт асуув. Тэрбээр "Тус хуулиар Цалингийн нэмэгдлийг хүчингүй болгож байгаа юм байна. Ингэснээр цалингийн асуудлыг яаж шийдэхээр төлөвлөж байна. Цэц чинь нэг талд нь ороод шийдчихлээ. Хүчингүй болсон хуулийг одоо яаж шийдвэрлэх юм. Шүүгчийн цалинг 8 сая хүртэл нэмчихсэн гэж байгаа шдээ. Хүчингүй болгосноор үр дагавар нь яаж гарна гэж тооцоолж байна" гэв.

Түүний асуулталд УИХ-ын гишүүн Х.Тэмүүжин хариулахдаа "Үндсэн хуулийн цэцэд эхэлсэн маргаан цалинтай холбоотой байгаагүй. Ерөнхийлөгчөөс өргөн барьсан Шүүхийн багц хуулийн хүрээнд баригдсан Сахилгын хороо, Мэргэжлийн хороотой холбоотой асуудал. Ер нь шүүгчийн цалингийн нэмэгдлийг өгөөгүй байгаа. Учир нь ур чадварыг нь үнэлэх ямар нэгэн газар байгаагүй. Шүүгчийн цалинтай холбоотой асуудлаар Хууль зүйн байнгын хороо хууль боловсруулаад Засгийн газраас санал авахаар хүргүүлсэн" гэв. 

Ингээд хуулийн төслөөр санал хураахад гишүүдийн 70.4, 68.5 хувийн саналаар тус, тус дэмжиж дээрх хуулийн төслүүдэд өөрчлөлт орууллаа.

Т.Энхэлээ