Манай сайт төрийн албаныхны цомхотголын асуудлаар яам, салбар бүрээр нь онцлон хүргэж байгаа билээ. Яахын аргагүй хөндөх ёстой энэ л сэдвийн хүрээнд БОНХЯ, МХЕГ, ЭМЯ зэргийн халаа сэлгээ, төрийн албаныхны үндэслэлгүй ажлаас халагдах байдлыг илчилсэн.

 
Мөн Гадаад хэргийн яамны цомхотгол, эмх замбараагүй байдал, төрийн албаны мэргэшсэн байх зарчим зэргийн доголдлыг сийрүүлж байсныг уншигч та санаж байгаа биз ээ.

Жил бүр  Гадаад хэргийн яамнаас нийт Дипломат төлөөлөгчдийн газарт ээлжит болон ээлжит бус дотоодын аудитын хяналт шалгалтыг хийдэг. Тэгвэл энэхүү шадгалтийг хийхдээ эрхэм сайд Л.Пүрэвсүрэн алба хаагчдынхаа дургүйцлийг багагүй хүргээд авсан гэлцдэг.

Тэрбээр 43 дипломат ажилтныг “Өөрсдийн зардлаар ирж шалгалт өг, эсвэл ажлаа өг” хэмээсэн талаар хэвлэлийнхэн онцлоод байгаа. Гэтэл дипломат албаны тухай хуульд ийм төрлийн шаардлага огт байх ёсгүйг учир мэдэх хүмүүс хэлж байгаа юм.

Түүний ийн дураарай авирлаж байгаад эгдүүцсэн хэсэг нөхөд УИХ-ын дарга хийгээд холбогдох газруудад гомдол саналаа яваа гэх бор шувуу ч нисч байсан.

Үүгээр зогсохгүй тэрбээр төрийн албаныхныг хоморголон халсан асуудлаараа Төрийн албаны зөвлөлөөс “банга” хүртэх шинжтэй байсныг  энд дурдах нь зүйтэй биз ээ. Гэвч уулзалт, ярилцлага бүртээ өөрийгөө өмөөрч байгаа нь асуудал түүнээс холуур өнгөрч буйг илтгэж байна.

Хамгийн гол нь ажилчдаа халах, эргүүлэн томилох явцад 32 хүн ажилгүй болж үлдсэн гэдэг. Эдгээр халагдсан ажилчдын хувьд Төрийн албаны зөвлөлд хандаж Төрийн албаны болон Үндсэн хуулийн хэд, хэдэн заалтуудыг зөрчсөн гэдгийг тогтоолгож, хууль бусаар халсан гэдгийг нь баримтжуулаад байгаа юм.

Гэвч Л.Пүрэвсүрэн тэргүүтэй удирдлагууд нь уг шийдвэрийг хэрэгжүүлэхдээ хойрго хандаад байгаа учир хохирсон ажилчдын зүгээс шүүхэд хандахаар болоод байна. Харин ажилчид уг асуудлаа шүүхээр эцэслэн шийдүүлсэн ч  Л.Пүрэвсүрэн зэргийн эрх мэдэлтнүүд хүлээж авахгүй байсаар байвал Өргөдлийн байнгын хорооны зүгээс хууль биелүүлээгүй гэдэг үндэслэлээр холбогдох газруудад хандана гэдгээ онцлоод байгаа билээ.

Ажлаас халагдсан иргэдийн хувьд энэ бүхнийг улс төр, нам эвсэлтэй холбон тайлбарлаж байна.

Юутай ч мэргэшсэн төрийн албан хаагчдыг хольж сольж чиглэлийг нь өөрчилж томилох эрх байхгүй гэдгийг Гадаад хэргийн яамнаас үндэслэлгүй халагдсан гэх иргэд дахин, дахин онцоллоо. Харин  эрхэм сайд Л.Пүрэвсүрэн өчигдөр “Сайдын цаг” уулзалтад оролцохдоо энэ талаар дахин сөхөв. Тэрбээр “Тус яам 142 хүний орон тоотой ч 157 хүн ажиллаж байсан. Миний хувьд сайдаар очоод илүү орон тоог хассан. Ингэхдээ ахмадуудыг тэтгэвэрт нь гаргаж, төрийн албаны шалгалт өгөөгүй хүмүүсийг чөлөөлсөн” гэх тайлбарыг өглөө. Гэтэл илүү гарсан орон тоо нь 15, харин халагдсан ажилчид энэ тоог нэг нугалсан байгаа талаар эх сурвалжууд хэлээд байгаа билээ.

Мөн гадаадад суугаа элчин сайдын яамны ажилчид, сайдуудыг хоморголон халах гэж байна гэх яриа гараад байгаа. Үүнд Л.Пүрэвсүрэн “Гадаадад суугаа Элчин сайдын яамдын ажилтнууд шаардлага хангахгүй байна. Элчин сайдын яамдад төрийн байгууллагад ажиллаж үзээгүй, тухайн үеийн удирдлагууд нь томилчихсон, компьютер дээр ажиллаж чаддаггүй, мэргэжлийн дипломатын шалгалт өгөөгүй 70 гаруй хүн байгаа. Тиймээс тэднийг дипломат албаны шалгалтад оруулах шаардлага тавьсан. Шалгалтдаа тэнцвэл үргэлжлүүлэн ажилла, тэнцэхгүй бол зайгаа тавьж өг гэдэг зарчим барьж байгаа. Тэднийг ирэх зургаадугаар сард амралтаа зохицуулаад Монголдоо ирж шалгалтаа өгөөрэй гэсэн" гэв.

Харин түүний ярьж буйг сонссон иргэд Л.Пүрэвсүрэнгийн дараагийн онилсон бай нь Гадаадад суугаа элчин сайдууд бололтой гэцгээж байв. 

24tsag.mn