УИХ-ын чуулганы үдээс хойшхи хуралдаанд Ерөнхий сайд Ч.Сайханбилэг мэдээлэл хийлээ.

Ерөнхий сайдын мэдээлэлтьэй холбогдуулан гишүүд асуулт асууж, хариулт авч байна.

Тухайлбал, УИХ-ын гишүүн Л.Энх-Амгалан:- "Иргэд болоод аж, ахуй нэгжүүд аль хэдийн бүсээ чангалчихсан байна. Харин Монголын төр яагаад бүсээ чангалж болдоггүй юм бэ. Төр цамаан байна. Сая орж төсвийн хүрээний мэдэгдлээс харахад төр хэмнэлтийн горимд шилжиж хэлээгүй нь харагдаж байсан. Хувийн хэвшлүүд нийгмийн даатгалын татварын өртэй их байна. Төрийн ажлыг хийгээд мөнгөө олж авч чадахгүй яваа байгууллагууд ч байна. Байгууллагууд бүгд нийлээд төсвөөс 300 гаруй тэрбум төгрөгийг авах ёстой. Ерөнхий сайд зовлон л яриад байна. Шийдэж чадахгүй байна. Монгол улсын төрийн сан шийдвэр гүйцэтгэж чадаж байна уу ер нь. Ерөнхий сайд татвар нэмэхгүй гэж мэдэгдэж байсан. Гэтэл мэдэгдэл хийснийх нь маргаашнаас Хөрөнгийн татвар, Нийслэлийн татвар нэмэх тухай яриад эхэллээ" гэж асуув.

Түүний асуултад Ерөнхий сайд Ч.Сайханбилэг хариулахдаа "Дэлхийн банкны захирал болон санхүүгийн офицерууд Монголд ирж ажиллаж байна. Бид авах боломжтой бүх арга замын талаар ярилцаж санал солилцож байна. Өргөн хүрээтэй ярьж байгаа. Татвар нэмэхгүй гэж би хэлсэн.  Одоо чуулганы хуралдаанаар хэлэлцэж буй асуудлууд бол өнгөрсөн жил санаачилсан хуулиуд. УИХ дээр нилээн удаан ярилцсан. Үүнийг ялгаж, салгах хэрэгтэй. Дахин татвар нэмэх хуулийн төсөл санаачлахгүй гэдгийг хариуцлагатайгаар мэдэгдье. Төрийн сангийн төлбөр тооцоо хэвийн явагдаж байгаа. Цалин мөнгө хэвийн тавигдаж байгаа" гэлээ.

Чуулганы хуралдаан үргэлжилж байна.

Т.Энхэлээ