УИХ-ын чуулганы өнөөдрийн хуралдаанаар Цагаан суваргын ордын асуудлаар УИХ-ын гаргасан шийдвэр Үндсэн хуулийн холбогдох заалтыг зөрчсөн эсэх маргааныг хянан шийдвэрлэсэн тухай цэцийн дүгнэлтийг хэлэлцлээ.

УИХ-ын дэд дарга Л.Цог Цагаан суваргын ордод төр хувь эзэмшихгүй болсонтой холбогдуулан Үндсэн хуулийн Цэцэд хандсаныг авч хэлэлцээд Үндсэн хуулийг зөрчөөгүй байна гэж үзсэн юм. УИХ-ын хаврын чуулганы хаалтын өдөр Цагаан суваргын ордод төрийн эзэмшлийн хувь, хэмжээг тогтоох тухай УИХ-ын тогтоолын төслийг баталсан. Тогтоолын төсөлд төр цагаан суваргын ордод 34 хувийг эзэмшинэ гэж заасан байсан ч хэлэлцүүлгийн явцад төрийн хувь, эзэмшил байх шаардлагагүй гэж үзсэн. Ингэснээр УИХ Үндсэн хууль зөрчсөн хэмжээн Л.Цог гишүүн үзэж байгаа юм.

Хэлэлцэж буй асуудалтай холбогдуулан УИХ-ын гишүүд асуулт асууж, үг хэллээ.

Тухайлбал, УИХ-ын гишүүн Ж.Батзандан "УИХ ард түмний өмчийг Нямтайшир, Н.Номтойбаяр хоёрт өгөх шийдвэрийг гаргасан. Та хоёрт аз, жаргал хүсье. Идээд цадаарай. Монголын баялагаар бага тоглоорой гэж хэлье. Нямтайшир сайн хүн байж болно. Гэхдээ нэг хүн, нэг компанид төрийн ордыг өгдөггүй юм. Ийм төртэй байж болохгүй. Улстөрчдийн моорог болсон Н.Жанцан, н.Амарсанаа нарыг зайлуулах цаг болсон. Болж, бүтэхгүй зүйлийг Үндсэн хуулийн цэц засч залруулж явах ёстой. Гэтэл Үндсэн хуулийн цэц Х.Тэмүүжин сайдын хэлснээр моорог болчихож. Цагаан суваргын ордоо хэдхэн төгрөгөөр үнэлээд цөөхөн хүнд өгдөг болсон байна. Одоо үүнийг залруулах нэг л арга байна. УИХ шийдэрээ хүчингүй болгох. Миний бие уг шийдвэрийг хүчингүй болгохоор ажиллана. УИХ-д ухаантай хүмүүс байгаа. Үндсэн хуулийн цэц дотор ч эрүүл ухаантай хүн байгаа байх. Газрын доод баялаг ард түмний өмч юм байна. Ард түмний өмчийг ингэж хувийн компанид өгч болохгүй. Дуайн гэрээ хулгайн гэрээ болсон. Оюутолгой дууссан. Цагаан сурварга хувьд очлоо. Улс энэ ордыг илрүүлэх гэж 8 жил хайгуул хийсэн" гэлээ.

УИХ-ын гишүүн Ж.Энхбаяр "Стратегийн ордуудын хайгуулыг улс хийчихээд 51 хувийг хувийн аж, ахуй нэгжүүдэд өгдөг шинэ загварыг энэ шийдвэрээр гаргалаа гэж ойлгож болох уу" гэж асуув.

Түүний асуултад Хууль зүйн байнгын хорооны дарга Б.Ганбат хариулахдаа "Эрх бүхий байгууллага нь шийдвэрээ гаргасан" гэв.

Гишүүд үг хэлж, асуулт асууж дууссанаар дараагийн асуудлыг хэлэлцэж эхлэв. УИХ-ын чуулган үргэлжилж байна.

Т.Хулан