Ерөнхий сайд асан С.Баярыг АНУ-д тансаг зэрэглэлийн долоон хаустай. Уг байшингуудаа мөнгө угаах аргаар авсан байж болзошгүй. Цаашлаад Оюутолгойн гэрээг хийснээс хойш уг байшингуудыг эхнэр, охин, найз бүсгүйнхээ нэр дээр авч өгсөн гэх мэдээллийг УИХ-ын гишүүн Г.Уянга анх олон нийтэд ил болгосон билээ.

Түүнийг мэдээлэл хийсний дараа С.Баяр тайлбар хийж “Би яс шалгуулна. Холбогдох газарт нь өргөдлөө өгнө” хэмээн мэдэгдсэн ч өнөөдрийг хүртэл шалгуулсан эсэх нь тодорхойгүй байна. Цаашлаад түүнийг нэр, төрөө сэргээлгэхээр АТГ-д хандсан гэж байсан ч шалгасан эсэх нь эргэлзээтэй байгаа юм.

УИХ-ын гишүүн Г.Уянга өөрийн цахим хуудсанд “АТГ-аас ирж С.Баярын байшингуудын талаарх мэдээллийг аваад явлаа” гэж бичиж байсан. Гэтэл АТГ-аас одоог хүртэл уг хэргийн талаар албан ёсны тайлбарыг өгөөгүй "таг, чиг" байгаа юм. Уг нь Г.Уянга болон С.Баярын өөрийнх нь гаргасан хүсэлтийг ч болтугай харгалзаад шалгах ёстой баймаар. Гэтэл АТГ-аас “С.Баярыг шалгаж байна” гэх мэдээллээс өөр хариултыг өнгөрсөн хугацаанд огт өгсөнгүй.

Уг нь С.Баярын тансаг байшингуудын тухай баримтыг Г.Уянга гишүүнд хүргүүлсэн гээд байгаа цахим залуус С.Баярын АНУ дахь эдлэнгийн хаяг, утасны дугаарыг тун тодорхой гаргаж ирсэн байв. Алдарт долоон байшингийн хаяг хийгээд үл хөдлөхийн дуудлага худалдааны баримт, төрийн албадаас авсан тодорхой мэдээлэл гээд АТГ-ын  энэ мэдээллийн үнэн зөвийг тодорхойлоход амар юм шиг санагдаад байгаа юм.

Харамсалтай нь өнгөрсөн хугацаанд “С. Баяр яасан байх нь вэ” гэдгийн хариуг хэн ч сөхөж тодорхой мэдээлэл өгсөнгүй, өгөх шинж ч алга. Түүний байшингуудын тухай бүү  хэл мань хүн өөрөө  хаана байгааг ч иргэд мэдэхгүй, үнэн худлын аль нь болохыг ард түмэн ойлгохгүй байна. Тиймээс  С.Баяр албан ёсоор АТГ-т өргөдөл гаргасан эсэх, АТГ Г.Уянга гишүүний нийтэд цацсан мэдээллээр түүнийг шалгаж эхэлсэн үү гэдэг оньсого хэвээрээ. С.Баяр  болоод түүний ах дүүгийн нэр дээрх олон тэрбумын байшингууд нь эзэнтэй, эзэнгүйн аль нь болох хэн нь худал  яриад байгааг нэг талд нь гаргах хүсэл манай АТГ-т байхгүй юу эсвэл тодорхой хугацаанд мэдээллээ нууцлаж байгаа юу гэдгийг мэдэх аргагүй байна.

Т.Сар