УИХ-ын чуулганы хуралдаанаар “Төрөөс аж үйлдвэрийн талаар баримтлах бодлого батлах тухай” УИХ-ын тогтоолын төслийн анхны хэлэлцүүлгийг хийлээ.

Тус бодлого нь аж үйлдвэрийн салбарыг дэвшилтэт тенхик, өндөр технологи, өрсөлдөх чадвар бүхий үйлдвэрлэл, үйчилгээг бий болгож Монгол Улсын тогтвортой хөгжлийг хангах тэргүүлэх салбар болгон хөгжүүлэхэд чиглэгдэж байгаа юм. Өөрөөр хэлбэл, өнөөгийн түвшинд манай улс, уул уурхай, оёмол нэхмэл, хүнс гэх зэрэг цөөн бүтээгдэхүүнийг гадагш нийлүүлж байгаа. Үндсэндээ аж үйлдвэрийн бүтээгдэхүүн гадагш гаргах нь битгий хэл сүүлийн жилүүдэд энэ салбар дотооддоо зогсонги байдалтай байгаа юм. Иймд Аж үйлдвэрийн яамнаас уг бодлогын баримт бичгийг боловсруулж, тус бүр 5 жилийн хугацаатай 2015-2030 онд хэрэгжүүлэхээр тусгажээ.

Хэлэлцэж буй асуудалтай холбогдуулан УИХ-ын гишүүн Д.Лүндээжанцан, “Дорноговь аймагт Аж үйлдвэрийн парк барина гэсэн тэр асуудал юу болсон бэ. Мөн уул уурхайн ордуудаа түшиглэж хөнгөн үйлдвэрүүдээ хөгжүүлэх бодлого суусан уу” гэсэн асуулт тавилаа.

  Түүний асуултад Эдийн засгийн байнгын хорооны дарга Ж.Батсуурь хариулахдаа “Аж үйлдвэрийн яам байгуулагдаад 6 сар болж байна. Харин ч богино хугацаанд Төрөөс аж үйлдвэрийн талаар баримтлах бодлогоо боловсруулж оруулж ирсэн. Сайншандад Аж үйлдвэрийн парк барих тухай ярьж байгаа. Дорноговь аймгийн Өргөн суманд цементийн үйлдвэр ашиглалтад орох гэж байна. Мандах суманд мөн нэг үйлдвэр баригдана. Үүн шиг дараа дараагийн үйлдвэрүүд баригдаад явна. Бодлого батлагдвал хөнгөн болон хүнсний үйлдвэрүүд барьж, ажлын байр нэмэгдэх зэргээр олон асуудал дагуул хэлбэрээр шийдэгдэнэ. Сайншандад хүнд үйлдвэрийн парк байгуулах 10-аад үйлдвэрийн нэр жагсаалт гаргаад, судлуулахаар олон улсын байгууллагад хандсан юм билээ. Гэтэл зарим үйлдвэр нь тээврийн зардал, усны хэрэглээ зэргээс бэрхшээлтэй асуудал тохиолдсон юм билээ. Хэрлэнг татаж ашиглах боломжгүй гэсэн хариу өгсөн учраас хойшилсон асуудал бий. Бор-Өндөр бол баяжуулах, боловсруулах үйлдвэртэй. Гэхдээ төмрийн үйлдвэр байгуулах асуудал яригдаж байгаа” гэлээ.

Харин УИХ-ын гишүүн Ё.Отгонбаяр, “Төрөөс аж үйлдвэрийн талаар баримтлах бодлого батлах тухай” УИХ-ын тогтоолын төсөл дээр чинь зарчмын зөрүүтэй 40 санал байна. Нөхөөстэй дугуй шиг энэ асуудлаа дахиж оруулж ирвэл яасан юм бэ” гэж асуув.

Эдийн засгийн байнгын хорооны дарга Ж.Батсуурь, “Аж үйлдвэрийн яам цаг хугацаа хэмнэж асуудлыг оруулж ирсэн. Дахиж оруулж ирвэл яасан юм бэ гэсэн асуудал байнгын хорооны хуралдаан дээр яригдсан. Гэхдээ дэмжигдээгүй” хэмээв. Мөн үеэр зарим гишүүд дутуу боловсруулж оруулж ирсэн асуудлыг чуулганаар хэлэлцэж байгаа нь цаг хугацаа авч байна гэсэн бол нөгөө хэсэг нь хэл найруулгын хувьд хангалтгүй байна хэмээн шүүмжилсэн. Гишүүд үг хэлсний дараагаар Эдийн засгийн байнгын хороон дээр гарсан 40 зарчмын зөрүүтэй санал тус бүр дээр тогтож ярилцан,  асуулт асуулаа.

Т.Энхэлээ