Өнөөдрийн УИХ-ын ээлжит чуулганы үдээс хойших хуралдаанаар Ерөнхий сайд Ч.Сайханбилэг Засгийн газраас хэрэгжүүлж буй орон сууцны хөтөлбөрийн талаар мэдээлэл хийлээ.

Ерөнхий сайд хүн амыг орон сууцжуулах хүрээнд олон талт төрийн бодлого баримталж байгаагаа онцоллоо. Тэрээр “Эдийн засгийн хүндрэлтэй байгаа энэ үед төр иргэддээ дэмжлэг үзүүлэх хэрэгтэй байна. Тиймээс орон сууцны урьдчилгаа 30 хувийг багасгаж, 10 болгоно. Энэ нь зээлийн тогтолцоонд өөрчлөлт гарахгүй. Учир нь, урьдчилгаа 20 хувьд төр баталгаа гаргах юм” хэмээн хэллээ. 

Түүнчлэн Засгийн газраас түрээсийн орон сууцыг хөгжүүлэх, орон нутагт орон сууцны хорооллын дэд бүтцийг шийдэхээр төлөвлөж байгаа гэлээ.

Засгийн газраас хэрэгжүүлсэн орон сууцжуулах хөтөлбөрийн хүрээнд өнгөрсөн хугацаанд 67612 мянган иргэнд 2 их наяд гаруй төгрөгийн ипотекийн зээл олгожээ. Мөн 1700 гаруй иргэнд буцалтгүй тусламж үзүүлсэн байна.

Улсын хэмжээнд ипотекийн хугацаа хэтэрсэн зээл 1.5, чанаргүй зээл 0.5 хувийг эзэлж байгаа аж. Ипотекийн зээлийн 72 хувийг найман хувийн зээл бүрдүүлж байна.