Монгол Улсын Ерөнхийлөгч Ц.Элбэгдоржид Европын Парламентын Нэгдсэн чуулганд оролцож, үг хэлэх урилга өнгөрсөн сард ирсэн билээ.  Энэ нь Европын Холбооноос Монгол Улсад үзүүлж буй томоохон хүндэтгэлийн хэлбэр бөгөөд өмнө нь Европын Парламентын чуулганд Ази тивээс хоёр улсын төрийн тэргүүн л үг хэлж байсан юм.

Европын холбооны гишүүн 28 орныг төлөөлсөн 751 гишүүнтэй Европын парламентын нэгдсэн хуралдаан хоёр дахь өдрөө Бүгд Найрамдах Франц Улсын Страсбург хотод  үргэлжилж байгаа бөгөөд яг одоо Ерөнхийлөгч Ц.Элбэгдорж уг чуулганд үг хэлж байна.

Монгол Улсын ардчиллын өнөөгийн байдал, мөн ардчиллыг бүс нутагтаа түгээн дэлгэрүүлэх үйлсэд оруулж буй Монгол Улсын идэвх, оролцоог Европын Холбоонд танилцуулж, дэмжлэг авах гол санааг Ерөнхийлөгч үгэндээ онцолж байна.

Монгол Улс ардчилсан хөгжлийн замыг сонгосны 25 жилийн ой энэ жил тохиож байгаа бөгөөд энэ үйл явдлыг тохиолдуулан Монгол Улсын Ерөнхийлөгчийг үг хэлэхийг урьсаны дагуу тэрбээр үг хэлж байгаа нь энэ юм.

Европын Холбоотой харилцан хамтын ажиллагаагаа ийнхүү батжуулж, сайжруулах нь улс төрийн төдийгүй, эдийн засаг, хөрөнгө оруулалтын хувьд нааштай үр дүн авчрах байх хэмээн албаныхан үзэж байгаа юм.

Т.Хулан