УИХ-ын чуулганы өнөөдрийн нэгдсэн хуралдаан эхэллээ. Хуралдаанаар Засгийн газраас өргөн мэдүүлсэн Монгол Улсын эдийн засаг, нийгмийг 2016 онд хөгжүүлэх үндсэн чиглэл батлах тухай” Улсын Их Хурлын тогтоолын төслийн эцсийн хэлэлцүүлгийг хэлэлцэж байна.

Өнөөдрийн хэлэлцэх асуудлуудтай холбогдуулан  зарим гишүүд санал хэллээ. Тухайлбал, УИХ-ын гишүүн Ё.Отгонбаяр “Тавантолгойн гэрээний төслөө хэзээ хэлэлцэх вэ даргаа. Аахар, шаахар зүйл хэлэлцсээр байтал хаврын чуулган завсарлалаа. Ядаж хэлэлцэх эсэхийг нь хэлэлцээд шийдчихье.

УИХ-ын дарга З.Энхболд: Л.Эрдэнэчимэг байна уу?

УИХ-ын гишүүн Ё.Отгонбаяр: Л.Эрдэнэчимэг гэдэг хүн чинь УИХ-аар хэлэлцэх асуудлыг мэддэг болчихсон юм уу?

З.Энхболд: Энэ 7 хоногт УИХ-аар хэлэлцэх асуудлын жагсаалтад “Тавантолгой”-г тусгасан. Харин яагаад хуралдаагүйг Ажлын хэсгээс асуу. Тэдний хооронд ийм яриа болж өнгөрөв.
 

Мөн УИХ-ын гишүүн, МАН-ын бүлгийн дарга С.Бямбацогт “Төрөөс тэтгэврийн шинэчлэлийн бодлого талаар баримтлах бодлого батлах тухай тогтоолын төслийг энэ долоо хоногт эцсийн хэлэлцүүлгийг нь хийх гэж байна. Энэ бодлогод эрэгтэй, эмэгтэй хүмүүсийн тэтгэвэрт гарах насыг ижил болгох асуудал орсон. Уг асуудлаар ярилцаж, засч залруулах хэрэгтэй болсон учраас МАН-ын бүлэг завсарлага авсан байгаа. Мөн Д.Батцогт даргад таван асуудлыг эргэж харахгүй бол болохгүй гэсэн албан бичиг явуулсан. Харамсалтай нь байнгын хороо хуралдаж чадсангүй. Гэтэл бидний завсарлагийн хугацаа дуусчихлаа. Энэ нэг их тулгамдсан асуудал биш шүү дээ. Тиймээс нухацтай сайн хэлэлцэх хэрэгэй. Уг асуудлыг хэрхэн шийдэх вэ” гэв.

Харин УИХ-ын дарга З.Энхболд “Завсарлагын хугацаа одоо дуусч байна. Тэтгэвэрт гарах насыг ижил болгох асуудлаар бодлого баталж байгаа. Түүнээс хууль батлаагүй. Хуульд өөрчлөлт оруулж байж батлана” гэв.

Т.Энхэлээ