Монголын улс төрийн ууган хүчин Монгол Ардын Нам “Бид хамтдаа” зургаан сарын аян зарлаад байгаа билээ. Аяны хүрээнд УИХ дахь МАН-ын бүлгийн дарга С.Бямбацогт тэргүүтэй ажлын хэсэг нийслэлийн зүрхэн хоймор болсон Чингэлтэй дүүргийн иргэдтэй хийх уулзалтаа нэгдүгээр хорооноос эхлүүлж, тэдний санал бодлыг сонслоо. “Бид хамтдаа” аяны зорилго нь жирийн иргэдийн санал хүсэлтийг сонсож, тухайн орон нутагт тулгамдаж байгаа асуудлыг өөрсөдтэй нь зөвлөлдөж шийдэл гаргахад чиглэгдэж байгаа юм.

Иргэдийн тухайд сонгуулийн тогтолцоог ард түмнээсээ асууж шийдэх МАН-ын байр суурийг дэмжиж, УИХ-д намын жагсаалтаар сонгогддог байдлыг халах саналтай байгаагаа илэрхийлсэн. Мөн тэтгэврийн зээлийн хүүг бууруулах санал санаачилгаа ажил хэрэг болгохыг захиж байв.

АН засаг толгойлсон сүүлийн гурван жил ард түмний амьдрал өдрөөс өдөрт уруудаж байгааг ч иргэд дуулгаж байсан. Хүмүүсээ ажлын байраар хангаж чадахгүй байж эрэгтэй эмэгтэй хүмүүсийн тэтгэврийн насыг ижил болгох бодлогыг олонхи УИХ дээр хүч түрэн шийдэж байгаад иргэд сэтгэл дундуур байна. Түүнчлэн оюутнууд нийтийн тээврээр үнэгүй зорчиж байхад сурагч дүү нар нь төлбөртэй зорчих нь зохисгүй гэсэн УИХ дахь МАН-ын бүлгийн бодлогыг тэд дэмжиж байгаагаа илэрхийлсэн. Уулзалтын үеэр Монгол Улс урт хугацааны тогтвортой хөгжлийн бодлоготой болохын  чухлыг, үүнийг ажил хэрэг болгохын төлөө зүтгэж буйгаа Ардын намын бүлгийн дарга С.Бямбацогт тодотгосон юм.

Иргэдийнхээ дунд орж амьдралд нийцсэн бодлого боловсруулахад "Бид хамтдаа" аян чухал үр дүнтэйг олон хүн хэлж байлаа.