Засгийн газрын хэрэг эрхлэх газрын дарга С.Баярцогт цаг үеийн асуудлаар мэдээлэл хийсэн.

Тэрбээр Шийдлийн засгийн газар эдийн засгийг эрчимжүүлэх, тулгамдсан асуудлыг шийдвэрлэх, гадны орнуудад өөрийн улсын нэр хүндийг сэргээх чиглэлээр эрчимтэй ажиллаж байгаа. Ерөнхий сайд гадны хөрөнгө оруулалтыг татах чиглэлээр маш олон ажил зохион байгуулж байгаа гэсэн юм. Энэ ч үүднээс Ерөнхий сайд Ч.Сайханбилэг ирэх долоо хоногт ОХУ-д айлчилж, Санктпетербургийн эдийн засгийн форумд оролцох гэж байгаа аж. Тэрбээр уг форумын үеэр ОХУ-ын Ерөнхийлөгч В.Путинтай уулзаж, хоёр орны эдийн засгийн хамтын ажиллагааны талаар санал солилцох юм. Үүний дараа АНУ, Их Британи Умард Ирландын Нэгдсэн вант улсад айлчлахаар төлөвлөөд байгаа гэнэ. Айлчлалын үеэр Ерөнхий сайд Монгол улсын эдийн засгийн ач холбогдолтой хэд, хэдэн алхам хийх юм байна.

Т.Энхэлээ