Чуулганы хуралдаанаар Монгол Улсын цөмийн зэвсгээс ангид байх статусыг шинэ түвшинд гаргах тухай” УИХ-ын тогтоолын төслийг хэлэлцэх эсэхийг хэлэлцлээ.
Тогтоолын төслийг танилцуулгыг хууль санаачлагч М.Батчимэг танилцууллаа. Тэрбээр “Монгол Улс гадаад бодлогодоо аюулгүй байдлаа улс төр, дипломатын аргаар бэхжүүлэхэд чухал ач холбогдол өгдөг. Энэ бодлогын хүрээнд нутаг дэвсгэрээ аль нэг улсын эсрэг ашиглуулахгүй байх, гадаадын цэрэг, зэвсэг, түүний дотор цөмийн болон үй олноор хөнөөх бусад зэвсгийг нутаг дэвсгэртээ байрлуулахгүй байх үүднээс 1992 онд Монгол Улс нутаг дэвсгэрээ цөмийн зэвсэггүй хэмээн зарлаж, түүнийгээ олон улсын хэмжээнд хүлээн зөвшөөрүүлж баталгаажуулах талаар тууштай арга хэмжээ авч ирсэн. Дотооддоо 2000 онд Цөмийн зэвсгээс ангид байх тухай хууль гаргаж, түүнийг хэрэгжүүлэхтэй холбогдуулж Монгол Улсын Их Хурлын 19 дүгээр тогтоол батлан хэрэгжүүлсэн. Монгол Улсын цөмийн зэвсгээс ангид байх тухай бодлого, нэн ялангуяа энэ талаар гарсан 2000 оны хууль болон тогтоолыг Олон Улсын Парламентын Холбоо (ОУПХ), НҮБ-ын Зэвсэг хураах алба болон Дэлхийн ирээдүйн төлөө зөвлөл өндрөөр үнэлж, 2013 онд “Ирээдүйг тодорхойлсон бодлогын шагналтан”-аар тодруулсан. Дээрх хууль болон тогтоолын хэрэгжилтийг Гадаад хэргийн яам нэг удаа, Монгол Улсын Их Хурлын Аюулгүй байдал, гадаад бодлогын Байнгын хороо гурван удаа гаргаж үзээд зохих ёсоор хэрэгжиж байна хэмээн дүгнэсэн. Үүний зэрэгцээ өнөөгийн гадаад шинэ нөхцөл байдалд зарим нэмэлт, өөрчлөлт оруулах нь зүйтэй гэж үзлээ. Хууль болон тогтоолын хэрэгжилтийг дүгнэхийн зэрэгцээ цөмийн зэвсгээс ангид байх статусыг цаашид бүс нутгийн хэмжээнд урагшлуулах замаар тус улсын аюулгүй байдлыг бүс нутгийн аюулгүй байдалтай холбох, хөрш зэргэлдээ ОХУ, БНХАУ болон Бүгд Найрамдах Казахстан Улстай хил орчмын цөмийн байгууламжуудын талаар мэдээлэл солилцож байх, цөмийн аюулгүй байдлыг бэхжүүлэхэд анхаарах, тус улсын нутагт болон хил залгаа улсуудад байгаа чичирхийллийн, нил авианы болон радионуклидын станцуудын мэдээллийг улс орны аюулгүй байдал, нийгэм, эдийн засгийн хөгжилд ашиглах талаар Монгол Улсын Засгийн газарт чиглэл өгөх нь зүйтэй” гэв.
Хэлэлцэж буй асуудалтай холбогдуулан УИХ-ын гишүүн Д.Лүндээжанцан асуулт асуулаа. Тэрбээр “Цөмийн материалыг биечлэн хамгаалах тухай проткол байгаа. Цөмийн бага хэмжээний шинэчлсэн протколд нэн яаралтай нэмэгдэж орох гэдгийг юу гэж ойлгох вэ” гэв.
Түүний асуултад УИХ-ын гишүүн Р.Амаржаргал хариулахдаа “Конвенцид нэгдэж орох нь ашигтай” гэлээ.
Тогтоолын төслийг хэлэлцэх эсэхээр санал хураахалд гишүүдийн олонх буюу 79,6 хувь нь дэмжсэн учир Аюулгүй байдалд гадаад бодлогын байнгын хороонд шилжүүллээ.
