Өнгөрсөн  долоо хоногт болсон Хууль зүйн байнгын хорооны хуралдааны үеэр Хотын дарга Э.Бат-Үүл УИХ-ын гишүүн Ц.Нямдорж нарын хооронд ширүүн маргаан болсон. Тэд Үл хөдлөх эд хөрөнгийн барьцааны тухай хуульд нэмэлт оруулах тухай хуулийн төслийн анхны хэлэлцүүлгийг хийх үеэр санал зөрөлдсан юм.

Засгийн газраас өргөн мэдүүлсэн энэхүү хуулийн төсөлд гэр хорооллын иргэн газраа барьцаалж зээл авдаг тогтолцоог нээлттэй болгох зорилго агуулж байна.

Тухайн үед болсон маргааныг эргэн сануулбал,

Харин УИХ-ын гишүүн Ц.Нямдорж: -0,07 га газар чинь барьцаанд тавигдаад гэрээгий нь нотариат баталгаажуулсан бол үл маргах журмаар газрыг нь авах юм хийж байна. Энэ чинь зөв юм уу. Гэр хороллын дахин төлөвлөлт гэж нэг юм яваад байдаг, дахин төлөвлөлтийн хууль УИХ-д орж ирээд хоёр жил дарагдлаа. Ажлын хэсэг нь ажилладагггүй. Ийм хууль УИХ батлах юм бол цаашдаа 0.07 га газар байхгүй болно. Иргэд 40 м2 орон сууц авах гээд барьцаанд тавина. Сүүлдээ газар ч байхгүй, орон сууц ч байхгүй болно. Сонгуулийн мөчлөг дуусч байна, ирэх жилийн сонгуулийн үр дүн яаж гарах юм байгаа. Өмнөх хүмүүсийн хийж байсан юм одоо хамаагүй гээд иргэдийг хохироодог. Нотариатаар гэрээгээ баталгаажуулсан байна, хураана гэдэг. Шүүхийн шийдвэр гүйцэтгэлийнхэн хүчээр газрыг нь худалддаг. Ийм юм явах нь. Шүүх захирамж гаргаад Шийдвэр гүйцэтгэлийнхэн очиж ажиллана гэдэг чинь болж байгаа юм уу. Барьцааны зүйлийг нотариат баталгаажуулаад, шууд шүүх нь шийдвэр гаргадаг.Улаанбаатар хотын нийт иргэдийн 170-180 мянга нь гэр хороололд байгаа. Тэдний газар ийм дэнчин дээр тавигдана. Хуулийнхан хүчээр орно.Бат-Үүлээс юм, юм болох нь. Дахин төлөвлөлтийнхөө газрын учрыг олоогүй байтал одоо баахан иргэнийг газаргүй болгох юм руу явах нь. Ухсан газраасаа хулгай хийнэ. Чамайг хулгай хий гэж улсын баатар болгоогүй шүү .

Хотын дарга Э.Бат-Үүл: -УИХ-ын гишүүн хүн доромжилж болдог юм уу. Чам муу новшийг хүн доромжилж байхад би чамайг өмөөрч байсан юм шүү.

УИХ-ын гишүүн Ц.Нямдорж:- Чи худлаа хэлж явдаг, хамаг амьтны газар хураагаад авчихсан, орон гэргүй хүмүүс зөндөө байна.

Хотын дарга Э.Бат-Үүл:- Дурак минь чи хэрүүлээс өөр юу хийсэн юм бэ. Худлаа солиорно.

УИХ-ын гишүүн Ц.Нямдорж: -Зайл чи.

Хотын дарга Э.Бат-Үүл: -Яадаг муу новш вэ, чамайг доромжлуулж байхад өмөөрч байсан шүү, би”. Ингэж хэлээд хотын дарга хуралдааныг орхин гарав.

Харин УИХ-ын гишүүн Ц.Нямдорж: -Нэг муу дүүргийн дарга болчихоод УИХ дээр орж ирээд ингэж болдог юм уу. Нотариат тойрсон баахан луйвар явна. Харж л байгаарай, Батзандаан.  Ядарсан иргэд газаргүй болоод дуусна даа” гэж байлаа.

Байнгын хорооны хуралдааны үеэр ийм нэг хэрүүл болсон. Тэгвэл Хотын дарга Ц.Нямдоржийн дээрх үгэнд ихэд эмзэглэсэн бололтой юм Тэрбээр ХЭВЛЭЛД ӨГСӨН ЯРИЛЦЛАГАДАА   “Өмнөөс нь харамсч байна. Нямдорж бол насанд хүрсэн хүн. Ялангуяа УИХ-ын гишүүн хүн шүү дээ. Төрийн хүний үлгэрлэл ямар байхыг ойлгохын дээдээр ойлгох ёстой. Ер нь Нямдорж өөрийнхөө үйлдлээр өөрийгөө л гутааж байна. Гэхдээ өөрийгөө гутаах эсэх нь тэр хүний асуудал. Харин УИХ буюу төрийн дээд байгууллагыг ингэж гутааж болохгүй. Ийм цөөхөн хүнээс болж Их хурлын нэр хүнд унаж байгаад харамсч байна. Иргэдийн төрд итгэх итгэл үгүй болж байна. Захын хүн хараад л бааранд хэрэлдэж байгаа залуучууд шиг ямар учиртай юм бэ, ийм үлгэргүй Их хурал яаж байж болдог юм бэ гээд гайхаад ярьж байна шүү дээ.МАН-д над руу чиглэсэн дайралт хийх уралдаан зарласан юм шиг байна. МАН-ын зүтгэлтнүүд над руу дайрах гэж бүгд хоорондоо өрсөлдөж байна. Тэдний нэг нь Нямдорж. Нямдоржийн үйлдэлд үнэхээр харамсаад байгаа юм.  Бид ажил хэргийн асуудалд санаа нийлэхгүй байж болно. Ажил хэргийн мэтгэлцээн байлгүй яахав. Гэтэл хулгайчаар нь дуудаж гүжирдээд, элдвээр дайрч байна. Тэр хүн Их хурлын танхим эзэлчихээд орсон хүн бүхнийг загнаж байдаг гэж эндүүрчээ. Тэр тусмаа орон нутгийн удирдлагыг өөрийн харьяа байгууллага шиг байлгаад байна. Шинэ Үндсэн хуулиар бид эрх мэдлүүдээ хуваарилсан. Орон нутаг бол Нямдоржид загнуулж байдаг харьяа байгууллага биш. Тиймээс энэ нь үнэхээр зохисгүй үйлдэл байсан. Би ч үнэхээр тэвчээр алдсан. Байнгын хороон дээр орж ирээд ажил ярихаар, хулгайчаар нь дууддаг. Ямар гудамжинд хүн загнаж байгаа биш дээ. Бодолгын асуудал ярихын оронд хувь хүнийх нь хувьд намайг доромжилж, дайрсан. Би ямар ч гэм хийгээгүй. Нямдорж гэж хүнд дайруулж, доромжлуулж байх нь ч зохисгүй. Дээрээс нь УИХ-ын гишүүн хариуцлагатай хандах ёстой. УИХ-ын үйл ажиллагааг хэвлэл мэдээллээр дамжуулдаг. Үүнийг иргэд үзэж байгааг ойлгох хэрэгтэй. Төрийн албан тушаалтан хүн арддаа үлгэрлэх ёстой. Гэтэл хүнийг доромжлоод сууж байж таарах уу” гэжээ.

Үүнээс үзвэл хотын дарга Ц.Нямдорж гишүүний хэлсэн үгэнд ихэд, эмзэглэсэн бололтой.

Мөн олны уцаарыг хүргэсэн уриалгынхаа талаар тэрбээр доорх тайлбарыг хийжээ. “Зориуд ийм шаардлага маягаар мушгин гуйвуулж, улстөржүүлж байна. Тэр нь ч тодорхой байгаа. Би иргэддээ аль болох амралтаа зөв зохицуулаарай гэж уриалсан. Иргэдэд өөрсдөд нь бэрхшээл учрахгүй байхад анхаарч ийм уриалга гаргаж байгаа юм” гэсэн байна.

24tsag.mn