УИХ дээр гацаад байсан Тавантолгойн гэрээний төслийг ирэх долоо хоногт чуулганы хуралдаанаар хэлэлцэхээр болжээ. Уг төслийг 14 хоногийн дотор яаралтай хэлэлцэж, шийдвэрлэж өгөхийг Ерөнхий сайд бараг 2 сар гаруйн өмнө УИХ-ын дарга З.Энхболдоос хүссэн ч хэлэлцэлгүй өнөөдрийг хүрсэн юм.

Учир нь УИХ-аас Л.Эрдэнэчимэг гишүүнээр ахлуулсан ажлын хэсэг гарч Тавантолгойн гэрээний төслийг УИХ-аар хэлэлцэх, эсэх талаар дүгнэлт гаргахыг нь хүлээсээр цаг хугацаа алдсан юм. Уг ажлын хэсгийн хувьд Засгийн газар Тавантолгойн төслөө буцаан авч сайжруулах хэрэгтэй. Цаашлаад уг төсөл дээр дахин тендер зарлана. Тендерт ялсан компани нь төмөр замын асуудлаа давхар шийдэх ёстой гэсэн дүгнэлтийг эхний байдлаар мэдэгдээд байсан. Тэгвэл тэд эцсийн байдлаар дүгнэлтээ гаргаж, УИХ-д өгсөн бололтой.

Ямартай ч Тавантолгойн асуудлыг ирэх долоо хоногийн байнгын хороо, чуулганы хуралдааны хэлэлцэх нь тодорхой болсон байна. Тодруулбал, ирэх мягмар гаригийн Эдийн засгийн байнгын хороогоор уг тогтоолын төслийн хэлэлцэх эсэхийг хэлэлцэх аж. Мөн пүрэв гаригийн чуулганы хуралдааны хэлэлцэх асуудлын хоёрт тус асуудлыг эрэмбэлэсэн байна.

Ингэснээр иргэд болон улс төрчдийн дунд хүлээлт үүсгээд байсан Тавантолгойн асуудал хэлэлцэгдэж эхлэх нь. УИХ-ын зарим гишүүд Тавантолгойн асуудлыг хаврын чуулган завсарлахаас өмнө яаралтай УИХ-аар хэлэлцэж зөв, бурууг тогтооё гэсэн саналтай байсан билээ.

Т.Энхэлээ