Энэ долоо хоногт УИХ-ын чуулганы хуралдаанаар Тавантолгойн гэрээний төслийг хэлэлцэнэ. Удтал хүлээгдээд байсан тус төслийг чуулганаар хэлэлцэх болсон нь олон хүний анхаарлыг татаад байна. Үүнтэй холбоотой асуудлаар Тавантолгойг УИХ-аар хэлэлцүүлэх эсэхийг шийдэх ажлын хэсгийн гишүүн УИХ-ын гишүүн С.Ганбаатар доорх мэдээллийг өглөө.

Тэрбээр "Чуулганаар Тавантолгойн нүүрсний ордыг хөгжүүлэх тухай УИХ-ын тогтоолын төслийг хэлэлцэнэ. Энэхүү тогтоолын төслийн ажлын хэсэгт миний бие ажиллаж байгаа. Засгийн газар хэсгийн  шаардсан долоон баримт бичгийг гаргаж өгөхгүй байна. Тухайлбал, Энержи Ресурс болон Шиньхуа компани хоорондын Хамтарсан компани байгуулах тухай гэрээ, Засгийн газар, Сумитомо хоорондын Худалдааны компани байгуулах гэрээ, Энерж Ресурс болон Эрдэнэс Тавантолгой компани хоорондын эрх үүрэг шилжүүлэх гэрээ зэргийг нэрлэж болно. Гэхдээ Ажлыг гацааж харагдуулахгүйн тулд бидэнд ирүүлсэн материал дээр нь дүгнэлт гаргаад чуулганаар хэлэлцэх болсон. Тогтоолын төслийг чуулганаар хэлэлцэх үед дээрх долоон баримт бичгийг гаргаж өгнө гэдэгт итгэж байгаа. С.Баярцогтын хувийн компанитай холбоотой материал байсан бол тоож гуйхгүй. Монголчуудын эрх ашигтай холбоотой материал учраас бид Засгийн газраас нэхсэн. Ер нь зарим гэрээний баримт бичгийг Засгийн газраас өгөхгүй байгааг ойлгохгүй байна” гэв.

Т.Энхэлээ