УИХ-ын даргын дэргэдэх зөвлөл энэ долоо хоногт Байнгын хороо, Чуулганы нэгдсэн хуралдаанаар хэлэлцэх асуудлын жагсаалтыг батлахдаа Тавантолгойн гэрээний төслийг багтаажээ. Үүнээс үзвэл УИХ дээр гацаад буй Тавантолгойн төсөл одоо л хөдөлж эхлэх нь гэж болохоор. Харамсалтай нь удтал хүлээгдсэн Тавантолгойн асуудал ингэж хурдан шийдэгдэхгүй бололтой. Учир нь Л.Эрдэнэчимэг гишүүнээр ахлуулсан ажлын хэсэг дүгнэлтээ гаргаагүй байна.

Хуваарь ёсоор бол Эдийн засгийн байнгын хорооны өнөөдрийн хуралдаанаар уг тогтоолын төслийн хэлэлцэх эсэхийг хэлэлцэнэ. 

 Гэхдээ утгаар нь хэлэлцэж чадах уу, үгүй юу гэдэг нь эргэлзээ төрүүлж эхэллээ. Олны таамаглаж буйгаар өнөөдрийн хуралдаан эхэлдгээрээ эхлэх ч ажлын хэсгийн дүгнэлт гараагүй гэдэг шалтгаанаар хойшилж мэдэхээр байна. Л.Эрдэнэчимэг гишүүний байр суурь ч үүнийг баталж байгаа юм.

Тэрбээр энэ талаар “Ажлын хэсгийн дүгнэлт гарах болоогүй. Уг асуудлыг чуулганы хуралдаанаар долоо хоног бүр хэлэлцэнэ гэж төлөвлөөд байгаа юм. Гэхдээ энэ долоо хоногт дүгнэлтээ гаргаж байнгын хороогоор хэлэлцүүлж амжихгүй нь. Бараг энэ хаврын чуулганаар хэлэлцүүлж амжихгүй байх гэсэн төлөвлөгөөтэй байна. Учир нь нарийн үзэж судлах шаардлагатай зүйлүүд байна. Бидэнд шаардлагатай бүх материал ирээгүй. Тухайлбал, нэгдүгээрт, Тавантолгойн тендер зарласан тухай 2014 оны 268 дугаар тогтоол, хоёрдугаарт “Энержи Ресурс”, “Шинхуа”-тай хамтарсан компани байгуулах, гуравдугаарт,“Сүмитомо”-той худалдааны компани байгуулах, дөрөвдүгээрт,“Энержи Ресурс”, “Эрдэнэс Тавантолгой” компанийн хооронд эрх, үүрэг шилжүүлэх гэрээний төслүүд ирээгүй байна” гэсэн тайлбарыг өгч байна.

Түүний хэлснээс үзвэл уг асуудлыг хаврын чуулганаар амжиж цэгцлэх нь битгий хэл хэлэлцэж ч амжихгүй бололтой.

Нөгөөтэйгүүр үнэхээр л ажлын хэсгийн дүгнэлтийг үндэслэх шаардлагатай, тэгээд дүгнэлт нь гараагүй байхад уг гэрээний төслийг УИХ, Байнгын хорооны хуралдаанаар хэлэлцэх асуудлын жагсаалтад оруулсан нь ямар учиртай вэ?. Энэ асуултад хариулж чадах хүн өнөөдөр байхгүй байна.

Магадгүй хэдэн долоо хоног дараалан Тавантолгойг хэлэлцэхийг шаардсан гишүүдийн шаардлагад хариулах хариултгүй болсон УИХ-ын даргын башир арга байж мэдэх юм хэмээн хүмүүс хардаж эхэллээ. Тэрбээр удахгүй “Тавантолгойн асуудлыг УИХ-аар хэлэлцүүлэх гэж оруулж ирээгүй биш ирсэн. Харин ажлын хэсэг нь дүгнэлтээ гаргаж өгөөгүй. Би хэлэлцүүлэхэд бэлэн байна” гэдэг тайлбарыг хэлээд сууж мэдэх юм. Тэгэхээр УИХ-ын дарга Тавантолгойн асуудлыг УИХ-аар хэлэлцүүлэхгүй байна гэдэг хэл, амнаас мултарна гэсэн үг. Харин нөгөө Л.Эрдэнэчимэг тэргүүтэй ажлын хэсгийг хэзээ дүгнэлтээ гаргаж өгөхийг хүлээх л үлдэх биз.  Угтаа бол ажлын хэсэг, УИХ-ын дарга хоёрыг салшгүй холбоотой гэдгийг хэн бүхэн мэдэх билээ.

Олны анхаарлыг татаж буй бас нэгэн асуудал байгаа нь Тавантолгойн гэрээний төсөлтэй холбоотой янз бүрийн байр суурь. Тухайлбал, ажлын хэсгийн ахлагч Л.Эрдэнчимэг дүгнэлтээ гаргах хаа байсан юм гэж хэлж байгаа бол ажлын хэсгийн гишүүн С.Ганбаатар тэс өөр мэдээллийг өчигдөр сэтгүүлчдэд өгсөн.

Тодруулбал тэрбээр "Засгийн газар хэсгийн  шаардсан долоон баримт бичгийг гаргаж өгөхгүй байна. Тухайлбал, Энержи Ресурс болон Шиньхуа компани хоорондын Хамтарсан компани байгуулах тухай гэрээ, Засгийн газар, Сумитомо хоорондын Худалдааны компани байгуулах гэрээ, Энерж Ресурс болон Эрдэнэс Тавантолгой компани хоорондын эрх үүрэг шилжүүлэх гэрээ зэргийг нэрлэж болно. Гэхдээ Ажлыг гацааж харагдуулахгүйн тулд бидэнд ирүүлсэн материал дээр нь дүгнэлт гаргаад чуулганаар хэлэлцэх болсон. Тогтоолын төслийг чуулганаар хэлэлцэх үед дээрх долоон баримт бичгийг гаргаж өгнө гэдэгт итгэж байгаа. С.Баярцогтын хувийн компанитай холбоотой материал байсан бол тоож гуйхгүй. Монголчуудын эрх ашигтай холбоотой материал учраас бид Засгийн газраас нэхсэн. Ер нь зарим гэрээний баримт бичгийг Засгийн газраас өгөхгүй байгааг ойлгохгүй байна” гэв.

Түүний ярианаас үзвэл ажлын хэсэг дүгнэлтээ аль хэдийн гаргаад өгчихсөн болж таарч байна. Гэтэл Л.Эрдэнэчимэг гишүүн өгөөгүй гээд байдаг. Энэ талаар О.Баасанхүү гишүүнээс лавлахад “Би өглөө хөдөөнөөс ирсэн учраас ажлын хэсэг дүгнэлтээ гаргасан эсэхийг мэдэхгүй байна. Ажлын хэсэг дүгнэлтээ гаргаагүй байхад Байнгын хороо, Чуулганы хуралдаанаар хэлэлцдэг эсэхийг мэдэхгүй байна” гэлээ.

Ийнхүү тэд өөр, өөр байр суурийг илэрхийлсээр байна. Дээрхийн аль нь ч байсан өнөөдөр асуудал эхнээсээ тодорхой болж эхлэх биз.

Т.Энхэлээ