Удаан хугацаанд дуншсан Хүүхэд харах үйлчилгээний тухай хуулийн анхны хэлэлцүүлэг өнөөдөр НББСШУ-ны байнгын хороогоор орсон ч МАН-ын бүлгийн гишүүд 5 хоногийн завсарлага авсан. Хүүхэд харах үйлчилгээний тухай хуульд ихээхэн ач холбогдол өгч байсан эмэгтэй гишүүд үүнийг эсэргүүцэж, уг хуулийг хэлэлцэхээс нааш байнгын хорооны хуралдаанд суухгүй гэдгээ мэдэгдлээ. Тэд мөн сэтгүүлчдэд мэдээлэл хийв.

Харин МАН-ын зүгээс завсарлага авч буй үндэслэлээ “Айлын таван хүүхдийг гэртээ авчраад харна гэдэг аюулгүй байдал талаасаа боломжгүй гэж үзэж байгаа. Нөгөө талдаа төсөл батлагдсанаар 60 гаруй тэрбум төгрөгийн зардал шаардана. Түүнийг Сангийн яам төсөвт суулгах боломжгүй гэж үзсэн. Ийм учраас завсарлага авах шаардлагатай байна” гэсэн юм.

Ингээд уг асуудлаар эмэгтэй гишүүд юу гэж ярьсаныг хүргэе.

УИХ-ын гишүүн Ц.Оюунгэрэл: Хуулийг хэлэлцэхгүй хойшлуулсаар байх хооронд 10 гаруй хүүхэд галын улмаас амиа алдлаа

-МАН-ын бүлгийн завсарлага авах шалтгаан нь хуулийг эсэргүүцсэн, амьдралд нийцэхгүй байна, хүүхдүүдийг зөвхөн стандартын шаардлага хангасан цэцэрлэгт байрлуулах шаардлагатай гэдэг байр суурийг илэрхийлсэн. Эмэгтэй гишүүд эхнээс нь энэ хуулийг дэмжиж ажилласан. Тус хуулийг дэмжүүлэхийн тулд ХАХНХ-ын яам, БСШУ-ны яамдтай нягт хамтарч ажиллаж байж дэмжлэг авсан. Гэтэл өнөөдөр санал хураах үед завсарлага авсан учраас эмэгтэй гишүүд бид байнгын хорооны хуралдааныг орхин гарч ирээд байна. Энэ хуулийг хэлэлцэхгүй хойшлуулсаар байх хооронд гэртээ харж хандах хүнгүй 10 гаруй хүүхэд галын улмаас амиа алдлаа. Өчигдөр хүртэл бага насны хүүхэд галд өртсөн ч азаар амьд гарсан. Энэ бүхэн цэцэрлэгийн хүртээмж хангалтгүй байгаатай холбоотой. Иймд Хүүхэд харах үйлчилгээний тухай хуулийг нэн яаралтай хэлэлцэж батлах шаардлагатай байна.

УИХ-ын гишүүн С.Одонтуяа: Эрэгтэй гишүүд өөрсдийнх нь хүүхдэд иймэрхүү бэрхшээл тулгардаггүй болохоор үл ойшоож байна

- БСШУ-ны яамнаас гаргасан судалгаагаар 2020 он гэхэд сургууль, цэцэрлэг, дотуур байрны нийт 1750 обьект хэрэгтэй байгаа. Бид үүнийг 5 жилийн дотор барих ямар ч бололцоогүй учраас Хүүхэд харах үйлчилгээний тухай хуулийг батлах ёстой. Гэтэл байнгын хороогоор завсарлага авч байгаа нь энэ хаврын чуулганаар хэлэлцүүлэж амжихгүй гэсэн үг. Намар дахиад л хүүхдүүд цэцэрлэг, сургуульгүй болно. Эмэгтэй гишүүд ихээхэн анхаарал хандуулж ажилласаны үр дүнд 2012, 2013, 2014 онуудын хөрөнгө оруулалтын жагсаалтад сургууль, цэцэрлэгийн барилгууд ихээр орсон байгаа. Энэ асуудлыг шийдэх хүртэл Нийгмийн бодлого, боловсрол, соёл, шинжлэх ухааны байнгын хорооны хуралдаанд оролцохгүй гэдгээ албан ёсоор мэдэгдэж байна. Хүүхэд харах үйлчилгээг хэрэгжүүлэхэд нийт 50 орчим тэрбум төгрөгийн санхүүжилт шаардлагатай байгаа ч эхний ээлжинд ядаж 5 тэрбум төгрөг шийдвэрлээд өгвөл төслийг хэрэгжүүлж эхлэх боломжтой байгаа. Гэтэл эрэгтэй гишүүд өөрсдийнх нь хүүхдэд иймэрхүү бэрхшээл тулгардаггүй болохоор үл ойшоож байна.

УИХ-ын гишүүн З.Баянсэлэнгэ: Энэ бол улстөржих сэдэв биш

Энэ бол улстөржих сэдэв биш. Амьдралаас урган гарч байгаа асуудал. Хуулийн төслийг батлах нь л чухал байна. Монголын нийгэмд хүүхэдтэй холбоотой гарч байгаа асуудал, сэтгэл эмзэглүүлсэн зүйлүүдийг даван туулах арга зам бол Хүүхэд харах үйлчилгээний тухай хууль юм. Тиймээс энэ хуулийг гацаах шаардлага байхгүй” гэж үзэж буйгаа илэрхийлсэн юм.

УИХ-ын гишүүн Д.Арвин: Хүүхдүүд гудамжинд хэвтэж байна

МАН-ын зарим гишүүд мөнгө байхгүй гэдэг шалтгаанаар хуулийн төслийг гацааж байна. Энэхүү хуулийн төслийг хаврын чуулганаар хэлэлцүүлэхийн төлөө эмэгтэй гишүүд тэмцэхэд бэлэн байна. УИХ дахь намын бүлгүүд энэ асуудлыг ярилцаж шийдвэрлэхгүй бол эмэгтэй гишүүд чуулганы хуралдаанд ч суухгүй хүртэл арга хэмжээ авна гэлээ.Хүүхэд харах үйлчилгээний тухай хуулийн төслийг ард түмэн захиалж, Монгол Улсын Ерөнхийлөгч өргөн мэдүүлсэн. Мөнгөтэй байх үед Ардын намынхан нэг ч ширхэг сургууль, цэцэрлэг бариагүй байж, мөнгөгүй үед ард түмэнд хайр зарлаад. Мөнгөгүй үедээ сургууль, цэцэрлэг барих гэж ядаж байна. Сангийн яам ямар хамаатай юм. Хүүхэд харахаа хэнээр заалгах гээд байгаа юм. аянзүрх дүүрэгт энэ хуулийг хүлээгээд 30-аад хүүхэд харах үйлчилгээ бий болгох гээд байж байна. Та бүхний эсрэг улстөр хийнэ. Хэвлэлийн бага хурал хийнэ. Хууль хүлээж байгаа иргэдэд юу гэж хэлэх юм. Эрчүүд энэ балиар зангаа тат. Хүүхдүүд гудамжинд хэвтэж байна, хүүхдээ харах бололцоог нь олгоодох гэж гуйж байхад завсарлага авах ямар хэрэгтэй юм.

Эмэгтэй гишүүд мэдээллийн төгсгөлд ажлын хэсэгт бүх намын төлөөлөл орсон бөгөөд ажлын хэсгийн бүх гишүүдийн санал энэхүү хуулийн төсөлд туссан болохыг мэдэгдсэн юм

Т.Хулан