Ардчилсан намын Шинэчлэлийн Хөдөлгөөнөөс ээлжит мэдээллээ хийлээ. Тэд өнөөдрийнхөө хуралдаанаар Үндсэн хуульд өөрчлөлт оруулах асуудлыг хөндөв.

Шинэчлэлийн Хөдөлгөөний хувьд  Үндсэн хуульд нэмэлт өөрчлөлт оруулахдаа дараах чиглэлүүдэд анхаарал хандуулах нь зүйтэй гэж үзэж байгаа аж.

Үүнд:

 -Засаглалын зөв хувиарлалтын тогтолцоог бүрдүүлэх,
-Иргэний эрх, үүргийг тодотгох ,
 -Төр иргэн хоёрын хоорондын хяналтын тогтолцоог сайжруулах,
 -Хариуцлагын механизмыг төгөлдөржүүлэх,

Мөн Үндсэн хуульд нэмэлт өөрчлөл оруулахдаа 1992 онд Үндсэн хууль баталсантай адил бүрэлдэхүүн буюу Ард түмний төлөөллийг бүрэн хангахуйц өргөтгөсөн хурлаар хэлэлцэн шийдвэрлэх. Цаашид Үндсэн хуулийг өөрчлөхдөө энэ жишигийг хуульчлан Үндсэн хуулийн 68, 69 дүгээр зүйлүүдэд өөрчлөлт оруулан баталгаажуулах хэрэгтэй гэж тус хөдөлгөөний зохицуулагч Л.Наранбаатар хэллээ.

Харин АН-ын хувьд Үндсэн хуулийн өөрчлөлтөд баримтлах байр сууриа Намын Их хурлаараа хэлэлцүүлэн тогтоох нь зүйтэй гэдэг саналыг тус хөдөлгөөнийхөн гаргаж байгаа аж.

Дашрамд дурдахад, тус хөдөлгөөнийхөн УИХ дахь нам дамнасан бизнесийн бүлэглэлүүд, ёс зүйгүй, хариуцлагагүй гишүүдийг дахин сонгохгүй тулд АН-ын “Цагаан жагсаалт”-ыг гаргах ёстойг мөн удирдлагууддаа уламжилж байгаа юм байна.

Т.Энхэлээ