УИХ-ын Аюулгүй байдал, гадаад бодлогын байнгын хороо өнөөдөр хуралдаж, Монгол Улсын цөмийн зэвсгээс ангид байх статусыг шинэ түвшинд гаргах тухай” УИХ-ын тогтоолын төслийн анхны хэлэлцүүлгийг хийлээ.
Уг тогтоолын төслийг УИХ-ын гишүүн Р.Амаржаргал, М.Батчимэг, Н.Энхблд нар санаачлан өргөн барьжээ.
Монгол Улс гадаад бодлогодоо аюулгүй байдлаа улс төр, дипломатын аргаар бэхжүүлэхэд чухал ач холбогдол өгдөг билээ. Тэрхүү бодлогынхоо хүрээнд гадаадын цэрэг, зэвсэг, түүний дотор цөмийн болон үй олноор хөнөөх бусад зэвсгийг нутаг дэвсгэртээ байрлуулахгүй байх үүднээс 1992 онд Монгол Улс нутаг дэвсгэрээ цөмийн зэвсэггүй хэмээн зарласан. Энэхүү тогтоолын төсөлд хөрш зэргэлдээ ОХУ, БНХАУ болон Казахстантай хил орчмын цөмийн байгууламжуудын талаар мэдээлэл солилцож байх, цөмийн аюулгүй байдлыг бэхжүүлэхэд анхаарах талаар Монгол Улсын Засгийн газарт чиглэл өгөхөөр тусгасан байна. 2015 оны 9 дүгээр сард Нийслэл Улаанбаатар хотод болох Европын Аюулгүй Байдал Хамтын Ажиллагааны Байгууллагын Парламентын Ассамблейн өмнө ийм тогтоол гаргах нь улс төрийн хувьд цаг үеэ олсон чухал арга хэмжээ болно хэмээн төсөл санаачлагчид үзэж байгаа аж.
Тогтоолын төсөлтэй холбогдуулан Батлан хамгаалахын сайд Ц.Цолмон, 1988 онд НҮБ-ын Аюулгүй байдлын зөвлөлөөс Монгол Улсын аюулгүй байдлыг хангах баталгаа гаргуулах чиглэлээр ажиллаж байсан. Үүнд гол түлхэц өгөх асуудал нь цөмийн зэвсэггүй гэсэн статустай байх асуудал байсан. Тиймээс НҮБ-ын Аюулгүйн зөвлөлөөс Монгол Улсын аюулгүй байдлыг хангах баталгаа авах гэсэн заалтыг тогтоолын төсөлд тусгах нь зөв гэсэн санал гаргасан. Харин УИХ-ын гишүүн Р.Амаржаргал, Тогтоолын төслийн гол агуулга бол НҮБ-ын Аюулгүйн байдлын зөвлөлөөс баталгаа гаргуулахад чиглэж байгаа тул Ц.Цолмон сайдын саналын тогтоолын төсөлд нэмж суулгах шаардлагагүй. Тиймээс энэхүү саналаа татаж авах хэрэгтэй гэсэн тайлбар өглөө. Ийнхүү Ц.Цолмон сайд өөрийн саналаа татаж авлаа.
Мөн УИХ-ын гишүүн Л.Болд, Энэхүү тогтоолын төсөл цаг үеэ олсон зөв алхам юм. Тиймээс анхны хэлэлцүүлгээр батлах нь зөв гэсэн санал гаргасан нь олонхийн дэмжлэгийг авлаа. Ийнхүү тогтоолын төслийн анхны хэлэлцүүлгийг хийсэн тухай байнгын хорооны санал, дүгнэлтийг чуулганы нэгдсэн хуралдаанд хүргүүлэхээр тогтов.
