УИХ-ын эмэгтэй гишүүд чуулганы

нэгдсэн хуралдааныг орхин гарлаа. Тэд Хүүхэд харах үйлчилгээний тухай хуулийн төслөөр МАН-ын бүлгийн авсан завсарлагыг эсэргүүцэж ийнхүү хуралдаанд суухгүй байгаа юм.

Хүүхэд харах үйлчилгээний тухай хуулийн төслийн анхны хэлэлцүүлэг энэ сарын 16-нд Нийгмийн бодлого, боловсрол, соёл, шинжлэх ухааны Байнгын хорооны хуралдаанаар орж, санал хураахын өмнө МАН-ын бүлгийн гишүүд завсарлага авч төслийн хэлэлцүүлгийг тав хоногоор хойшлуулсан билээ.

Завсарлага авах шалтгаанаа “Энэ хууль амьдралд нийцэхгүй байна, хүүхдүүд бүгд стандартын шаардлага хангасан цэцэрлэгт хүмүүжих ёстой” хэмээн тайлбарласан юм. Үүнд нь дургүйцсэн Хүүхэд харах үйлчилгээний тухай хуулийг эхнээс нь дэмжиж ажилласан УИХ-ын эмэгтэй гишүүд Байнгын хорооны хурлыг орхин гарч, хуулийн төслийг хэлэлцэхээс нааш НББСШУ-ын Байнгын хорооны хуралдаанд суухгүй гэдгээ албан ёсоор мэдэгдсэн. 

Харин эмэгтэй гишүүд уг асуудлыг Байнгын хороогоор хэлэлцэх хүртэл эсэргүүцлээ илэрхийлж чуулганы хуралдаанд суухгүй гэж байгаа юм. Өнөөдрийн УИХ-ын чуулганы нэгдсэн хуралдаанд гурван эмэгтэй гишүүнээс бусад нь байхгүй байна.

Энэ талаар УИХ-ын дарга З.Энхболд “Эмэгтэй гишүүд чуулгандаа оролцоорой. Хүүхэд харах үйлчилгээний тухай хуулийн төслөөс болоод чуулганд байхгүй байх шиг байна. Асуудлаа Байнгын хороон дээрээ шийдвэрлэ. МАН-ын бүлгийн завсарлагыг дуусахаар хуваариараа хэлэлцээд явна. Чуулганы хуралдааныг ингэж бойкотолж болохгүй” гэв.

Т.Энхэлээ