УИХ-ын нэгдсэн чуулганы хуралдаанаар Зэвсэгт хүчний жанжин штабын даргын албан тушаалд Д.Давааг томилуулах асуудлыг зөвшилцөж гишүүд дэмжлээ.

Зэвсэгт хүчний жанжин штабын даргын албан тушаалд Бригадын генерал Дуламсүрэнгийн Даваагийн нэрийг Монгол Улсын Ерөнхийлөгч энэ сарын 15-нд өргөн мэдүүлсэн билээ.

Харин өнөөдрийн хуралдаанаар гишүүд нэр дэвшигчээс сонирхосон асуултаа асууж, захиас хэлсний дараа санал хурааж зөвшилцөн Д.Давааг Зэвсэгт хүчний жанжин штабын даргын албан тушаалд томилуулахыг дэмжсэн юм. Харин томилгоог Монгол Улсын Ерөнхийлөгч хийх аж.

Дашрамд дурдахад Монгол Улсын Зэвсэгт Хүчний Жанжин Штабын дарга, Дэслэгч генерал Ц.Бямбажавын өөрийн хүсэлтээр үүрэгт ажлаасаа чөлөөлөгдсөн юм.

Харин өдгөө Зэвсэгт хүчний жанжин штабыг удирдах Д.Даваагийн товч намтарыг хүргэж байна.

Бригадын генерал Д.Даваагийн товч намтар:

Д.Даваа нь 1963 онд төрсөн. 1994 онд ЗХУ-ын Вольск хотын Цэргийн ар талын дээд сургууль, Санкт-Петербург хотын Цэргийн ар тал, тээврийн академийг Цэргийн ар талын команд штаб, оператив тактикийн мэргэжлээр төгсчээ.

Тэрбээр Монголын ардын армийн 162 дугаар ангид хүнс, хувцасны албаны даргаар ажлын гараагаа эхэлж ангийн хүнсний хангалтын тасгийн дарга, захирагчийн орлогч, ар талын дарга, Батлан хамгаалахын их сургуулийн Цэргийн дээд сургуулийн тэнхмийн эрхлэгч, ар тал эрхэлсэн дэд захирал, Батлан хамгаалах яамны Санхүү, хөрөнгө оруулалтын хэлтсийн дарга, Зэвсэгт хүчний Жанжин штабын Цэргийн хангалт, үйлчилгээний газрын даргаар ажиллаж иржээ.