УИХ-ын гишүүн Н.Алтанхуяг өнөөдөр 14.30 цагт Төрийн ордны А танхимд сэтгүүлчдэд мэдээлэл хийхээр болжээ.

УИХ-ын чуулганы өнөөдрийн хуралдаанаар түүний өргөн барьсан  Эрүүгийн байцаан шийтгэх хуулийг хэлэлцэх гэтэл Хуульзүйн байнгын хорооны дарга Д.Ганбат Эрүүгийн байцаан шийтгэх хуульд өөрчлөлт оруулах  тухай, прокурорын байгууллагын тухай хуульд  нэмэлт оруулах тухай хуулийн төслүүдийг хойшлуулах санал гаргасан.

Учир нь  Үндэсний аюулгүй байдлын зөвлөлөөс өчигдөр Хууль зүйн байнгын хороонд  хандаж, албан тоот ирүүлжээ. Албан тоотод Үндэсний аюулгүй байдлын тухай хуулийн тодорхой заалтыг үндэслэн  Эрүүгийн байцаан шийтгэх хуулийг хэлэлцэхийн өмнө ҮАБЗ-өөс шийдвэр гаргуулах нь зүйтэй талаар дурдсан байна. Өөрөөр хэлбэл АТГ-ын  харьяанд шилжээд байгаа  прокурорын байгууллагыг прокурорын байгууллагад эргүүлэн шилжүүлэх асуудлыг нухацтай хэлэлцэх нь зүйтэй гэж  үзжээ. Энэхүү саналыг УИХ-ын дарга хүлээн авснаар  УИХ-ын гишүүн Н.Алтанхуягийн өргөн барьсан  Эрүүгийн байцаан шийтгэх хуулийг энэ долоо хоногт чуулганаар хэлэлцэхээргүй болсон юм.

Тэгвэл яг энэ асуудлаар тэрбээр мэдээлэл хийх юм байна. Түүний хувьд өөрийнх нь өргөн барьсан хуулийн төслийг нь шалтаг гаргаж хэлэлцэх асуудлаас хассан гэж үзэж байгаа аж.

Т.Хулан