УИХ дахь МАН-ын бүлгийн дарга, УИХ-ын гишүүн С.Бямбацогт Ховд аймагт ажиллаж байна. Энэ үеэр тэрбээр тус аймгийн тээвэрчидтэй уулзаж санал, бодлыг нь сонслоо. Түүний хувьд Ховд аймгийн тээвэрчдийн холбооны тэргүүнээр ажилладаг бөгөөд энэ жил Авто тээврийн салбарын 90 жилийн ой тохиож байгаатай холбогдуулан тус ажлыг зохион байгуулах болон тээвэрчдийн өмнө тулгамдаж буй асуудлаар тэрбээр санал бодлыг нь сонссон нь энэ юм. Тээвэрчдийн хувьд Хөшөөтийн нүүрсний уурхайгаас тээвэрлэлт хийдэг. Эндээс олсон ашиг нь амьдралынх нь гол орлого болдог байна. Гэтэл сүүлийн үед Хөшөөтийн уурхайг ажиллуулж буй “Мон Эко” компанийн зүгээс тээвэрлэлтийн үйл ажиллагаа явуулдаг 5 компанийг хооронд нь өрсөлдүүлэх замаар нүүрсний тээвэрлэлтийн үнийг унагаж байгаа гэнэ.  Мөн гэрээнд заагдаагүй хууль бус төлбөр хураамжийг ихээр авч байгаа аж. Тухайлбал, малын шүлхий өвчин гарах үеэр угаалгын төлбөр гэж тонн, км тутмаас 3 долларыг жолооч нарын орлогоос шууд татах байдлаар хурааж авсан байна. Мөн ариутгал цэвэрлэгээний хураамж нэрийдлээр хамгийн багадаа 400 гаруй сая төгрөгийг авто тээрийн компаниудаас авчээ. Тус мөнгийг Засаг даргын тамгын газар, “Мон Эко” компани хоёрыг нь аль нь авсан нь тодорхойгүй гэнэ. Энэ мэт янз бүрийн шалтгаанаар хураамж авч жолооч нарын эрх ашгийг ноцтойгоор зөрчиж байгаа талаар тээвэрчид ярилаа.

Харин УИХ-ын гишүүн С.Бямбацогт  энэ талаар “2010 онд Хөшөөтийн уурхайн тээвэрлэлтийн ажлыг Хятад болон Улаанбаатарын компаниуд хамтарч хийх гэж байсан. Тэр үед  нилээн шаргуу хөөцөлдсөний эцэст Ховдын жолооч нараар тээвэрлэлтийн ажлыг хийлгэхээр болсон. Ингэснээр орон нутгийн иргэд нэгдэн нийлж хоршоод болж ажиллах нөхцөл нь бүрдсэн. Давхар ажилтай, орлоготой болж байна. Өөрсдөөр нь ажил хийлгэх боломжийг бүрдүүлж өгөөд байхад уралдаж үнээ буулгаж болохгүй. Та бүхэн нэгдмэл нэг санаатай байх шаардлагатай. Хэрвээ бид хоорондоо эв түнжингүй байвал бусдад ажлаа булаалгана. Би УИХ-ын гишүүнийхээ хувьд тээвэрлэлтийн ажилд гадны компаниуд орохыг болиулж, Ховдын жолооч нарыг ажиллуулах нөхцлийг бүрдүүлсэн.  Тиймээс учраа олж  эв, найрамдалтайгаар ажиллах хэрэгтэй. Хоёрдугаарт, үндэслэлгүйгээр хураамж татвар авдаг ажлыг хүчтэй эсэргүүцнэ. Хөшөөтийн тээвэрлэлтийн ажилд монголчуудын эрх ашиг зөрчигдөх ёсгүй. Уг асуудалд шаардлага тавина. Зогсооно. Гэрээнд болон хуулинд заагаагүй татвар хураамж авах асуудал байх ёсгүй” гэв.

Т.Хулан